و طني ... حرٌ فيا ... و طني لك العظمة ... شكلتني بنيلك و جبالك و غاباتك ... _____________________
حا أسأل عن بلد رايح وأفتّش عن بلد سايح حا أسأل وأسأل عن أمانينا أمانينا اللي ما بتدّينا صوت صايح **** حا أسكن كلّ نخلاتنا إذا جانا الزمن لافح وأكتب عن بلد مجروح وعارف الجارحو ليه جارح وأبكي على بلد ممدوح وعارف الماسكو ما مادح وأحلم بي حلم مسروق لا هو الليلة لا أمبارح **** أعلّق في جناح سفري جوابات لي زمن فجري لكلّ مضاجع الأحزان وأضفـّر من شجر بلدي بروقاً مارقة من صدري وأسأل عن بلد غاطس لحدّ الليلة في الوجعة أنط فوق سرجي وأتحزّم أقوم من وقعة لي وقعة وتبقى الفوتة هي الرجعة **** وأخت إيدي البتوجعني على السأم البراجعني وأسأل يا وطن يا بيتنا ليه شوقك مواجهني وليه حبّك مجهجهني وليه تاريخ زمن خاسر موكّر لسّه في شجني حا أكتب لي شدر مقطوع مسادير يمكن يتحرّك خطابات لي طفل مجدوع يقوم يجري ويقع يبرك وأصرخ يا وطن يا بيتنا ليه ماتبقى لينا الساس قدر ما تجري في شرياننا يبقالنا الشكك ترباس أقولّك يا وطن رايح أقولّك يا وطن آمر سلام النفس ما كافر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة