نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: حميد ثروه الشعر وثورته....او محاوله لفك طلاسم حميد (Re: Masoud)
|
نبدأ من وين يارفيق انت في قيف البداية وعزة في آخر الطريق
هكذا احتار حميد من اين يبدأ وانا محتار مثله .الآن على الاقل لااستطيع القاء الضوء علي الدراسة لأن قراءتها تحتاج لمزيد من الوقت والمراجعة وهذا غير متوفر لي حالياً
حميد انطلق من بيئته المحلية ومن بداياتة كان يحمل الثورة بداخلة وحاول ان يخرج بنا من المالوف من الافكار والكلمات لذلك نجد ان له قاموسة الخاص النابع من المحلية وهو يملك مخزون تراثي شمالي كبير . في المرحلة الدراسية المبكرة نظم
شن طعم الدروس مادام بكانا مشي قطر
كيف زاتا ترتاح النفوس تقبل قرايتاً في سفر
ويختم تلك القيدة التى كانت عبارة عن رسالة لوالدته
مااظني من جور الزمان انجح واجيب ليكم نمر
علي مااعتقد دي بدايات حميد
طعم الدروس
وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
يا يمة حان الامتحان
من وقتو بس فاضل شهر
ما اظنِي من جور الزمان
انجح واجيب ليكم نمر
وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
كيف زاتي يا نبع الحنان
انجح من الام السهر
عمرك سمعتيلك جبان
خاض المعارك وانتصر
زينوبة كل ما افتح كتاب
القاك في اول سطر
القى الجداول والصحاب
القى الجناين والتمر
في الحصة عقلى انا قام سدر
يمه المدرس لو فكر
كان يلقى قاعد فوق ككر
في الدونكا لسع ما فطر
يسمع كليمة يا عشاى
واغلى الحكم عند الضجر
انا قلبي كلو على جناي
وقلب جنايا على حجر
والله مش لو كان نهر
لو كالني بسيطان بقر
ما دام عقيل الجن سدر
ما اظنو من عندك حضر
بذاتو ابوى تلقاهو قام
فاتح كتابو مع الفجر
يقرأ ويرتل في كلام
ما بفهمو الناس الكفر
زينوبة كر من حالى كر
قاعد لى فوق كيمان جمر
غربة وكمان حالاً فقر
عذبني قبل اصل القبر
الشوق متل شوك الكتر
طعن الجسم لمن خدر
والله لو ما بنقبل
ما كان بفارقك بي شبر
زينوبة دنيا الاغتراب
خلتني زي ورق الشدر
انحت من عدم الشراب
عم الاراضى وانتشر
الغربة اصلوا طعيمة مر
لكني بعقد بالجبر
لمن سنين الهم تمر
يا ربي الهمني الصبر
...................................................................................
وبعد وصوله للعاصمة وفي رسالة لوالده قال
كان رجعت اديني فاضي يابا ماراح تبقي راضي
وختم تلك القصيدة الرائعة بان العرجا قالت ماحترجع لى مراحا
ياله من موقف جديد وقوي ضد التقاليد التي لاتقدم انه متمرد من نوع جديد
إن رجع وايدني فاضي
إن رجع وايدني فاضي
يابا ما راح تبقي راضي
والبلد ما بتبقي راضي
ونفسي ماراح تبقي راضي
والنخيل الكان بشابي
يهش ينادي يصد يقبل مني غادي
والدروب الكان بتفتح ضفتين
احضانها نادي
عليها اه تسب خطايا
تكب ترابها علي قفايا
تقوم تعتر لي جوادي
والقلوب الكان بتفرح
تكشح الشوق في الايادي
جيتي ليها بلا ابتسامة
تبقي زي جيت الغمامة
للاراضي الغبشة فاضي
با نخل ياطين سلام
يا غلب في المغربية
لما تتزمر صبية والا حبوبةً قبيلك
باركة لي امي الشهادي
في التراب الراجي لي
تنقلب بي شد علي
وتنكسر قدر الولادي
يا غلب لو عدت فاضي
للغمت في ايدي موادع
او عصر حق الزوادي
يا بحر مابي الزيادي
يانخل ياطين سلام
ياضراع في التقله يكدح
يامدارس ياحدادي
ياغبش صر ياغلابة
يامقاطيعاً في وادي
وضالتن ضلت في وادي
وداي كفرن فيني شعوت
خيل قراطيسي ومدادي
من مداين غيمة دافق
نيل سلام يروي البوادي
او يبل ريق امي يمة
شوقي جاي اشواقي غادي
مشتهيكن نشتهيكن
في صهاري ايامي يلمع
في ضلاما يبق وشيكم
وفي خطاوي الناس بفتش
لو اصادف يوم مشيكم
وحد ما اعاين في عيونن
ما الاقي متل عيونكم
وغربل الالوان وحاتكم
ما لقيت يا يمة لونكم
ما انتو لونكم لون بلدنا
لون جناينا لون سماها
لون ترابا و لون نخيلا
لون قماريها وهديلا
وضفتينا الماسكا نيلا
وبينا هادر زي مسيره
انتو صوتكم صوت بلدنا
صوت تواريخا وضميرا
وصرختو الدواية العزيرة
وباقي زي نار الهجاير في حطب
غابة الظهيرة
حس شروقا الفي عروقا
حس جداولها في شتيلا
حس بهايما في المغارب
و النسيمات الهميلا
حس وليداتا وغناهن
فوق عميرن ليله ليلا
يسالو القمر النجميات
عن شيليلا ويا شليلا
يا شليل ما شف بطانا
هد ظلم الدنيا حيلا
يجروا عاجين الشوارع
واحليلي ويا حليلا
ياحليلكم بشتهيكم
انسي وارجع بشتهيكم
إلا عاد كيفن بجيكم
وماني شايل الجيت عشانو
عشانو فارق ضو عينكم
عايز اقولك بي صراحة
من وصّل ما جاتني راحه
جاري فوق الفوق افتش
للشغل ما سبت ساحة
كم برد جا إتغت بي
وكم هجير سواني واحة
كم شمس صحيتا قامت
ما لقت فردة جناحا
والرياح باليل تعافر
تورت في الذات جراحا
وكان حبيت العرجي قالت
ما ح ترجع لي مراحا
في بحر ممسوح مأسي
شاقي تحلم بالمراسي
ما الشغل يا يمة قاسي
الفراغ يايمة قاتل
في انتظار ما عندو رحم
وكل شي بيناتو زحمة
البرد يايمة كافر
وصيف غريب ماضاقلو نسمة
وكم بطون احلاما لقمة
وكم بيوتا انوارا ضلمة
ياني زيك بينا يودر
بالو يضهب ضمة ضمة
يما يتعب حالو يصعب
ما المعايش قاسي يمة
يابا يالكدح المضارع
ياوتر نغم الطواري
المدن شرقت غناي
توكت صوت الغفاري
وادت اولاد الحرام
الكرابيج و الامارة
ميضنة جامعنا تنقز
ما تصل كتف العمارة
أن دعت الحضارة والرياح
بيها تتعوز حصن النفس الابية
وارخي اضانك يابا لي
ساعة اقولك بباسطة
هنا الشغل داير وساطة
ومن وسيط قاموسي خالي
والمكاتب من تشوفني
تصفد البابين قبالي
ما اتملت بي الفيها فاضت
وما غريب مالا ملي
وما حارجع يابا لالا
لا حاهاجر الا تالا
نجمتين خاتك في بالا
نجمة للخير والجمال
واحدة للحق والعدالة
ما انت عارف اني حالف
بالكسالى المو كسالى
بابتهالات العطاله
بجريهم في هجاير بقت النار من رمالا
بالبلد بى الشالو شيلن
وفي وجيعتا وقالوا لا لا
بانتظاركم طول نهاركم
شرقت الشمس وزوالا
بالصغار المرة تفتل
ومرة تجلب في حبالا
وبالايادى الياما شادت
ناقشا عزتا بالزباله
بكنايسنا اليتيمة
وكوم جوامعنا الثكالى
وبي مدارسنا العليهم
دقت اجراس الدلالة
بي جدودنا الماتو ساكت
يابا بالضايعين همالا
بي تميراتن تضاددي
لاحيت لا موتا شالا
بي مشاريعنا البتحلم
زي عوانس
راجية يوم جية رجالا
بي خضارنا القام مهضلم
عينو موية النيل قبالا
بي بكية اختي البترضع
والضياع واقف قبالا
بي تويب امي المفضل
خير وشر ساتربو حالا
بنكرب يايابا واصبر
رغم انها ماها حالا
رغم انفك يا عوارض
يا تفاهات ياسفالة
ما ح اركع ما ح اسجد
ما ح اعبد للخمالة
وبنكرب يا انتو واصبر
رغم انها ماها حالا
وكان حفاير الصبر قلت
في الضلوع بحفر دالة
***********
حميد لايبكي الواقع فقط بل يقدم لنا روشتة للخروج دائماً مايقترح الحلول والامثلة كثيرة وساوردها لاحقاً لانني كتبت هذه المداخلة علي عجل
دائماً ما يفخر بالغلابة والمتمسكين بجذورهم ويفاخر بهم ويتغني بمعاناتهم
..........................................................................................
