الى ابن النخيل MBBS., MD., MSc., PhD العالم الدكتور الأستاذ المساعد single man
لك التحية
بلاغ من الباب وقفنا إجلالا للعالم وكنا عشم انو الجلباب والقفطان العلمى يبهرنا بنظرية في الطب او العلوم حتى لو من بغداد
لكن تحذيرك تحذير زول شال خاشي فى منبر وعندو راى مسبق كلامك كلام زول طائفي والعلم علم مهنة وطبعا استغرب لزول علمى يكون متمسك بمداخلة غير علمية وتنظير ممعن فى التبسيط، او حاجة ذى ما كانوا بقولو زمن نميرى انو فى شيوعى غرق وطلع فى جزيرة او سؤال قال فى حكومة فانا معارض.... وكأنك تداخل فى حلبة نقاش .. ولقيت فى اراء مختلفة... وقبلما تعرف الحاصل شنو........ قمت قلت انا رأى كده وده مشكلة المتعلمين السودانيين... يعنى الشهادات العلمية ما بتطور ابدا فى منهج التعامل.... اتخل انك فى اجتماع نقابة او اجتماع مجلس علمى.. تلقى الواحد رافع يدوه وفى واحد بتكلم... او ذى مستر نقطة نظام بتاع الجمعية التأسيسة قبلما واحد.... يخلص من كلامو... فى واحد عندو رأى.. المهم نحن لم نتعلم فن الاستماع..
وداء السوداء فى متعلميه وحملت الشهادات العلمية ولقد برع المشير الدكتاتور نميرى فى مرمقة هذه الفئة وجعلها الحاشية الطيعة التى دمرت البلد...... ولعلمك يا دكتور ... احسن وزير زراعة مر على الوزارة هو المجرم ابو القاسم محمد ابراهيم واحسن وزير صحة مر على وزارة الصحة هو المناضل المزارع الامين محمد الامين حتى بروفسير ابو حريرة المشهود ليه انحنى للطائفية لحظة المسالة سخنت.....
المهم بالدارجى وانا لغتى تعبانه..لانى نوبى... وخريج ابتدائى... بحصل لى حالة امتعاض لمن واحد يكون نال قدر من التعليم وما قادر يحدد موقف فى المسألة الوطنية.. اليسار ما مطلق ولا اليمين مطلق لكن الوسط لون هلامى وموقف انتهازى ولا رائحة له ولا لون .. وبما انك داير تخش الحلبة السياسية .. وتتناقش فى مسألة وطن اخير تكون محدد موقف القضايا اتفرزت حتى مولانا محمد عثمان بقى رئيس التجمع وموقفو يسارى اكتر من الحزب الشيوعى ومتاعون ومتفق مع د. قرنق ........ وبعدين شهداء الفكر اعتز بالاستاذ محمود محمد طه لكن ما قبلوا فى شهداء ضحوا يالنفس والنفيس ما فى مسالة دينية ولكن فى مسألة الديموقراطية... وين عبد الخالق المحجوب الشايقى يا ابن عوف وين الشفيع احمد الشيخ وجوزيف قرنق........... ولا ديل فطايس يا بروف.............
وبالمناسبة انا فى البورد ده من يوم اتعمل فينا الكوز والمستقل والشيوعي والما عندوه شئ فى السياسة.. نتلم نختلف ولكن نحترم بعض بدون راى مسبق وكل يوم بنتعلم من بعض درس فى الوطنية .. والتعامل الراقى بحسن الاستماع.. والاحترام....
لكن من عنوان البوست الى التافصيل وكأنك مدفوع بموقف مسبق.. وهذا لا يناسب مع مكانتك العلمية....... واتذكر مداخلة عن د. عمر القراى وراى اهل البورد فى رده المشروط مرحبا بينا يا ابن النخيل يا ابن عوف .... وهن الكتوف بتتلاحق وكلنا سوى الفرز بالعطاء والفكر والاحترام...... وبعدين داير اقول ليك قصة انا فى امريكا اتخيل البلد دى علمتنا انو الشهادات العلمية حاجة شخصية nobody care اذا انت دكتور ولا خريج خلوه..... وبعدين فى دكاترة شاغلين سواقين بتسا.. ومنهم منذ ان وطأت قدماه ارض المهجر لم يمارس مهنته وبرضو لسعه دكاتره ونبجلهم بالالقاب...... ولا تتنابذوا بالالقاب مرحب بيك تعال يا بروفprof خلى الساحة مكان تواصل ونقاش فى مواضيع مختلفة تتمدد من الخاص الى العام بدون ........ رفع السيف
وسلام ما بعرفك لكن متخيلك صلاح شريف مواطن سودانى يسارى وشيوعى ونوبى وشين وبكره اللون الرمادى والموقف التوفيقى فى مسألة الوطن الذى يستغيث
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
sharnobi
فيس بوك
تويتر
انستقرام
يوتيوب
بنتيريست