حبيبنا أبوبكر عباس ( المستنير ) فقدناك يا جميل .. أين أنت ؟؟

Quote: كبيت بترول في محطة العوهة، العوهة دي آخر نقطة في العين المدينة، هسع الاسم قلبوهو الفوعة، ما عارفو عملوا شنو؟! لكن غيروهو. اشتريت سندوتش نقانق زيادة طماطم وخالي طحينة، وعصير مشكل، ومسكت الظلط. لمان وصلت كبري قباشة (غباشة)، نفس المطرة بتاعت ود المجدوب دوّرت، والدنيا انقلبت ليل، برق رعد خطيرين طلعت العربية من الظلط، لمان البرق شدّ، شيطاني قال لي: ديك مرقك منها ابشرا، دي بتمشي منها وين؟ تذكرت عفصة الإبريق، قلت ليهو (للشيطان): الله ما بعابي ولا ينفعل وابشرا "لحاق بعيد" الغريبة، تعبير "يا لحاق بعيد" دا كان كاتبو بابكر سالم ابو سنون في كل لواريهو (جمع لوري) في مدني ما عارف جاني من وين نابل كمال ود عمي قال لي، وكنت قاعد ابني ليهو في قفص حمام بحي مايو جمب جامع بابكر سالم ابوسنون، وأنا بالمرحلة المتوسطة، قال لي: لو تقول كل يوم الصباح "يا لحاق بعيد" تلاتة مرات، أصلا ما بتفقر. نزلت من العربية قلت انزل تحت جسر قباشة دا، آخد لي بولة، النصيحة أنا زي النوبيين بهرش من الرعد هرش شديد، قلت وأنا نازل من العربية: يا لحاق بعيد تلاتة مرات دي كانت أول مرّة استعمل وصيّة ود عمي حصلت حاجة غريبة جداً جداً دي ما ظنيت زول واحد يصدقها، أكبر من ديك حيدر حسن ميرغني ذات نفسو ممكن ينكرها، وفِي أخفّ الأحوال يقول: "ان كان قد قال؛ فقد صدق" وأنا نازل تحت الكبري، حصل برق وسيفو (سيف البرق) فصل بيني والعربية، بقى قدامي زي بوابة التنقل بين الماضي والحاضر البجيبوها في الأفلام الامريكية الخيالية. أول مرّة أدخل إستاد مدني كنت في بداية المرحلة الابتدائية، مع ود أختي الذي يكبرني بسبع سنوات. المباراة كانت بين المريخ العاصمي والنيل مدني، سبّطت مطرة شديدة، نزلنا ادسينا في ضهر اللوحات الجانبية، كل مرّة كان يقول: جايّة رعدة فعلا تجي بعد كلامو أدهشني صدق التنبوء بتاعو لاحقا شرح لي إنّو الضوء يسبق الصوت أها سيف البرق لمان شقّ بيني والعربة، شاهدت نفسي طفلا تبلله الأمطار في إستاد مدني، وانتظرت الصوت، لكنني وجدت نفسي في زمن مختلف خالص عن ود المجدوب وأستاذ مدني وعن قباشة!! في زمن مختلف ومكان مختلف، فتحت عيوني لقيت ارض خضراء منبسطة على مد البصر، تزين الخضرة زهرة التبر البيضاء المكان عرفتو بطانة اب علي، وقاعدين في ضَل تاية، وجنبنا بهم ضان وشاي مشدود في نار بعر، ونغني واشيل معاهم وأقول: تالي القبلي شايف لي برقا لمع والصيد في الخمائل يا ناس اجتمع الصوت الأساسي في الغنا عرفتو صوت المداح الحكيت ليكم بيهو زمان قلت ليهو: يا يوسف أبشرا، اللماك بي هنا شنو؟ قال لي: اللماني بيك اتّا عارفو، لكن قول لي: بنطلونك وجزمتك ديل غيرتهم متين؟ ووين؟