تعال قص البلد وارجع
تعال قص البلد وارجع
تعال ادي الغبش طلة
بقالا اليل غطى ومقنع
سترتك يا صباح الله
ضراعك مدو لي رضع
ضروع اماتا قطن قط
مراكب شوفا لا مشرع
ولا بان في مداين شط
تعال يا شافي يا كافي
شموخاً في زمن منحط
من الفي تعال بجي المافي
معاك وهطنا نتوهط
تعالنا نحن من شفع
نفك الحيرة بي حيرة
متين ما الليل نصن
نسمع وراء الاهات غلب نوره
ابوى قالولنا جيبن ده
صباحات الله بخيرها
تويب امي الزمن هدا
صباحات الله بخيرها
وصباحات الله لاقيتا
لا كراسا لا قلما
صباحات الله لاقيتا
ململم في العيون الما
صباحات الله لاقيتا
تجود في الضحى وتضفر
صباحات الله لاقيتا
تليس في شقوق بيتا
صباحات الله لاقيتا
اكان لاقيتا في مشرع
محل لاقيتا تنذمر
مكان خليتا تتوجع
اكان لاقيتا في مستشفى
في طندايا جامع سوق
محطة ملمة اكان في بيتا أو مصنع
محل لاقيتا تنذمر
مكان خليتا تتوجع
تكد تكدح تباصر كم رجاء اتقطع
ابت تطلع طلع خازوق
خوازيق البلد زادت
طلع نمراً وراهو ضباع
وضاع ما ضاع
وكان ما كان
طلع خازوق
يفيض النيل نحيض نحن
يظل حال البلد واقف تقع محنة
طلع خازوق
خوازيق البلد زادت
سالت عليها
مشيت ومشيت
مشيت خشيت على حلة
لاقيت شعاع ضال
من ضو صباح الله
لاقيت شعاع اسمر
قاعدلو فوق بنبر
كابي المرس يسكر
قنبت جنبو معا
دار الحديث ما دار
حدثني بحرقة
حبيتا من جواي
حبيتا حبيتا
في الحلوة والمرات
شايلا القداحا معاي
ادتني واديتا
حبيتا حبيتا
في يوم من الايام
هلوست مع الفجاج
هلوست دون احلام
من دكة الحجاج
ضلوا الشمس ريحين
واحد عماك يا ام زين
والتانى شالك وطار
باعوني للفرقة
ملعون ابو الدولار
ان الشعاع الضال
انينا انينا
غنا الشعاع الضال
صنينا صنينا
غنالي بحرقة
غنالى يا هاجر
عقبت يا باكر
قاطعني يا هاجر
رددت يا هاكر
في الضلمة اولادك
في الفيها طول اليوم
لازادا لازادك
يا مرمى لا ضل بيت
لا ارث من اجدادك
يلا وجراحاتك
طحلب ضلام الليل
دهده صباحاتك
السولبك خلاك
برد الخمور مفتون
في افقر وضع ختاك
فاجر وسخ مافون
يلا وهياك يلا
لا عن صباح الله
صبح الغنا الميمون
صن الشعاع الضال
غنا الشعاع الضال
ما صن غنا وقال
يا هاجر التسعى
بين الوطن والبال
باب الفجر بفتح
فتح القلب موال
فتح اللبق في الصيف
تالا الشتل تربال
باب الفجر بفتح
يا وضع يا دجال
باب الفجر بفتح
عند دقة الرجال
غنا الشعاع الطال
غنينا طلنا سوى
شال النغم عتال
بايتين عيالو قوى
باكرنا سترة حال
ياكر رغيف وروى
باكرنا بقة فال
باكر كتاب ودوا
باكرنا للاجيال
ينشر نور وهوا
لا تلاقي فيهو وبال
لاهم بعاد لاجوى
باكرنا يا ضلال
لسع بلال ما زال
وما دام بلال لسع
على الرمضا وهجير يلسع
ما دام في اطفال بتتوجع
صباحات الله يا بيضا
لحيحة نوره لاهسع
فجيعة يا نوره يا فقرا
ترف من شدره لشدره
تلف الدنيا كايسلكم
صباحاتو ما انتو
بقوا من الارض مطره
تعالى وشى الوطن دركان
عساكر اخر الزمن واطه
تعالى وما على كيفك
تعالى وريحي الواطه
بلدنا أن جيتي دي الكوكب
تعالي من اليسار شمساً
تشرق الغربوا المركب
تغربي يا غرب يا باني الكلب
يا تجار الموت والرعب
لو ريح ليلكم طف الصحوة
نسل الصحوة في جوف الشعب
بق وضو نواحى الدرب التالا الفجر
الوطن القلب
القلب الشايلك وما ختاك
وكان ختاك ابداً ما خطاك
بس يا نوره الصاح و الصبر
لمي معانا قطنة البدري
نغزل منها كفن الليل
ننسج منها توب الفجر
فجر تكسو محنتو الفقرا
من التعب البلا صالح
يجبد الكدح الاجرا
يلا بوليس بلا اجرا
شنو الخايفينلو يا فقرا
بيوتا جنها المطره
دقيقاً ما يفك الريق
سمكة مافي في بحرا
شنو الخايفينلو يا فقرا
شديراتن بقت حطبها
تمرة ما تفك طلبها
شنو الخايفينلو يا فقرا
بهيماتاً تسوى الميع
مغبش كالترب بصرا
شنو الخايفينلو يا فقرا
كلبةً لا قلب لا حيل
وهوت في شبح فوق خيل
كان يتداعر اخر الليل
نجرت والشبح حدرها
صدت للصريف فى ترى
كان صوت الرصاص قفرها
انت والخلق نايمين
صنت والخلق نايمين
عفنت البلد يومين
كلب العمدة جاب خبرا
شنو الخايفينلو يا فقرا
شنو الداخرنو في متره
ابو الاربل لابو الواسوق ابو المحرات
وساقية تسوق لابو بقرا
يا بقر السواقي السايقى للامرا
شنو الخايفينلو يا فقرا
ابو البوليس اذا ما كان
اباتم من طرف فقرا
يحرسوا القصر للتلفان
وللفي الليل زنى ودعره
ويقوموا مع النهار وزراء
ابو اذا ما كان اراضيهم
يبس شدرا
يحرسوا طلمبة الجازولين
يقيفوا على الينوك غفرا
اذا ما الشارع استنفر
غبش عزل بستنكر
على القيصر خساستو
تقول للغيم محل مطر
قراب منك دالفينك
يضم صدر الوطن حاني
يهز للظلم ساساتو
تحن لباكر الاخضر
يعم بخيرو ناساتو
تنادى الفارس الاسمر
تطالب بي قصاصاتو
من الفجار من العسكر
ابو البوليس اذا فكر
يفك فيهم رصاصاتو
ايابوليس يا نازل من المريخ
جباة الدم من التاريخ
أيا واقفهم كالسيخ
تقيفلنا لامتين دغري
حقارتك تبقى فى فقرا
فضيحة فجيعة يا بوليس
وجايين من فرد شدرا
جنانا العاق متين تصحى
تشوف الحاصل المذري
متين تدري
يانو الصوت ده ما مكري
معتق للوطن دغري
و بانو الجاري
ما منك
على صدر الوطن يجري
وخطاهو التيربت
بس قدرها
تلاقى الفجر والفقرا
...........
|
|
 
|
|
|
|
|
| العنوان |
الكاتب |
Date |
 حميد ثروه الشعر وثورته....او محاوله لفك طلاسم حميد | فيصل عباس | 04-24-06, 03:13 AM |
| Re: حميد ثروه الشعر وثورته....او محاوله لفك طلاسم حميد | احمد العربي | 04-24-06, 03:22 AM |
| Re: حميد ثروه الشعر وثورته....او محاوله لفك طلاسم حميد | فيصل عباس | 04-24-06, 01:37 PM |
| Re: حميد ثروه الشعر وثورته....او محاوله لفك طلاسم حميد | ابو يسرا | 04-24-06, 03:30 AM |
| Re: حميد ثروه الشعر وثورته....او محاوله لفك طلاسم حميد | فيصل عباس | 04-24-06, 01:50 PM |
| Re: حميد ثروه الشعر وثورته....او محاوله لفك طلاسم حميد | banadieha | 04-24-06, 03:42 AM |
| Re: حميد ثروه الشعر وثورته....او محاوله لفك طلاسم حميد | Mohamed Abdelgaleel | 04-24-06, 04:00 AM |
| Re: حميد ثروه الشعر وثورته....او محاوله لفك طلاسم حميد | عبدالكريم الامين احمد | 04-24-06, 02:29 PM |
| Re: حميد ثروه الشعر وثورته....او محاوله لفك طلاسم حميد | فيصل عباس | 04-26-06, 02:27 AM |
| Re: حميد ثروه الشعر وثورته....او محاوله لفك طلاسم حميد | Masoud | 04-24-06, 02:33 PM |
| Re: حميد ثروه الشعر وثورته....او محاوله لفك طلاسم حميد | ابو يسرا | 04-25-06, 04:38 AM |
 Re: حميد ثروه الشعر وثورته....او محاوله لفك طلاسم حميد | Tabaldina | 04-26-06, 04:54 AM |
| Re: حميد ثروه الشعر وثورته....او محاوله لفك طلاسم حميد | عبدالغني كرم الله بشير | 04-26-06, 06:09 AM |
| Re: حميد ثروه الشعر وثورته....او محاوله لفك طلاسم حميد | ابو يسرا | 04-27-06, 02:23 AM |
| Re: حميد ثروه الشعر وثورته....او محاوله لفك طلاسم حميد | Aisha Hommaida | 04-27-06, 05:27 AM |
| Re: حميد ثروه الشعر وثورته....او محاوله لفك طلاسم حميد | مدثر ابراهيم سعيد | 04-27-06, 09:02 AM |
| Re: حميد ثروه الشعر وثورته....او محاوله لفك طلاسم حميد | محمد سنى دفع الله | 04-28-06, 03:25 PM |
| Re: حميد ثروه الشعر وثورته....او محاوله لفك طلاسم حميد | ابو يسرا | 04-30-06, 04:07 AM |
| Re: حميد ثروه الشعر وثورته....او محاوله لفك طلاسم حميد | Elkhawad | 04-30-06, 05:50 AM |
| Re: حميد ثروه الشعر وثورته....او محاوله لفك طلاسم حميد | معتصم الطاهر | 04-30-06, 06:10 AM |
| Re: حميد ثروه الشعر وثورته....او محاوله لفك طلاسم حميد | حمزاوي | 05-01-06, 00:46 AM |
| Re: حميد ثروه الشعر وثورته....او محاوله لفك طلاسم حميد | فيصل عباس | 05-02-06, 02:45 AM |
| Re: حميد ثروه الشعر وثورته....او محاوله لفك طلاسم حميد | ابو يسرا | 05-02-06, 05:09 AM |
| Re: حميد ثروه الشعر وثورته....او محاوله لفك طلاسم حميد | فيصل عباس | 05-04-06, 11:43 AM |
| Re: حميد ثروه الشعر وثورته....او محاوله لفك طلاسم حميد | ابو يسرا | 05-06-06, 02:19 AM |
|
| |
ابو يسرا
فيس بوك
تويتر
انستقرام
يوتيوب
بنتيريست