بهدوء انهيار فصل مدرسي

Quote: السيد وزير التربيه والتعليم بجمهوريه السودان / آسيا محمد عبدالله تحيه طيبه وبعد ! مرفق الى سيادتكم صور من "فصل" ب مدرسه بنات في محليه امبدة .. الفصل دا وقع ! اي والله وقع الوقعه الوااحدة دي ! ولو وقع بالليل والمدرسه فاضيه كان بتكون قضيه فساد وغش في المونه والاسمنت وتجيبو المقاول وتشوفوهو عمل كدا ليه ويتسجن ولا يتحلل ولا اي شي ! لكن للأسف الفصل دا وقع في نهارا في اثناء اليوم المدرسي ! وراحت ضحيه الانهيار دا ارواح تلاته طالبات كل ذنبهم انهم بيقرو في مدرسه مسؤوله منها وزارتك الموقرة ! التلاته بنات ديل بنات حقيقيات ! ما اسماء في ورق .. عندهم اسماء .. عندهم صور وهم صغار .. عندهم هوايات .. وحده فيهم كان حلمها تكون طبيبه .. واحده فيهم هي البت المفضله عند ابوها .. عندهم اخوان واخوات كانو بيلعبو معاهم .. عندهم جيران كانو بيلاقوهم في المراسيل للدكان .. الليله سراريهم حاتبيت فاضيه ! مخداتهم .. اغطيتهم .. فرش اسنانهم .. سفنجات البيت .. الكتب والكراريس .. كل التفاصيل دي الليله اهاليهم حا يعاينوا ليها ويبكو ! حايفقدهم كل يوم .. مافي طفل بيموت بيتنسي .. غصه فقد الطفل بتكون قاعدة في الحلق الى يوم يبعثون ! سعادة الوزيرة .. بنخاطبك من اجل الانسانيه .. يجب ان يحاسب المذنب .. الزول المتسبب في جريمه القتل دي لازم يحاسب ! ما حايرجع الطفلات .. ما حا يعالج المصابين .. ما حايبرد حشا الامهات .. لكن لازم يتحاسب ويحاكم على مرأى ومسمع من الجميع ! كم مدرسه في السودان حاتقع تاني ؟ كم فصل في السودان آيل للسقوط ؟ كم منشأة تعليميه لا تصلح انها تكون حوش دجاج ناهيك عن انها تبقى مدرسه بتعلم اطفال حب الوطن ؟ كيف الطفل يتعلم حب الوطن والوطن بوقع المدارس فوق راسو ! كم من مدرسه لا تصون ادميه الطلبه بحماماتها المقرفه ! كم مدرسه فيها طلاب بيدوخو لانهم ما عندهم حق الفطور ؟ كم مدرسه مافيها تهويه ولا مروحه والطلاب بيتهببو بالكراريس ! كم مدرسه طافحه فيها المويه الراكدة بسبب الامطار ! وبعد دا بيطلبو من الاهل رسوم كهربا ورسوم نضافه ورسوم كتب ورسوم الخ الخ الخ ! سعادة الوزيرة .. افضي لينا شويه ولفي المدارس الحكوميه شوفي حالتها كيف ! .. افتحي ملفات المدارس الخاصه وشوفي من الذي يمنح التراخيص لمدارس ايله للسقوط ! هل في لجان بتمشي تعمل تفتيش وتقيف على المدارس دي ولا القصه فكو وطار ! المدارس البيفتحوها كل يوم ويجيبو اعلانتها في التلفزيون دي هل تطابق شروط الوزارة التعليميه والتربويه والامنيه والصحيه ولا لا ،؟ سعادة الوزيرة الاسر دي فقدت طفلاتها البريئات في انهيار مدرسه في سنه 2018 ! ما بنكلمك في كشف امتحان ولا تسريب اسئله ولا في اجلاس ولا كتاب ! بنكلمك عن ارواح فقدت ! فماذا انتي فاعله !