|
|
 Re: كـم أنــا حزين ... غـادرت روشــســتر مينيســوتا (Re: خالد الأيوبي)
|
تعرف يا خالد ، بالأمس كنت قاعد في قعده ( هلس على خفيف ) ،
وبعدين جات السيره .. سألت صديق جزائري كان معانا ، بعد ما
يخلص من مدة إنتدابو هيعمل شنو ؟
قال لي : هروح لى بلد تانيه !
قلت له أني لم أعمل من قبل بالسلك الدبلوماسي ولا في التربية
والتعليم ولا في السكه حديد ، لكني أعرف تماماً ألم الإنتقال ..
إنه ألم عميق وموجع ... إنه إنتزاع ، بعد أن تكون خلقت علاقاتك
وكونت شبكه عصبية مع المكان وترعرعت في قلبك عاطفة ومحبة
تجاه الناس والمحيط ..
أنا مريت بالتجربة دي اربع مرات ، إنتقلت نقلات كبيره :
من ألمانيا للسودان ( حلة خوجلي ) ؛ ومن السودان للإسكندرية ؛
ومن الإسكندرية للقاهرة ؛ ومن القاهرة للسودان ( تاني ) ..
كل مره كنت بغادر مكان ، كانت روحي بتتحز حز .. بسيب وراي
بيت وعيون جيران حفظت بصماتها ، وكفوف صاحبت كفاي خطوطها
الداخلية ، وبنات أعرف مواعيد غيابهن وإيابهن ، وطرقات درست مزاجها
بدربة ..
والمهم كمان الباب !! الباب الطيب الصابر ، الذي أدخل وأطلع منه
كل يوم وظهيرة ومساء .. الباب الذي لا يمل حين اخرج وأجيهو راجع
بعد ثواني لأني نسيت حاجه جوه ..
تترك كل هذا ، وتترك الباب وتغادر !!
يا الله ..
عشان كده علاقتي مع المكان بقت حذره جداً وخفيفة (Light ) عشان الروح ..
وعشان أحافظ على طاقتي النفسية ..
الآن بقيت برتاح في الشارع وأنا ماشي ، أو في القطر أو الطياره
أو وأنا سايق العربية ..
حالة الـ( لا مكان ) دي صبحت بتريحني ، بتخليني أشعر بالحرية
وعدم الإرتباط ، والقدره على المناوره وإتخاذ القرار ..
ربك يديم المعروف يا خالد ويجعلو عامر ..
...
طلال
|
|
 
|
|
|
|
Bannaga ELias
فيس بوك
تويتر
انستقرام
يوتيوب
بنتيريست