ده انا غلبان اوي اوي يا نعمات..فما تعملي للحنابر قنابر..!!
قشرة ساكت يا نعمات (وانتي ختيتك في القايمة بتاعتي البقشر فيها زي ناس يحي قباني ومحمد المرتضى حامد وحيدر حسن ميرغني ، والعريبي معاوية المدير..ياخي معاوية ده اكتر زول بحس اني داير احقر بيهو..وتاني يوم يعزمني قهوة في ذات استار بكس ويقول لي: لو ده بيرضي غرورك..بقع ليك في الوطاة وامشي فوقي بجزمتك..العريبي ده يا نعمات زول من ناس زمان..!!..المهم)..
القشرة..عندي جارتي الحيطة بالحيطة..اسمها انجيلا..اول ما اتعرفت بيها قالت لي من جمهورية شيلي..!..طقيت راسي في الحيطة ما اتذكرت من شيلي غير بنوشية وازابيلا الليندي..انقري شنو؟..جارتي قالت لي ازابيلا دي بت عمتي..!!..وما صدقت..!!..ورتني صور من سنة حفروا البحر..وانا اشيل واتفرج..وامشي استشير فكي قوقل..لمن صدقت وآمن ذاتو..!
في مدينة ريجاينا ، قبل عشرات السنين (ونحن ما جايبين خبر لمن بقت عشرات السنين)..صديقة من زامبيا..اشيل وانق..وجبت ليها سيرة كينث كاوندا (ده الزول الجاي منو اسمو لاعب في فريق المريخ السوداني ، زمان ، واسمو السر كاوندا).. طلعت صديقتي الزامبية بت اخت كينث كاوندا..!!..ياخي لمن فكرت اتمرد واسوي لي حركة مسلحة في زامبيا..!!..والله صحي يا نعمات..!!
ولو الروايات الكتبتها ، فكرت يوم احررها من الأضابير ،ح تلقي فيها بت اخت كنيث كاوندا حايمة..وباسمها كمان..!!..وتلك مجرد اماني ساكت يا صديقة..!!
وبعد.. اول مرة يا نعمات ، ومن كلامك اعرف انو ايمن الربع هوساي..!!
ايام ما كنا في جامعة الخرطوم ، صديقاتنا واصدقاءنا..كانوا بيقولوا لينا معلومة عجيبة وغريبة..انو كلية الآداب بجامعة الخرطوم ، ومن ضمن برامجها التعليمية اللغوية كانت بتمنح الناس.. Optional languages’ courses ودي كانت فيها برامج لغتين: اللغة السواحلية ، ولغة الهوسا..!! والبرامج دي ، تاريخيا ، كانت من اختراع استاذنا العظيم البروف عبد الله الطيب..!!
ايقاعات الهوسا يا نعمات..مافيها الشغل بتاع ناس ايمن الربع ، وادم زنقا..زول متأثر كتير بفكرة المسلمين ومنظمة الأوبك والخليج المجوبك في اليومين ديل..!!..صحيح الرجل ساهم في صناعة افلام وفيديو كليب لترسيخ مشهد الهوسا في المشهد الثقافي العام في غرب افريقيا..لكنه يظل زول مصنوع ساكت..ولم يستخدم الإمكانيات المتاحة ليهو في تقديم الثقافة الحقيقية..ثقافة اهلنا الهوسا..!!
في كل المواد المتاحة في اليوتوب يا نعمات..الناس العاملة فيها فنانين وفنات الهوسا..بتلاقي فيهم انهم بيعتمدوا على حيلة (التكنو) في تقديم اغاني الهوسا..وبعضهم صدق جاكات انهم هنود..وشغالين على الأستايل بتاع الهنود..ودي عوجة كبيرة خلاص..!! كتر خيرك يا صديقة..ودي هدية ،ما ليها علاقة بالبوست والنقاش هنا..!!
ان لم تخني الذاكرة ، في البروفايل بتاعي ..ذكرت انو فناني المفضل عبد العزيز محمد داوؤد..!!..ده ايقاع الهوسا يا نعمات..مع تحريفات صغيرة..الأساس مارش ولكنه لا يشبه مارش ناس ايمن الربع ، والزنق ..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة