تراجي مصطفى ... والكذب على الأنساب

Quote: محمد عيسي بن صالح البديري المشهور بسوار الدهب وقد أخذ منه العلم الشيخ عبدالله الأغبش والد الغبش والفقيه ابو سنينه نصر الترجمي والفقيه عبدالرحمن والد الشيخ خوجلي ومن أصحابه الشيخ عووضة شكال القارح وقد كان في زمن الملك بادي أبورباط وهو الحادي عشر من ملوك الفونج وكان بمنطقة دنقلا والده الشيخ عيسي صالح البديري تفقه علي الشيخ عبدالرحمن بن جابر ابنه حلالي أمه بنت الملك حسن ولد كشكش ملك دنقلا الشيخ زياد بن النور ابن الشيخ محمد عبسي وكان في منطقة دنقلا العجوز وتشتهر المنطقة بقباب الصالحين (تسعة و تسعين قبب والمائة سوارالدهب)

Quote: الدم الآري قبل ٣٠ جيل

أوكي؛ قول الجيل في ٢٠ سنة (ناس زمان ديل بعرسو بدري وبموتو بدري)
اضرب ٣٠×٢٠ يطلع حسابك ٦٠٠ سنة زايد ناقص الانحرافات المتوقعة احصائيا وغيرها
قول ٥٥٠ إلى ٦٥٠ سنة .. يعني أطرح من ٢٠١٨ بتطلع معاك من سنة ١٣٦٨ إلى سنة ١٤٦٨ بالميلادي
قول حساباتك غلت ومحتاج تجبر شوية كسور خليها حوالي سنة ١٤٢٠ ميلادي
تطلع معاك على ايام تكامل زوال مملكة المــقرة واتمام عبدالله برشمبو للتحول المؤسسي إلى الإسلام وتأكيد صعود نجم الدولة الكنزية ودا من جهة الصعيد أما من جهة السافل فهو في آخر زمن المماليك البحرية وأول وقت المماليك البرجية التي تلت الدولة الأيوبية في نهايات وبعد الحروب الصليبية التي اشتركت فيها أقوام جيرمانية.. المماليك ديل زاتم احتمال كبير يكون فيهم عدد كبير من حملة الجينات الجرمانية التيوتونية الوندالية الغوطية.. وهو أيضا زمن هجرات العرب المطاردين من مصر وبعضهم سكوهم المغول كانوا جايين من الشام وأبعد ويمكن كان فيهم أوروبيين خالطوهم في ظروف الوقت ما حول وبعد الحروب الصلبية..
المهم يعني الأرض كانت فايرة بالتحولات الكبرى ومتروسة بالناس حملة الجينات والماركات القلتو عليها دي.. في أي زول كان متوقع بني هلال وسليم يخلو أشغال العصابات في نجد ويمرقوا في سياحة قرنية من العراق للشام لمصر لتونس الخضرا وحتى أم صفقا عراض في برام الكلكة ورهيد البردي؟ وحتى واحدن منهم بقولولو أحمد المعقور أصهر في التنجر وأسس دولة الكيرا في دارفور.. الشديد القوي المرق أبوزيد ياهو المرق الألماني والاغريقي والفرنسي والليتواني وغيرهم.. ويا زول كل شيء وارد حتى الاحتمال الروائي الكنا بنقول إنواحتمال سحري وما فوق واقعي بتاع الطيب صالح (لنفس المجتمع البتكلم عنو دا) عن الزول الأبيض الغريب الأسمو بندر شاه وحفيده ضو البيت، برضو ممكن يكون مما حفظته الذاكرة الجمعية في تلافيفها الغير واعية فأسطرته متحولا ومتبدلا عن أصل شبيه به قد حدث في الواقع التاريخي.. وزي ما قلت ليك أي شيء وارد في دنيا العجايب دي لكن المهـــم: حسب حسابات الجيل الفوق دي فحسابات الماركر الجيني تبع كمال شكلها منطقية جدا ويمكن تكون مظبوطة.. وما غريب إلا الشيطان..

خريطة بحدود ونفوذ دولة المماليك البحرية في حوالي الوقت داك...

++++
يا كمال، بعيدا عن الماركر ابو ثلاثين جيل دا، انت شكلك سواردهبابي وشاويشابي عدلانابي في آن معا.. طبعا بأصول جينية (كوشية) في كل الأحوال ولكن تختزلها أنت فتسميها جينات (نوبية).. والنوبية قد تكون بعضها وليس كلها.. هل فكرت أن ربما يكون هذا الماركر الجيرماني قد أتاكم عبر هذه الأصول (النوبية) بالذات؟ هل سمعت (بالمجراب) مثلا؟ مش حالتهم فيها إشارة لنوع من الاتصال الأوروبي ويمكن يكون جيرماني برضو؟ لو تابعت بعض ما يقال عن أصل للنوبيين في الشمال الصحراوي الليبي القريب من أوروبا أيضا فهنا احتمال أخر.. الفكرة شنو؟ حاول تتوسع بتأويلاتك إلى ما حول وبعد الحروب الصليبية.. بل حتى إلى ممكنات مافوق واقعية أو سحرية كما شرحتها روايات (قريبك) الطيب صالح..
حتى كلام آمنة مختار عن الوندال والجيرمان الذين اسقطوا الامبراطورية الرومانية ما تستبعدوا.. الرومان كانوا في المنطقة دي طويلا حينما كانت كل شعوب الجيرمان (رقيقا) لهم، وربما اصطحبوهم من الصقيع قريبا من الصقيعة.. الدنيا دبنقا ودوارة!!
لكن، خليك وخلينا من كلام الونسات دا هسع، وخلي بالك من كلام أخوك/عمك الجاي دا..
من أول مداخلة فقد قلت أنت:-
"وزعمت [تراجي] أن الموسيقار بشير عباس هو خال ثروت وهذه معلومة خاطئة أخرى استندت عليها"!!
خاطئة كيف يعني؟؟
طيب؛ النقول ليك: بالبوليميريز تشين ريآكشن PCR وارد مفاعلات الاجتماع السوداني ؛

١) أستاذنا بشير هو: ولد عباس ولد بشير ولد نصر ولد بشير ..
٢) وخالتك أم ثروت هي: بنت عثمان ولد بشير ولد نصر ولد بشير ..
٣) وبما أن عباس والد بشير عباس هو أخ لعثمان والد أم ثروت بنت عثمان ..
٤) فعندها؛ الحسبة هي؛ أن بشير سيكون ابن عم لأم ثروت يعني أخوها ود عمها ..
٥) وهذا سيعني أن بشير عباس هو (خال) لثروت لأنه أخ (ود اعم لزم) لوالدته بنت عثمان ..
٦) الحسابات الفوق دي حسابات السودانيين، إلا لو تخرج من أرض لهم وسماء ..
٦) وإذن فمعلومة تراجي.. في الحتة دي على الأقل.. هي معلومة صحيحة جدا!:) ..
+++
ما قلت لي يا كمال: الصورة الفوق دي للشيخ بشير نصر بشير أم هي صورة منسوبة بالغلط فنمسحها.؟؟