Quote: ماهي الرسومات التي تراها في الاثار واوحت لك ذلك كذلك ماهي العادات التي تراها وربطتها بالعادات القديمة اللغة ايضا ماهي اللغة التي ربطتها باللغات القديمة في النيل
بالمناسبة يا صديقي كبر الاماويون لا يعتبرون نوبة (لغويا) بل الاجنق فقط هم النوبة في الجبال
ول ابا عبد الله شم..حبابك يا صديقي كتر خيرك على الدردقة..وش ضاحك..!!
افتقدتك ، وقبل ايام (اربعة خمسة او هكذا) كنت داير اناديك في المنبر بمناسبة تسجيل لأختنا واحدة ، جاني حايم في الواتساب اللخيضر على قول اخونا الفاضل الجبوري..ياخي زولة بكت بي دموعها ، وانا اشيل واقول لي روحي معقولة ده ول ابا عبد الله شم..؟؟؟!!..
كتر خيرك على الأسئلة..
ونبدأ من اخر مزعمك المؤكد بتاع انو الأما لا يعتبرون نوبة (لغويا) بل الأجنق فقط..!
اوكي..
وده كلام بتقال لأول مرة يا عبد الله..يعني عادي ممكن تشير لينا وبنتحمل المسئولية الكاملة..! مفهوم (النوبة) حديث يا صديقي ، وهناك اشارات ومقولات تاريخية لا تذكر هذا الإسم..يعني لو سألت جدنا بعانخي او تهراقا او اسبلتا او توت..ح يستغرب على حكاية انو نوصفهم بوصف النوبة او النوبا..! الإسم ده يا عبد الله ، وانت زول باحث ، ظهر ايام الممالك المسيحية..قبالهم كان اسمهم شنو؟ او وصفهم شنو دي خليها في سرك..! ليه عندنا كرمة ، ومروي ، ثم لاحقا المقرة ونوباتيا وألوديا (علوة)؟..
الناس الساكنة في جبال النوبة/جنوب كردفان ، ديل هجرتهم كانت قبال كعة عيزانا وقبال اتفاقية البقط..!!!!!..هل سمعت بالنقة دي؟..
اول مرة تتقال وفي بوست صديقتنا بت ابا امتثال عبد الله..!!
اللغة ، صحيح هي مفتاح يا عبدالله ، ولكنها ليست كل شئ لإثبات انو فلان تبع الجهة الفلانية وفلان لأ..!!
النمانج بشتركوا مع الآفتي (لاحظ الأفتي ديل في الركن الشمالي الشرقي من جبال النوبة/جنوب كردفان ، حول جبل الداير الغلب الطلاع ، وهو بالقرب من مدينة الرهد اب دكنة ، وصوره اخونا المخرج سيف الدين حسن في سلسلة ارض السمر..خلي بالك من حكاية السمر دي كويس يا عبد الله) لغويا..والأهم من اللغة ظاهرة دفن الموتي..! الأصدقاء هنا تحدثوا عن حكاية الحجار حول قبر الميت..وجابوا صور كمان..!!
الأفتي والنمانج والمندل ، لمن يدفنوا الميت ، بيدفنوا معاهو جرة موية ، ومرفقات كان يحبها الإنسان الميت في حياته ، لو كانت امرأة: السكسك ، الودع ، الخنانيق ، يعني كل ادوات الزينة ، ولو كان رجل بيدفنوا معاهو البندقية ، ولو كان زول بيدخن بيخطوا ليهو غليون (كدوس) في يدو..يعني كل المقتنيات الشخصية بيدفنوها مع الرجل..!!..الحكاية دي عند الأجنق غير موجودة..ويبقى اسال نفسك: ليه الخواجات جاريين كبس ، العميان شايل المكسر عشان يبحتوا قبور اجدادنا؟..مش ياها فكرة البحث عن الكنوز؟..
طقوس الدفن ، الحجارة تنسق في شكل هرم يا عبد الله..والحكاية دي عند الآفتي الذين تحدث عنهم القسيس Rev.P.D.Kauczor في سنة 1923 حينما زار المنطقة (جبل الداير ) ثم زار الدلنج ، وقال كلام ملؤه اللؤم والحقد عن النمانج..!!..عارف ليه؟.. لأن النمانج ، المجموعة الوحيدة في نوبة شمال الجبال قادوا ثورة بطلها السلطان عجبنا ، وحينما اعتقل قادت الثورة بعده ابنته الأميرة مندي بنت السلطان عجبنا ، وكان الكلام ده سنة 1917 وما بعدها ، عشان كده في المصادر مثل (السودان في رسائل ومدونات) نادر تلقي كلام ايجابي عن الأما ، النمانج بالتحديد لأنهم كانوا مغضوب عليهم..!! لذلك ، حتى ناس المقاربات اللغوية ، يشكون بان المجموعة اللغوية (الأما) هناك شح في الدراسات عنها..!
من النقطة دي انا افهم جيدا غضبة صديقنا عبد الباقي فيرين الذي جاء بتلخيص كتابه اخونا قاسم نسيم ، والذي يذهب الى ان النوبة الأجنق ، اضافة لنوبة الشمال الحالي ، ليسوا نوبة حقيقيين..!!
وخطأ فيرين استخدام مفهوم (النوبة) وهو يتحدث عن حقب قبل اختراع هذا الإسم..!!
ولغاية ما نرجع للإجابة عن اسئلتك حول الرسومات والعادات..تأمل هذه المادة جيدا..وسوف نستخدمها للمقاربة اضافة لمواد اخرى..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست