|
Re: بين أثينا القديمة و دنقلا العجوز أواصر و صلات ! (Re: Elmuez)
|
بالنسبة للبروف مارتن برنال او سفرو الضخم، Black Athena، علينا ان نعي جدا، الزول ده جايي من وين، عشان مانعرف هو ماشي علي وين؟
غالبيتنا بتقبل علي قراءة كتب التاريخ، بحسن نية شديدة، اوتسليم اشد بي ظاهر الكلام والطرح، منزوع نزع من سياق واقع صراع الافيال الضاري بين المدرسة الافريقية ومدرسة المركزية الاوربية.
عشان كده، بالنسبة لي كعسكري نفر في المدرسة الافريقية، اهم جزء في اسهام مارتن برنال، ما حقيقة اثينا السودانية، وانما تسليطو الضوء علي خفايا الصراع داخل مدرسة المركزية الاوربية، او تعريتو لي مااسماه بالنموزج الاري، او نزعة الاوربيين العنصرية، كمامجسدة في الصياغة الحالية لي تاريخ العالم، وتاريخ افريقيا تحديدا.
الدرس هنا، مافي حاجة اسمها حياد، او موضوعية، اوصرامة علمية بالمعني المباشر والمطلق للمفردات دي، في ساحات الدواس العلمي من اجل الهيمنة علي وعي الشعوب، بالهيمنة علي صياغة تاريخ هذه الشعوب، بواسطة السيادة الاوربية الحالية علي العالم.
نجي لي سؤال بروف مارتن بارنال، جاي من وين؟ عشان نعرف هو ماشي علي وين؟
..نواصل.
|
|
|
|
|
|