حوار أغبش ممددا على عنقريب في الحوش مستغلا ظل العصر تحت غرفة الصالون يقرأ في جريدة خالفا ساقيه على بعضهما. يحس بحركة شخص وقف قربه. - أبوي أبوي أبوي . رفع رأسه من الجريدة ومن فوق نظارة القراءه نظر مجيبا. - أيوا يا عماد خير. - أنت مش قلت لي كان جيت الأول بجيب لك عجلة؟. - نعم صحيح . - يلاه هسع انا جيت اللول جيب لي عجلة . - يا سلام ؟ وجيت الأول وين انشاء الله ؟.🤔🤔🤔🤔🤔 - ما في المدرسة هي اللول يجبوها وين؟ . - يا ولد مدرستكم لم ينجح أحد كيف تقول جيت الأول. - ما بعرف المهم انا جيت الأول. - يا ود انت ما بتفهم قلت لك مدرستكم كلها لم ينجح أحد. - أنت ما قلت لي تنجح قلت لي تجي الأول. - لا بالله؟ وعرفت نفسك كيف جيت الأول انشاء الله؟ . - أستاذ حسن قال لي انت طلعت الأول. هسه انا داير العجلة . مناديا بصوت عالي: يا سعاد يا سعاد ما تجي تلمي العاهة بتاعك دا . تأتي من المطبخ حاملة المطبخ متحفزة: أها في شنو . - تعالي اسمعي وولدك يقول في شنو ؟ - في شنو يا ولد ؟. - يا أمي أبوي قال لي كان جيت اللول بجيب لك عجلة هسع هو نكر الكلام دا ؟ - صحي يا هاشم الواحد لمن يقول كلام يبقى قدره. - يا ولية انت متخلفة زي ولدك دا ولا شنو ؟ أقول لكم مدرستهم لم ينجح أحد. - بالصحي يا عماد انت ما ما نجحت لكن ؟ - المهم هو ما قال لي تنجح قال لي تجي الأول بس. - قلت له كيف عرفت نفسك جيت الأول وانت ما ناجح أصلا؟. قال أستاذ حسن قال له. - ما يمكن كلامه صحي كدي اتصل بأستاذ حسن اسأله مش هو صاحبك كل يوم متبارين من نادي لكورة لكشتينة . - طيب جيب لي التلفون من الصالون. بعد قليل يتصل - الو كيفك يا أستاذ حسن اخباركم؟ أنت تعال صحي قلت لعماد أنت طلعت الأول؟ عم صمت قصير - اها قال شنو؟ . قافلا سماعة التلفون بيده ورد على زوجته: أنفجر بالضحك الحيوان دا هو كمان.🤬🤬 بعد قليل عائدا للتلفون سمع الرد. - اها قال شنو؟ . - بعد كمل ضحكه قال لي فعلا عماد جاب مائة تسعة وثلاثين أقل من نص المجموع بدرجة واحدة وأكبر درجة في الفصل يعني فعلا هو أول الفصل الساقط. - كان كدا عماد عداه العيب صحي طلع الأول . - يا ولية هوي سوقي ولدك دا امشوا من قدامي قبل ما اشيل الطرابيزة دي افرتقها في رأسك أنت وهو . - يلا يا عماد يا ولدي العنده حق ما بضيع في الدنيا دي ..😤😤😤😤😤 يتبع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة