العزيز بكري ابوبكر..حبابك يا صديقي.. حتى اللحظة ، اذكر التفاصيل جيدا ، حينما ارشدني اخي الأصغر راني السماني لهذا المنبر ، وانت تعلم وغيرك يعلم ما بيني وبين راني اليوم ، واذكر حينما اقدمت على التسجيل سؤالك لي عمن اعرف من ناس القانون ، وقلت لك اعرف استاذنا وصديقنا محمد حامد الحافظ (اٍشو) ، وسؤالك لي ان كنت اعرف شيئا عن اخباره..!! هكذا كانت طريقة انضمامي لهذا المنبر ، المنبر الذي عودنا سماع الحقائق من كل الجوانب (حتى ولو كانت ضدنا ولا نرغب سماعها..!!).. هذا القول يا بكري ، ليس من باب المحاننة (بتاعة محسن خالد) او باب الترجي والتشكي ، ولكن من باب الحقيقة..المنبر سميته حر يا بكري ، وانه وطن من لا وطن له (كما افترعها صديقنا عزت الماهري) ، لأنه كان يحتمل كل جوانب الحقيقة وحتى اساطيرها كما يصيغها اهل السودان كافة ، منبر كان يسمع كل الجوانب ويسمح بعرضها ، حتى يعرف اهل السودان تلك الجوانب ، وبعدها هم مخيرين يصدقون من يصدقون..! سحب مداخلات بريمة يا بكري ، هو حجب بالباب العديل للجانب الآخر من الحقيقة ، حتى ولو كانت مشاترة ولا يرغب البعض منا سماعها ورؤيتها..!! فماذا تبقى لنا يا ريس؟ ..ماذا تبقى لنا غير القول الحارق؟ تخلينا عن كل المنابر السودانية ، وفضلنا البقاء هنا..تفتكر ليه؟..هل من اجل سواد عيون بكري ابوبكر؟ بالطبع لأ..ولكن من اجل سواد عيون الحقيقة التي ظننا ان بكري فتح لها كوة لكي تكون..! نفس الخيط الذي وضعه بريمة هنا ، عن اختراع ابوك مشام ، ناقشونا فيه اناس (نساء ورجال يا بكري ) على ارض الواقع..في الدلنج ، السنجكاية ، الدبيبات ، ابوزبد ، لقاوة ، وضواحي غرب لقاوة ، مثله ومثل اعمال موسيقى من النيجر ومالي و وبركينا فاسو والسنغال وغامبيا..!! نفس الصور وغيرها ، التي يحتفظ بها بريمة ، سألونا عنها ، ولازالوا يسألون ونحن نعجز ان تقديم اجابة مقعنة..ليه الناس لسع بتكتل بعضها البعض رغم انفصال الجنوب؟.. فهل تظن اننا سنفرح ونقول باننا اخطر الناس ؟..بالعكس نفرح ونقول ان هناك حاجة اسمها سودانيز اونلاين..!! سحب مداخلات بريمة ، هو حجب للحقيقة يا بكري ، غض النظر انك سويتها بضغوط من ناس او بارادتك..كده يا حبيب ..انت بقيت مع ناس عمر البشير في سرج واحد وكايس ليك مشروعية ولاية تانية وتالتة ، حتى لو يتعدل الدستور..! خليك من الحنك العاضي بتاع (عيال البقارة) ولكن انظر حولك يا بكري..وينهم عيال البقارة؟..اين هم عيال الرزيقات المن المفترض نديهم فرصة عشان يقولوا الجانب التاني للحقيقة عشان الناس تعرف البيها والعليها؟.. الشوعيين يا بكري كتلوا هاشم العطا ، كتلوا حسين ابو شيبة ، كتلوا فاروق حمد الله..باقي ليك بيغلبهم يكتلوا الأخرين؟.. الحقيقة يا حبيب ، دايما عندها جوانب وجوانب..ولو اخترت الإنحياز لبعض منها..مافي مشكلة..مافي مشكلة تب..وممكن بمليون طريقة نقول للناس : استاذنا عشاري كضاب..استاذنا بلدو كضاب..!! والبيجوا عايدين ، شوية يا بكري ، صدقني شوية..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة