|
Re: في ناس كتار معترضين على بوستات الكورة.!!! (Re: سامى عبد الوهاب مكى)
|
حبيبنا سامي : كالعادة بجيك ناطي اول زول تلللللللبت ..
Quote: لكنه بصراحة موقف كثير من شعوب العالم التي كان متنفسها الوحيد في الرياضة بغض النظر عن مستواها!! |
والما مصدق الكلام ده يدخل الإستاد .. تعرف يا سامي المتنفس الوحيد في السودان كلللللللللللو هو الإستاد .. المتشاكل مع مرتو بيجي يخش الكورة وكل مشاكلو العائلية يكبها ليك في الإستاد .. العليهو ديون بيجي ينساها في الإستاد .. الجنهم سياسة بيجوا يخشو الإستاد .. وانت واقف في المساطب الشعبية بي يمينك بيكون واقف زول محترم لافي العمة حسين خوجلي وبيدخن في البينسون وبي شمالك بيكون واقف واحد شايل علبة الأورنيش وبيشم في السلسيون وانتو التلاتة بتضحكوا وتتونسوا في نفس الموضوع وتنططوا نفس النطة تفرحوا للقون وتنبزوا اللاعبين تنظروا وتتفلسفوا بلا رقيب ... وانا داخل الكورة يا سامي بكون شايل تيرمس الشاي وربطة القصب والكريستال والفول المدمس والله التقول ماشي لي رحلة .. واول ما تقعد في الكرسي تلقا الناس الجمبك كلهم ما بتعرفهم وفي اقل من دقيقة تلقا نفسك تبادلت معهم اطراف الحديث .. ده يديك تسالي وده تمد ليهو كباية الشاي وداك يقول ليك لو سمحت الموية دي ورابع يحلف عليك طلاق عشان تشيل ليك سندويتش .. والله يا سامي ما حصل دخلت الإستاد وطلعت مغموم حتى لو الهلال مغلوب .. الناس الهنا ديل ما اظنهم خشوا دار الرياضة وشافو عمك علي وهو بيوزع في التسالي للجمهور .. الناس الهنا ديل ما اظن شافوا خريستو وهو ماسك الجريدة مقلوبة وبيقرا للجمهور.. الناس الهنا ديل ما اظنهم شافو كمال افرو ورواد الدار .. الناس الهنا ديل ما سمعوا إسحق اب قرن ولا شافو فرقة الهلال .. الكورة البيكرهوها دي قمة التسامح والإخاء .... يتساوى فيها الغني والفقير والمسلم والمسيحي والشيوعي والكوز ... تكون في المكتب اكتر زول جادي ومدير كبييييييييييير تدخل الإستاد تنطط زي الأهبل اي كلمة تجي علي لسانك مسموح بيها داخل الإستاد تتنفس جوة الإستاد كل عكر الدنيا الكان برة .. والله يا سامي شفت نتغلب عشرة من مصر يدونا خمسة التوانسة الفريق القومي يتغلب من جزر القمر الكورة دي ما بنخليها ..
تخريمة : الناس الهنا ديل يا سامي ما اظنهم حضروا لمن المريخ شال كاس مانديلا والمرحوم الضو حجوج ضبح الجمل في نص ظلط الاربعين للجمهور اللي جاهو ساير من العرضة جنوب والبيت كان مفتوح لي اي زول ... ولا حضروا تأهل الهلال للنهائي والسيرة البي الرجلين من اطراف العاصمة حتى الوصول للإستاد والسهرة حتى الصباح ...
|
|
|
|
|
|
|
|
|