سلامات يا أخانا الفاضل كمال معتصم أحمد السيد: ياخي والله أنا دخلت أكتب بكل جدية وعلى هامش المعلومات التاريخية الوفرتها لينا في البوست.. لكن جيت لقيت اليوم جمعة والأمة مجتمعة وكل زول بتونس بي غرضوا، قلت اتونس شوية لي روحي دي. غايتو الله يصبرك ساي، بالله شوف الأمة دي هههههههها، يمخولو الزول المجنون أصلا.. شنو يا أخوانا ما شايفين السنوسي بدر لما لقا كمال جاهز موية ونور قام قال شنو:
Quote: العالم متحرك وفيهو تداخل كبير
انتو ما بتقتنعوا ياخي.. بي وين؟ هاك شوف.. ** أخونا الأستاذ نادر الفضلي قال بس عشان (نوقع) الكلام:
Quote: أخ كمال تحياتى عشان بس نوقع الكلام كويس هل فى قرابة بين سروراب أمدرمان .. ناس صالح سوار الدهب وعبد الرحمن سوار الدهب وبين سروراب الحلفايا .. ميادة سوار الدهب هل لها قرابة دم أو نسب بناس أمدرمان؟
غايتو يا كمال لو تابعت خيط كلامو دا معناتها حترمينا من قد القفّة هههههها. قال نوقعو قام طششششو في عتاميرن عجيبة، الله أعلم لو يتلم تاني هههها. معقولة يا نادر؟ عملت البلد كلها سروراب؟ دي منصور المفتاح ما عملها..!! وغايتو علاقات النسب وارد ومحتمل وما بعرفها، لكن في باقي سؤالك فإنتا وقَّعت لينا الجوز (سوار وسرور) ديل، في جب ديكليكسا أعمق من جب قصة يوسف القالا منتصر.. وزي ما داير تجهجهنا نجهجهك.. هاك.. السروراب شن جابهم لي السواراب؟ السروراب منن؟ سروراب ود رملي ولّ سروراب أمَّرحي ؟ والسواراب منن؟ البي دهب ولّ المشلخين لا ورا؟ والبي دهب ياتن؟ ناس أم درمان والخندق والأبيض ولّ سواراب فكي أبكر المفتري عليهم؟ والبدون دهب ديل ياتن؟ سواراب الحلفايا ولا أوسلي ولّ حجر العسل؟ وشن جاب الجموعية للشايقية وشن جاب الحلفايا لي أمَّرحي والخندق؟ هي الحلفايا فيها سواراب؟ من النوع الدهبي ولّ أبو شلخات؟ غايتو الأمم السوارية المسرورة دي فحتى لو (جعلوا) جدهم واحدا، إلا لومك بي تاني ما تلمهن إلا آية "إنا خلقناكم" والجنسية ثم المصاهرات...
لخبطتنا، لخبطناك لكن برضو اخير من صاحبنا الجاي دا.. ** ثم يجيك واحد لبرالي يفط ليك لخبطة تراجي المالبرالية دي كووولها ويقول ليك:
Quote: زمني دا كلو كنت مفتكر أصول السواراب من الفلاتا. ملامح ميادة الدقيقة وجميلة أقرب للفلاتا من الشايقية!! عموماً حصل خير لزمن طويل كان لقبي الفلاتي، وما زلت إذا التقيت بعض أصداقاء الطفولة يقول ليك: والله، مشتاقين يا فلاتي واحدين بدلعوها ويقولوا ليك يا مشتاقين يا فلت المهم تاني، السواراب ضيعتوا علينا نكون أهل! المهم تالت، كونو ميادة ما تطلع فلاتة خفف علينا زعلة زحفها للمؤتمر الوطني
ماخد حُرِّيتو خالص خالص، عمر بن ابي ربيعة ويصلح ساعات لبرالية ويمرر مقولات سياسية ! شنو يا أخينا عملت ليا قبيلة ميادية جديدة، حسّع يمكن سوار الدهب دي اسم على اسم!! منو القاليك سواراب ميادة ديل قبيلة عشان تفتكر وما تفتكر؟ ولما بتفتكر طيب ليه ما بتقول من زمان؟ ومنو القال ليك سوارابيات الفلاتة لبراليين وسوارابيات الشايقية ما لبراليين يستاهلو دمعاتك التقدمية؟ في ذمتك دي، هسّع مهيرة بت عبود السوارابية العكودابية، ما كملت اللبرالية لي حدها؟ علا بس اسما قديم ودشن ساي؟ انتو بس تفتكروا ساي، ما يمكن الناس عندهم أهل تانيين!! اهو منتصر هسّع قاليك: انو "السواراب" فور من أمهم وأبوهم شايق ومجعولين مع الجعل يكابسو في العباس، المافي شنو؟ وخلي بالك، أيوا أعمل حسابك × × علاقات الشايقية والفور علاقات أزلية ولا فصم لعراها. وأما علاقات العدلاناب مع السلطة فمن زمن الشواويش الأوائل، يعني ما جدّت بي ميادة ولا حتقيف! ثم، أيواااا تعال جاي، هل لديك ما يثبت أي قرابة بين الفور والفلاتة والجعل؟ تكون حليت مشكلة كبيرة!! وهاك شوف الزول أب شنب دا، بالله ما ملك نسيب ملوك، عليك سيدي الحسن ما فيهو شبه من ثروت سوار الدهب، بلحيل جدو من أمو؟ من أمو يعني في احتمال ما يكون قريب ميادة أصلا عشان تقوم تجري تعمل مقارنارتك الأنثروبولوجية دي 😂 لو بقا شيخ بشير جدها فمعناها الناس ديل ما شغالين بي حديث اغتربوا لا تضووا أو إنهم بصدد تجميع الدماء الزرقاء.. المهم، مفروض تقتنع، ولو كترت كلامك بدل الصورة دي بجيب ليك صورة ولدو المشلخ لا ورا؛ اللواء حسن بشير نصر بشير.. داك معروف، ما معهوش يما أرحميني!! ** يا منص يا منص، دا الله قدرك عليهوي يا عكودابي يا ملبرل
Quote: يا بك كان بتتكلم عن جدنا سوار ود شايق أمه بت التنقار سلطان جبل حريس في دارفور شايق تزوجها ورجع لديار الشايقية وكانت حامل وأداها سوار لو جابت بنت لم ولدت ولد سمتوا سوار وله قصة قريبة لي قصة سيدنا يوسف مع إخوته 😂
ما كان ترزعوا بي نص ظلامي عكودابي مصلّح ياخي.. خربت لي مداخلتي الجاية!! لكن برضو ما مشكلة، حاعتبر كلامك دا عتبة أولى ومدخل للنصـ.. ـوص..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هاشم الحسن
فيس بوك
تويتر
انستقرام
يوتيوب
بنتيريست