في سنة 1955 ، حينما زار الصحفي البريطاني انتوني مان (من الديلي تليغراف) جمهورية امسودان ، قام قال ، بعد التقصي والتنقيب ، قال عبارتو الشهيرة: حينما خلق الرب امسودان ، قام ضحك..!!..
طبعا من غير يوضح لينا ليه الرب في اعاليه ضحك من شكل تلك الخلقة التي سواها بايديه الميمونة..وسماه امسودان..!
اليوم ، عرفنا ليه ضحك الرب لمن خلق امسودان..!
مايصرف علي البمبان ، مايصرف علي الرصاص..يكفي لتنمية اقليم مثل شرق السودان ، ومحلية بائسة اسمها خشم القربة..!
وبرضك ، بدم بارد بنكتل فيها زول ، مش زول ساكت زي كبر وهاشم الحسن ، وانما معلم (تقرأ مستقبل امسودان) اسمو احمد الخير عوض الكريم..!!
بالله دي امة يترفع ليها علم استقلال..؟؟؟
اضافتك هنا يا صديقي ، هي من باب سد الفرقات..طبعا (سد الفرقات) دي حقت اهلك الأنصار..وكونو (ختمي متلك) يستشهد بيها مواربة ..فدي بالدنيا..!
صاحب اخوي الأصغر (وهو معلم برضك يعاني ما يعاني في امسودان العجيبة دي) وصاحبي لاحقا اسمو محمد حسن صديق (تبشة كما تعرفه اهالي الدلنج) كانت عندو حكمة بتقول: الدخل الحمام..كن هرّ ..هرّ..وكن ما هرّ..برضك هرّ..يعني ناس كسلا: ختمي ..وكن ما ختمي برضك ختمي..!!
مش مهم يا صاحب..تبقى ختمي ، شيوعي ، اشتراكي..انسان ساكت..مش مهم..!
انتا ، يا هاشم ، جبت الغنا..الخطاب الإجتماعي المؤشر المفارق الذي عبره ادرس واقع جمهورية امسودان ، وهو معيار لم يخذلني قط..سواءا بالوجدان او بالعلم..!
وشباب الثورة في الشوارع..مافي حاجة بتهز وجدانو ، مثلما خطاب الغنا..والله صحي..!
شايف النخبة السودانية دوبك عرفت لغة خطاب الشباب وكمان بتصدر عبرها بيانات..!
ثم..
السايق العظمة سافر..خلاني وين..سافر..خلاني ليه.. الماشي لي باريس جيب لي معاك عريس.. شر طا يكون لبيس..من هيئة التدريس..!
حليمة الصومالية (حليمة محمد قول) لمن اختارت اداء هذا الليرك..ركزت على حكاية (هيئة التدريس)..يعني حينما نقلت حاجة عن امسودان ، قامت بالتركيز على الضمير:المعلم/ة..!!
وهكذا امسودان يا قريبي ، ضميرها في المعلم..دوما ضميرها في المعلم..وبهذا تشهد كل شعوب افريقيا..التي تعلمت شعوبها علي ايادي المعلمين والمعلمات من امسودان..!
لذلك ، حينما يتم اغتيال الأستاذ احمد الخيرعوض الكريم...مش بيحتار اهل امسودان فقط ، وانما بتحتار افريقيا التي تنظر للسودان كأخ اكبر..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست