نماذج مقارنة بين الحقيبة والزجل (هناك زعم بإنكشاف السر بعد 100 سنة من الغموض)!

Quote: نكات وطرائف على هامش البحث في الحقيبة (حلقة 1) واحد قال لي مشكلة البحث إنك مشعبو بديت بشعر الحقيبة وفي النص شعراء الحقيبة نفسهم بقيت تبحث فيهم. قلت ليه دا شيء طبيعي هسا لو جيت ماري بواحد من المطارات الدولية وشايل ليك شنطة "حقيبة" مش بفتشو الشنطة وبفتشوك انت ذاتك "أنا بعمل نفس الشي" ولو لقوك شايل ممنوعات بتحفظو عليها وعليك حتى تكتمل التحريات.. قال لي "ايوة". ايوة دا المنطق.. ولو في غلط في الإجراءات ممكن تشتكي لإدارة المطار أو الجمارك أو تشتكي في المحكمة.. ويدوك تعويض بعد الإعتذار الرسمي. لكن إجراءات المطار "البحث/التفتيش" لا بد أن تتواصل لسلامة الوطن والمواطنين. --- واحد كتب مداخلة في إحدى بوستات الحقيبة قال "الكلام دا قديم ما جديد/إفتراضات البحث" وقال عنده الدليل.. جاب رابط مقالة طويلة عن الموضوع لقاها في موقع الراكوبة.. وبكل طمأنينة خت الرابط في البوست العام وقعد يتكشم ويستهزأ بشهية دون أن ينتبه للإسم المذيله به المقالات.. إسمي. --- كم واحد من مغرمي الحقيبة طلبو سيرتي الذاتية.. طبعاً مفترض الأكاديمية والمؤهلات العلمية.. طلع ما كدا.. أتضح في النهاية دايرين يعرفو الجيهة والقبيلة.. اللعنة!. --- عدد من مغرمي fans الحقيبة وبعض الناس العاملين بيها بيزنس قررو يقاطعوني وما يدو أي معلومات اثناء تداخلهم في الموضوع على بروفايلي عشان قالو بستفيد من المعلومات في تعضيد إطروحة البحث الذي يتمنون فشله بكل الطرق المشروعة وغير المشروعة.. المعلومات هي المناسبات التي كتبت فيها تلك القصائد واسماء الأحياء والشوارع.. زي كدا.. في الحقيقة أنا محتاج أتعلم وكل معلومة مفيدة.. ولا أدعي العلم أكثر من اي زول.. اشعر بجهلي في كثير من مناحي الحياة.. بس للأمانة مثل تلك المعلومات غير مهمة للبحث وهي متوفرة في قوقل كان في ضرورة. التحية لجميع الأصدقاء ضد ومع مبدأ البحث.. الناس أحرار.. هذا هو فهمي. --- واحد قال لي أنا من "حلال الجعليين" من ما بدأ الموضوع دا أنا ساكت عشان ما يقولو المسألة قبلية.. قلت ليه وانت رأيك شنو في البحث.. قال لي والله ما قريتو لسا لكن نحن معاك على كل حال.. قلت ليه والله فعلاً اذا جيتنا بالطريقة دي بتكون دي قبلية.. وقبيلة أم درمان تاني بتقوم علينا!. --- الشنب.. أجمل واروع حاجة عاجباني في العكة القايمة على جانب موضوع الحقيبة دا.. قصة الشنب.. ناوي أكتب عنها مقال كامل.. أتمناه دسم.. تكررت عشرات المرات.. عبارات يا أب شنب.. حالق شنبو.. ما عندو شنب.. هلا هلا أب شنب.. تهكم.. روعة.. والله في البداية ما فهمتها لغاية واحد من الأمدرمانيين الأصيلين وناشط مهم وهو ( ع. ا. البنا) إستحقرني بلا شنب وقال الزول دا حاسد شنبة الناس ديل" قصدو مغني وشعراء الحقيبة" حسادة بس. دا تفسيره السحري لكل القصة دي!. و هو كدا فاهم انو حسم الموضوع وجاب الديب من ديلو وحسم بحث علمي مزعوم وانتصر لقبيلته الامدرمانية/الحقبنجية أو حسب تصوره.. هذا الشاب مجرد مثال.. ولا أعرفه قبلها ولا يعرفني.. وله كل الود والاحترام ما خلا ذلك والقصة عندي بسيطة. المهم: يعني بإختصار بعض الامدرمانيين معترضين على زول حالق شنبو يتكلم في "حقيبتهم" أو يعمل فيها بحث.. بالله شوف التمدن