ياخي ضحكتني لمن قربت اتفلسف ليك في شغلانة (المدح بما يشبه الذم) لكن خفت شبهة العروبية الشديدة ديك ، خسوسا مع مزاج امسودان اليومين ديل..قاعدين على الهبشة ..حكامة تقول ليك (جعلي امو جموعية) وعينك ما تشوف الإ النور..ياخ المتسبل ذاتو بقى بتبكيهو حاجة اخف من الريشة..!!!!
عارف يا احمد ، زمان ايام الشباب (طبعا يعني قبل شوية ، نحن لسع شباب بدري يا عم ، وعين الحسود فيها عود وكمنجة ذاتو..ولو في طريقة جيتار وطرمبة كمان..!!)..كتبت لي نص اسمو (يا حلوة يا بت الحرام)..جيت طابقة ورقة الكراس المسطرة ديك..واشيل واتشرشح لمن واحدة لذيذة بت لذينا ختفت ليك الورقة..وقعدنا في المساومة: على بالحلال يا كبر ما ارجع ليك الورقة دي الإ تقول انا ياها الحلوة بت الحرام..! قلت ليها: عاجبك تطلعي بت حرام يعني؟ قالت لي: في شان الحتة دي..امي مريم يااااااااااااااااااااااااااااخ.. (لول الله يسترنا من المطاوعية: يا ناس هوي ده كلام الزولة بي ضبانتو مش كلامي انا..!!)..
اها ، هي طشت الطشة الياها (ومعاها الوريقة) وانا طشيت الطشة الياها لمن بقيت مصاقر الجليد واشياء اخر ياااااااخ..!
الطريفة يا احمد..لغاية البوست بتاعك ده كنت قايلها غنية واحدة والعالم بتتجدع بيها زي ما تدور..ولكن..!
اللحظة فقط اكتشتفتها انها تلاتة اعمال ، من اميز الأشغال الرومانسية في امسودان..
اهديك الشغل الذي اعتبره الأساس الذي مرقت منو بقية الحاجات..
منى الخير: تخاصم يوم ، وتصالح يوم..
متذكر متين اخر مرة سمعت الصوت ده يا احمد؟
ياخي حقو نرجع نمجد الشلوخ..يمكن يرجع لينا رحمن الذات..!
التانية ، تتفتشها بي طريقتك..صالح الضي( دلال)..والتالتة ، برضك تفتشها بي نفسك .. ابراهيم حسين ، يتخيل لي اسمها (عتاب)..يخاصم يوم ، ويرجع يعاتبنا..!! أو كما قال..!
كتر خيرك يا صديقي..الفكرك ما حقرك تب..!!
يتخيل لي يا حبيب ظلمت: الموصلي ، عزيز ، ناذر الخليفة..وبريمة..!..ياخي نحن نطول؟..
شكرا يا صاحب..ذكرتني صديقات واصدقاء..كانوا بيقروا كبر بطريقة عجيبة ومدهشة..والمحزن، زولك خذلهم كتير وكتير..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة