® مسرح في الهمبريب الطلق £

{27}
ممنوع دخول ذوي القلوب الرهيفة و البعافو العواليق
إلا من خلف كواليس مسرحنا المتنقل بالعراء الطلق!!
البوست دة انا نزلتو قبيل والادمن مسحو... ماعارفة
الغلت وين..نزلتو للناس اللي ماقروهو قبيل.... ياسيادة
الادمن اذا مسحتو تاني معناتا انت قاصدني عدييل كدا..
∆دود_بانيه:
في خريف من خريفات الله السمحات ديل...ادلينا البلد إجازة.
بعدين كنا لما نمشي انا اكتر واحدة كنت بستمتع بالاجازات دي.
لي سبب واحد بس...انو ماكان عندي مشكلة في اي نوعية اكل...
بدوس اي شي من طرف دون مااضجر او اشكي من الصنف الواحد
زي مابيعملو اخواني. الجيلي خوي بيقول تاني مابيمشي البلد عشان
بيفطر عصيدة ويتغدا عصيدة... والشاي زاتو بي عصيدة 😂

∆ جد والله لانو بعد ماحلة العصيدة تنشف بيطلعو منها( القنقو )
ودة بيشربو بيهو الشاي... يعني العصيدة لاحقاك لاحقاك... للاسباب
دي قال العصيدة بتعمل قوب( جاب الفتوي دي من وين انا ماعارفة )...

∆ اها بنات عمي واولادو قالو لي تمشي معانا الخلا ماشين نقبض
( بقد ) دة الجمع طبعا والمفرد منها(بق) ومعناها الحاجة الفي الصورة
دي طبعا افتكرتا حاجة بيقبضوها زي الارنب مسلن او جداد الوادي اللخدر
و كنت متحمسة جدا للقصة.. وماشة قداام..وكانو كل زول شايل(بستلة).

∆ اول ماوصلنا شايفة ليك شجرة( عرداية) كوبيييرة قامو وقفو تحتها.
انا طبعا لي جهلي و غباي قايلاهم دايرين يرتاحو. اتاريهم دة مكان الصيد
بتاعهم..قلتا ليهم اها وينو بتاعكم دة... قال لي: صتقعي ارفعي راسك فوق.
صنقعتا دنقرتا ماشايفة حاجة... و اقول ليهم : وينو ياخ... فاذا بها اشوف ليك
كمييية بتاعة حاجات كدة بتتحرك لامن عاملة ضل. و سادة عين الشمس.

∆ بديت اركز فيها كويس ماعرفتها بالضبط شنو... بس حاجة صغنونة
كدة ملونة وطويييلة مقسمة لي كم فص .... و انا طبعا مركزة مع العرداية
لانو لما كنت في الخلوة كان فيهو حراة( جاية من حار) محطة بالجدوة!!

∆ ...اها الحاجات ديل بياكلن من ورق الشجر عشان كدة بتكون قليييدة ومليانة...
اها بدو يقبضو فيها وانا واقفة منتظرة ومابين انتظاري ودهشتي هم خلاص خلصو...
طبعا اول ماتقبض واحدة بتدخلا البستلة طوالي... وتقفلا اها اذا مابقي ايقاع حركتك سريع اول ماتفتح البستلة عشان تخت واحدة... يلا الختيتا قبيل ديك بتجي طالعة...
يلا، بعد معارك ومعافرات انتهت بالقبض علي المخلوقات دي رجعنابن الحلة غانمين.

∆ راجعين علي الحلة وانا راسي بيودي ويجيب... ياربي هم جادين في البتاع دة
ولا ساي دايرين يسوقوني بالخلا... لالا مااظن دة بياكلوهو...
طيب يمكن مودنو للجداد حقهم.. ( طبعا طلعتا لاحقا انا الجدادة 😂)

اول ماوصلنا لقينا مرة عمي خاتة صاج كبيييير وعليهو حبة زيت و حاشة
ليها حبة بصل وكم قرن شطة وليمون وملح... ومعاهم( شرورو ) الشرورو
لغير الناطقين بها و الناطقين بغيرها معاً، حاجة كدة بتشبه جردقة العطرون.
فطوالي غسلت الحاجات دي وكبتا ليك في الزيت الحار دة... وضافت باقي
التكاوين.. قدر ماحكيت ليكم المنظر كان كيف ماحتقدرو تتخيلو معاي...

∆ اها بعد ما الشيء دة نجض تب... كبتو في صحن وحلبت فيهو ليمون..
وشتتت ليها بصيلات گلاب بي فوق..اولاد عمي كان بيطلعو من النار نظام
الضواقة.و رغم اني مامستوعبة انو الحاجة دي ممكن تتاكل بس مطقتا
لامن ريلتا لامن زول يطلع واحدة يضوقا...

∆ يلا لامن جاء دوري( انا طبعا فضولية جدن وبحب اجرب الحاجات
الماعملتها قبل كدة)... قالو لي تاكلي معانا ولا تنتظري قفة عمك... طبعا
بقيت بين امرين( احلاهما مر)... بين أرجى قفة عمي الأماني عارفاه كمان
ح يجيب فيها شنو ؛ و غير كدة حيتاخر والجوع حيقتلني... وبين اتوكل
واكل معاهم والله يسترني من (طه القرشي )... اها في لحظة كدة جاني
ليك الهام ويقين من وين ماعارفة... يعني ماياهم بياكلو قدامي الجاهم شنو...

∆ يلا، مديت ايدي علي الصحن و أنط لأني لسة بين بين... في الاخر شلتا
قطعة ووديتا علي خشمي... بالله اللحظة دي بس التقول دايرين يقطعو رحطي😂
ياخ الدودة دي اول ماطاب ليها المقام في خشمي... لقيتا ليك طاعمة جنس طعم....
والعجب الجزء الخلفي حتة الضنب...( Stool General ) رهيييييب...طاعم طعامة السنين😂..رغم اني اتخيلتا اني ممكن القي (motile bacteria) او(Anti amiba)
و لا اي مصيبة زمان ممكن تتلقي تحت ال (microscope ) الا انو النفيسة الساقطة الدنيئة والامارة بالسوء كانت بتقول لي( اسغر منك دوسو دوي الگيزان)...اللهم اكلتا
زيين واستمتعتا جدا بالطعم اللي لي لحظة كتابة البوست دا انا مالاقاني اطعم منو....
ابقو طيبين... وفتكم بي عافية انتظروني الخريف الجاي مع حكاية ابوقنفوت...
#كسرة
ملطوش بي حرفنة شديدة ، من دلدوماية حبنا ؛ و نحييها من هنا.