دوما ، الي صديقاتي واصدقائي ..ممن عملوا في حركة الطلبة المحايدين بجامعة الخرطوم ذات يوم ، وايام جاءت فيما بعد..لهن ولهم الحب وذكرى ايام النضال والمسغبة..النضال الذي يريد البعض بلؤم محوه من الذاكرة السودانية..!!..وعبرهم جميعا تحية لصديقنا الحبوب جعفر خضر (من القضارف)..تحية لهن ، لهم وهم يجوبون ############ــــات الكون في ذات لحظة..ولم ينسوا مطلقا وطن اسمه السودان..لهن: البنات التي انجبت الرجال..والرجال اللذين انجبوا البنات الكندكات.. جميعا كل الحب والصدق الذي عاهدناكم وعاهدنكن يا بينات الضو النادر..!! وجه القمر سيظل دوما: سافر..يضوي شعاع ونور وافر..!!..يا مدني عباس مدني..!!
كتب حافظ بشير:
Quote: حركة المحايدين ككل كانت خازوق كبير في مسيرة الحركة الطلابة وكانت خصماً عليها
كضاب يا حافظ بشير..وكضاب وستين كضاب..!!
يكفي انو قيادات المحايدين البتتكلم عنها يا حافظ هي التي اوقفت دكتور عبد الله حمدوك من ان يشارك في حكومة عمر البشير كوزير مالية..قبل كم سنة من الان..وبرضك ح تفرضو عليك كخيار في حكومة انتقالية..!! اسامة ادريس القاعد يتفاصح معاك في الخيط ده يا حافظ..هو السكرتير العام في اتحاد جامعة الخرطوم..في اول دورة يسيطر عليها المحايدين في جامعة الخرطوم..ذات بؤس وقمع ودم في تاريخ السودان..وهذه الدورة جاءت بذكاء وتخطيط من المحايدين..فلكي يصلوا لإتحاد جامعة الخرطوم ، قبل ذلك قاموا بالسيطرة على الروابط والجمعيات الأكاديمية في كليات جامعة الخرطوم واخرها كان كلية التربية الإستشهدت فيها التاية ابو عاقلة، ثم سيطروا على كل الروابط الإقليمية في في الجامعة..ثم اتجهوا نحو السيطرة على اتحاد جامعة الخرطوم..ونجحوا في ذلك وكان سكرتيرهم العام في اتحاد الجامعة..هو اسامة ادريس القاعد يتداخل معاك هنا يا حافظ بشير..ويا ريت تقدر تقول للناس انت شنو ومتين اتخرجت من الجامعة ..جامعة الخرطوم عشان تجي تفتي بانو المحايدين كانوا اكبر خازوق...ولا الفكرة عندك ونسة ساكت يا مولانا.؟
شكرا جعفر خضر..شكرا حسن العالم..شكرا مدني عباس مدني..وقبلهم جميعا..شكرا السوداني الجميل..صديقينا اسامة ادريس..اسامة رامبو..اول سكرتير عام في اتحاد طلاب جامعة الخرطوم وفي ظل اشرس سنوات الجبهة الإسلامية حينما كانت تحكم السودان..!
وحينما تجئ النخبة السودانية ، بعد سنوات تستغرب من ظهور مدني عباس ومدني وجعفر خضر..وتحاول تشيطن الكل بضربة لازب..فهنا يجب ان يعرف اهل السودان اين هي الحقيقة..!!
بالمناسبة يا حافظ بشير..ان كانت لك القدرة ان تشيطن المحايدين وتسميهم خوازيق..مافي مشكلة يا عمك..كن شجاع وقول انت منو بالضبط ومتين اتخرجت من الجامعة..!
وعشان ننصفك اكتر: اهو المحايدين قدامك:
اسامة ادريس (كلية العلوم الرياضة جامعة الخرطوم) اول سكرتير عام في في اول دورة سيطر عليها المحايدين في جامعة الخرطوم..
محمد النور كبر..سكرتير ثقافي في جمعية كلية القانون بجامعة الخرطوم ،
اكتر من كده يا حافظ بشير..حينما كنت سكرتير ثقافي في جمعية كلية القانون(المحايدين)..قمنا بصياغة بيان ، أول بيان معارضة لحكم عمر البشير..وفي البيان ده طالبنا العسكر انو يرجعوا لثكانتهم..ومن باب التأمين يا حافظ بشير طبعنا البيان في مدرسة العلوم الرياضية بجامعة الخرطوم ، بمراقبة اسامة ادريس القاعد يكتب في هذا الخيط..والبيان اتنشر واتوزع في يوم السبت الأول من يوليو ..1989
للمرة التانية يا حافظ بشير..قدام الناس ديل: اتخرجت بتين من الجامعة عشان تدي نفسك الحق تفتي بانو المحايدين خوازيق يا قريبي؟..اهو قدامك في الخيط ده..اسمة ادريس من مؤسسي حركة الحياد في كلية العلوم الرياضية بجامعة الخرطوم..محمد النور كبر من مؤسسي حركة الحياد في جامعة الخرطوم كلية القانون..وخلفهم اجيال الحياد القاعد تناقرك في المنبر ده يا حافظ بشير..كل المطلوب تحدد موقعك شنو البخليك تفتي بانو حركة المحايدين اكبر خازوق..!!
وعشان نوريك استهبال المحايدين يا حافظ بشير..خطينا غنية مشهورة لخضر بشير (وجه القمر سافر) ، ابن الشاعر الكتبها يا حافظ بشير بيكتب معاك في المنبر ده منبر..سودانيز اولاين..باعتبارك مش خازوق يا ريت تعرفو..!!..ومش مهم..
المحادين الذاكرة يا حافظ بشير متذكرين..انو كمال ترباس اول من غنى لنظام عمر البشير (لم الجيش للشعب انحاز..هبت ثورة الإنقاذ)..عشان كده جبنا ليك الغنية بصوت كمال ترباس ..لأنو دي خيبة سودانية مافي زول بيتذكر غير المحايدين الخازوق يا قريبي..!!
ومعاك يا حافظ..عشان الشعب السوداني يعرف الخوازيق..!!
انتو منو يا حافظ عشان تفتي بانو المحايدين خازوق؟ قدامك وقدام الناس.. اسامة ادريس..محمد النور كبر..محمد جمال الدين حامد..حسن محمد ادم العالم..جعفر خضر..مدني عباس مدني..! بتقدر تقول انت منو يا حافظ؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست