عارف يا عمر..عوض شكسبير بلغ قمة ابداعه في مسلسل (حوش النور) حينما كان ممثل بحق وحقيقة..وتراجع في تجربة (وتر حساس) لمن عمل فيها ممثل وكاتب سناريو..ثم بعد داك دق الدلجة في المقطوعات التي داب على بثها في وسائل التواصل..لذلك لا استغرب في سقوطه الى الحضيض في هذا العمل..!!
فما هو المغزى؟..هل يريد عوض شكسبير ان يقول لنا أن ابو عركي البخيت همه العداد من يورو ودولار وريال وشيك سياحي؟..ابوعركي ..الذي نعرف انسان في المقام الأول ، وفيه بعض من صفات الأنبياء..ايوه الأنبياء يا عوض شكسبير..وهي صفة العفاف (مش عفاف الصادق) والتعفف ، ولو كان همه اليورو والدولار..لكن ملك ربع الكرة الأرضية يا عوض..!!
ويا عوض شكسبير..في حفلة بجامعة الخرطوم في مدرسة العلوم الرياضية ..بداية التسعينات ..ابوعركي كان بيغني..صديقتي (من شرق السودان) لبست افضل ما عندها (جكسا في خت ستة كيتا في النظام العام والدعوة الشاملة ، فاكة ضفايرها البتربط المجنون ديك..!!)..الكيزان فكوا الملتوف..والناس اتضايرت..وصديقتي..ما اتضايرت..وهي بتقول: ابوعركي لحظة الوجدان ، وقدام الوجدان مافيش خوف..!!..حاولت اضايرها ، لاويتها ، عشان تقيف وراي..وابوعركي بيغني..الى ان وصل :تجربة خطيرة جد واجتزتها..!!
وحتى اللحظة..بقراها عبارة في عيون طفلة من دارفور ، من جبال النوبة ، من النيل الأزرق ، من اليمن السعيد..طفلة بتهتف مع ابو عركي: تجربة خطيرة جد..لتمضي بعدها تغني للحياة والأمل والجمال..!!
صاحبي عادل عبد العاطي اعلن ترشحه لرئاسة امسودان في انتخابات 2020..وكنت سافعل نفس الشئ..ولكن..! لو مسكت امر في السودان ، لجعلت في عاصمة كل ولاية سودانية : تمثال لأبي عركي البخيت..والكائن يكون..!!
حينما اتى ابو عركي الى مدينة كالقري..لم احضر حفله بتصميم مسبق ، وانا استبطن صورة صديقتي اللابسة جكسا في خت ستة في خرطوم البؤس والتخلف واللعنة..خفت ان انهار وانا اساله ان يغني: واحشني..!!
ما الذي فعله ابوعركي البخيت في حقك يا عوض شكسبير؟..في أي وجه اساء لك ابوعركي البخيت؟..ام انت فاض بيك الفقر وصرت تتسول بكل حاجة وأي حاجة؟..ياخي الدنيا عريضة وفيها تفاصيل كتيرة ممكن تتسول بيها رضا الناس ..اشمعنا ابو عركي البخيت؟..ما عندنا مشكلة الناس تنقد تجربة ابوعركي في الموسيقي:غناء وتلحين وتأليف..!!..لكن التهجم على اخلاق الرجل..فهذا قمة الإسفاف..!!
ياخي افرض قال فترت من الغنا..فهل في هذا مشكلة ؟ ما تنسى زول تجربتو تفوق الخمسين سنة او تقاربها..!!..
نعم ح اتفرج في عوض شكسبير في مسلسل (حوش النور) وح اقرط على كده..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة