|
|
 Re: متى يفلس البنك؟ (Re: عمر التاج)
|
اقتباس "في كل العالم تفسر عملية عدم القدرة على الوفاء بالتزامات بنك ما للمودعين بأنها أزمة سيولة، ولكن الحالة في السودان تختلف إذ أن الاصول السائلة لدى البنوك لم تنعدم، والحسابات الجارية للبنوك والاحتياطات متوفرة، ولكن الظرف السياسي الذي غلب على الحالة الاقتصادية هو ما خلق هذا العجز، في الحالة الأولى يعجز البنك بصورة فردية، حتى عن إصدار الشيكات المصرفية، ولكن في حالة السودان فإن كل " أهـ
عمر التاج كيفك
* يمكن تفسير ما يحدث على انه ازمة للوهلة الاولى ، يعني ده الظاهر بس من الازمة ، بعدداك الاجهزة الرقابية (بنك السودان ) بيرسل فريق تقصي عشان يعرف سبب الازمة شنو ، لانو ازمة السيولة هي عرض لمرض .
السبب في ازمة السيولة هو سياسة البنك في الاقراض ، البنك يقرض اموال المودعين بنسبة اكثر مما تحدده لوائح بنك السودان وبدون ضمانات كافية (اسعد كرتى اخد قروض من بنك فيصل بحوالي 3 ترليون جنيه بحسب الصحف)مما يجعل استرداد اقساط القروض صعب وcash inflows الناتج من القروض بيكون قليل وما بغطي السحب اليومي العادي وده ممكن يؤدي لافلاس البنك بكل سهولة. افلاس البنك لايعني ان البنك لا يربح ، ممكن البنك يكون بيربح ويفلس ممكن يكون بيخسر وماشي وشغال. الحاجة التانية البتجيب شح السيولة هي ما يسمى "بذعر المودعين" وتدافعهم للسحب في وقت واحد نتيجة شائعات بافلاس البنك سواء كانت حقيقية او متوهمة لأن البنك لايمكنه الايفاء بالتزاماته لكل طالبي السحب وهنا ايضا يمكن ان يفلس البنك بكل بساطة لم لم تتدخل الحكومة تدخل حاسم.
انت من وين عرفت انو البنوك دي ما افلست لانو بنك السودان ما اصدر اي بيان بخصوص تحقيق اجراهو في اي بنك ابدا ولا قال اي كلام عندو معنى ولا قام بأي اجراء حقيقي معلن لحل المشكلة مع انه المسئول الاول عن السياسة النقدية في البلد !
ومن وين عرفت انو احتياطيات البنوك "متوفرة" ، هل تقصد احتياطيات نقدية ام مالية ؟ المالية دي موضوع تاني ومافي زول بعرفو الا البنك يصدر الميزانية بتاعتو رسميا بواسطة مكتب محاسبة او تدقيق معتمد ، النقدية دي مستحيل ، لانو البنوك ما بتحتفظ باكتر من 20% من اجمالي الودائع في اعتى البنوك العالمية ناهيك عن بنوكنا الكحيانة الفاسدة دي ..
الشايفو انا حاليا افلاس غير معلن حدث نتيجة التلاعب المستمر بلوائح الاقراض والفساد الضارب بأطنابه في البنوك منذ 30 سنة .. البنوك لو عندها كاش ما بتجازف بسمعتها لحد ما الجمهور يتوقف عن الايداع ، توقف الجمهور عن الايداع يعني افلاس البنك بكل بساطة ، بالذات في السودان لانو البنوك رؤوس اموالا ضعيفة للغاية ولا تمكنها من القيام بأي عمليات مصرفية ، مجرد صرافات ساي او بالكتير مؤسسات اقراض صغير "ميكرو " .. الان البنوك تحاول توزيع ما تحصل عليه من عوائد الاقراض او اقساط القروض على المودعين وهذا لايغطي السحب اليومي لان المودعين فقدو الثقة تماما في البنوك واي زول عايز حقو ناشف ، عشان كده بتحدد سقف يومي وصفوف وزحمة ، وانا متاكد تماما لو اي بنك جاب رسم بياني يوضح حركة السيولة حتلقا الكيرف نازل باستمرار لي تحت وده هو الافلاس ذاتو ..
القروض الحسنة شغالة من التسعينات ياخي ، في نظام في الدنيا بشتغل بقروض حسنة وبي ضمان علامة الصلاة ؟ والنافذين بيسحبو ساي زول بقدر يتكلم معاهم مافي
ويا ريت لو بترجع ، الكثيرين منهم لا يرجعها ويجي يقترض تاني ! والحكومة تسحب على كيفا والمؤتمر الوطني يسحب ..
الحركات البتمل فيها البنوك دي صح مية المية وبتمكن المودعين يحصلو على اكبر قدر من ودائعهم من ناحية والاحجام عن الايداع من ناحية اخرى قبل الانهيار الحتمي لو لم تتدخل الحكومة المفلسة من الاساس ..
ترى لم امرت الحكومة اجهزتها بالايداع في بنك السودان عوضا عن البنوك التجارية ؟
|
|
 
|
|
|
|
|
| |
Abdullah Idrees
فيس بوك
تويتر
انستقرام
يوتيوب
بنتيريست