دا!. 100 سنة حقيبة وعيش إسمي في العاصمة لكن المخيال بدوي!. معناه الحقيبة لا رسالة لها في التربية أو التهذيب أو الثقافة أو التمدن.. أهم شيء التمدن/الحداثة!. الحقيبة لو يعلمون اصلا اتعملت عشان المدنية والتمدن الحقيبة بس فشلت والدليل ناسا ديل بعد مية سنة من نشأتها ومية سنة من بدلة خليل فرح المزكشة الملونة!. بهذا الفهم أن الباحث "الجد" لازم يكون مربي شنب مدنكل وفي ضراعو سكين وشايل عكاز مضبب بالضبط وكأنه قروي شهم من البطانة أو راعي أغنام فارس اصيل من الفيافي (القرويين والرعاة ممكن يكونو متمدنين أكثر من اهل المدن طبعا، لان الوعي المدني غير أصيل في السودان). راجع لطفاً البحث الآخر الذي نشتغل عليه عن نفسيات الزول السوداني، هناك روابط للدراسة وفيديوهات/تسجيلات صوتية عملتها على أثر الدراسة في سايكلوجية الزول السوداني، تجدونها في النت وفي حائطي على الفيسبوك. هذا ليس بغريب بالنسبة لي لأن أمدرمان لا تزال قرية فقط كبيرة أو هي أكبر قرية في السودان وهي في الحقيقة ممكن تأخد جايزة أكبر قرية في العالم (هذه حقيقة عندها أدلتها العلمية) أنا هنا لا أمزح!. وما الفخر الأم درماني إلا إستعاضة موازية للفخر القبلي (لدي عدة مساهمات من سنوات في هذا المبحث) أسميتها: الفخر الأمدرماني المزمن. ذلك طبعا من مخلفات مخيال القرية والقبيلة إذ لا فردانية بل أهل أم درمان جماعة متفردة صلدة تتميز بالعزة والشرف والكرم والضكرنة والأشنبة وأي باحث عندهم بشنبو وإلا يبقى خايب وممنوع من البحث. وهو إذن إهانة لتاريخ ولتراث القبيلة الامدرمانية الجريحة التي تبحث عن شرفها بين القبائل.. يا لعار المدنية والتمدن!. . ناهيك عن الحضارة! . الخيارات الفردية في لبسك وجسمك ممنوعة أما الرأي المختلف عن شياخة القبيلة طبعاً مكن ينفيك من القبيلة ويؤدي بك إلى الجحيم.. لا بد أن تكون نسخة مطابقة لمخيال الجماعة.. هذا بالزبط هو وعي القبيلة. إنها أم درمان.. القبيلة.. أم درمان قبيلة. قبيلة جميلة.. لكنها ليست بلا علل زي كل القبائل. --- عشرة من اصحابي عايزين يألفو كتب عن الحقيبة.. منهم المحامي الشهير حاتم الياس.. بس نفس كلامي.. أو نقد لكلامي.. تمام.. أربعة دور نشر عربية (غير سودانية) أتصلت بي لنشر البحث عندهم.. وواحدة بس سودانية.. (المعلومات في بوست سابق). كله تمام!.. شكراً للجميع ومحبة أكيدة. كم جريدة سودانية وتلفزيون "واحد" طلبو مني أن ينقلو موضوع البحث عندهم وعندما قلت لهم ليس مجانا.. زاغو.. لو قالو مفلسين كان أديتو ليهم ساي مع أن جرايدهم شكلها كضومة كبار وحناجرها صغيرة. بس في جريدة واحدة أتصرفت وسرقت كلامي بتصرف وهسا وعدت القرا كل إسبوع ملف ثقافي كامل حول الموضوع (الجريدة إسمها: الدار). آخر طرفة أن صديق عزيز بلا كثير تفكير طلب مني أن يتبنى حزبه السياسي العريق بحثي عن الحقيبة. دي أكتر حاجة حيرتني!. بالله هسا دا حال ناس يعملو ليهم بحث في حقيبتهم :). الليلة قلت نتونس شوية .. الدنيا نهاية إسبوع.. وكل يوم وانتم طيبين.. ومحبة أكيدة وود وأحترام وسماح وتسامح متبادل محمد جمال الدين .. ملاحظة الكلام دا السنة الفاتت يونيو 2017.. حاجة انتهت بس تبقت المعاني والبحث انتهى بس تبقت نتيجته. شطبت أسماء الأصدقاء المذكورين في الكلام لأنه ليسو أعضاء هنا حد علمي ما عدا المحامي حاتم الياس