Quote: من مأثور الكلام : اذا اردت ان تعرف سـمة وسـجية اى شعب فابحث عن فنونه وتراثه لان التراث والفنون يحملان ملامح وسـمات الشعب المراد .
صديقي علاء..حبابك كتر خيرك على المطايبة.. عفوا لهذا البوح الغريب..!
عارف يا علاء..من فوائد الغربة في كندا ، انها علمتنا نشوف السودان على حقيقتو..وصدقني لولا هذه التجربة..هسع كان يكون عمك كبر اظرط من حميدتي..قائد مليشيا ولا شنو كده ما عارف..!!
كرمة ، اول مرت عرفت عنها بحق وحقيقة من صديقنا الجميل طارق محمد عثمان (اخونا عبد الحفيظ اب سن فاتح عنو بوست مجاور بعنوان : بيت في كندا)..وطارق جمعتني بيهو صدفة عجيبة في القاهرة 1999..وكنا في السفارة الكندية..واقفين في الصف..ومعاي الحيكومة (المدام) وصاحبنا توش خش شمال..وقال للحكومة: ياخي انا جيت بيتكم..؟..الحكومة انهجمت وانا ذاتي انهجمت..وصاحبنا بكل طيب عيال البلد قال: جيت يوم فراش ابوكي..ياخي انتي مش اخت الطاهر بشرى..!!!
طبعا الشغلانة بعد داك وضحت..واتعرفنا..وطارق كان من اصحاب التشكيلي الطاهر بشرى..العرفة حصلت..وزارنا طارق في بيتنا في الحي العاشر بمدينة نصر..والمرة التانية لمن زارنا انا كنت جريح بسبب حادث حركة..وطارق رضي الله عنو..عمل فيني حسنة ما انساها طيلة عمري..جمعني باستاذنا محمد عبد الخالق ، وكان مشرفة على صفحة تصدر كل يوم ثلاثاء بجريدة الخرطوم ، وكتبت فيها عدة مقالات ، ثم جمعني طارق بصديقنا واستاذنا صلاح شعيب..الذي نشر لي بعض الخواطر في صحيفة الإتحادي الديموقراطي..!
عرفني طارق بمركز الدراسات السودانية تحت ادارة استاذنا دكتور حيدر ابراهيم..ووقتها صدرت رواية صديقي ابكر ادم اسماعيل (الطريق الى المدن المستحيلة ، احلام في بلاد الشمس) ، وللصدفة كان ابكر وقتها بالقاهرة ولم التقيه..!
في كندا ، تجاورنا مع صديقنا طارق ، وكان هو يسكن في مدينة وينبك ، بمقاطعة منيتوبا (مع صديقنا الطيب رحمة قريمان) ، وكنا نسكن في مدينة ريجاينا بمقاطعة سسكتشوان ، وزرت طارق في مدينة ونيبك ، وزارني في مدينة ريجاينا في معية اصدقاءنا الجميلين مولانا اكيج ، ابراهام دينق ، ملاك..وكانت زيارة طيبة للغاية لازالت ذكراها عالقة بالوجدان..! حينما كتبت مقالة نقدية عن رواية الحنق لأستاذنا شوقي بدري (محفوظة في المنبر) عضم الرواية هي من مقتنيات صديقنا طارق محمد عثمان..! طارق ، حدثني عن معرض كرمة التشكيلي ، وكان يشرف عليه شقيقه..!
ولكن..! الفنون والتراث ، هي اصدق مداخل لتعريفك بالشعوب..!
في مدينة كالقري ،بغرب كندا ، والتي اقيم فيها حتى اللحظة..جمعتني ظروف العمل بصديق من السنغال ، واسمه الحاج صو..! الحاج صو..كان يشاغلني ويقول لي: ساذهب بك الى السنغال..من يتحدث اللغة العربية ويفهم بالقران مثلك..لو ذهب الى غرب افريقيا لصار خليفة وقطب عديييييل..!
الحسنة الوحيدة علمته وجعلته يحفظ سورة يس..!
ذات مرة كنا نتحدث عن الموسيقي ، وكنت استعين بالحاج صو لتعليمي مواضيع وكلمات اغنيات المغنية من جمهورية مالي ، امو سنغراي..وكان يترجم لي نصوص اغانيها..!
وذات مرة ، من باب المطايبة ، ذكرت له مغني من السنغال اسمه بابا معال..وكنت استلف اشرطته وفيديوهاته من المكتبة العامة في ريجاينا..ياخي الساعة الإنفصم فيني..لمن قلت الرووب..!
الحاج صو قال لي: بابا معال مسخ ساكت..ولو بتعرف موسيقي افريقيا الحقيقية ما ممكن اصلا تعدي ماري ساكت في الدين..!!! والدين المقصود يا علاء يا صديقي ، هو استاذنا الموسيقار العظيم حمزة علاء الدين..! صديقي الحاج صو ، قال لي عبارة ، وهو صادق ، لأني تأكدت فيما بعد حينما رأيت اسطوانات حمزة التي يقتنيها الحاج ، قال لي با نجليزية فصيحة.. This is my holy bible انام على مقطوعات حمزة في كل ليلة اخلد فيها الى فراشي..!! هكذا يا صديقي علاء..تكون الفنون هي سجية الشعوب الجميلة المبتكرة الخلاقة المبدعة..!! في تلك السنوات يا علاء ..يعني ناس 2010 وانتا ماشي..كانت الإذاعات المحلية في مدينة كالقري..كل دقيقة والتانية تبث اغنية بصوت المبدعة رشا شيخ الدين..!! طبعا صاحبي الحاج صو..سمع رشا وحمزة..وصار يكاويني..بانو اي سوداني اسمو ما فيهو (الدين) ده ما سوداني اصلي..!!..ياخي قربت اقول ليهو اسمي (كبر الدين)..!! رشا يا علاء..خرتونا فيها اهلنا اللاتينو (ناس لاتين امريكا)..وزاد الطين بله..انها نالت جائزة افضل فنانة بتغني باللغة الأسبانية..!! ياخي صديقتنا اسمها ماريا خوزية..اقول ليها رشا سودانية..وتحلف بدين ابوها اني افريقي حيوان ساكت ومتسلبط كمان..!! هل تصدق يا علاء..جبت لماريا دي رشا بتغني عذاري الحي (واتبثت في اذاعات كالقري بضبانتها) ..وماريا قالت لي رشا عبقرية..ممكن تغني بأي لغة..!! دي وقائع يا علاء..والله صحي..!! صاحبي الحاج صو..سالني من غنية الساقية ، بالطريقة التي غناها حمزة علاء الدين..!! حكيت راسي..ومن طفاستي جبت غنية العظيم الدوش..بصوت الأستاذ حمد الريح..والحاج زول بيحب التفاصيل وتفاصيل التفاصيل..ولمن ترجمت ليهوالشغلانة..قال لي: ده ابتذال..!! ياخي قربت اديهو بنية في وشو..! قمت جبت ليهو صورة الساقية في فيديو..!! قال لي النواح بتاع حمزة بيشبه كتير حركة الساقية..! طبعا غلبني اترجم ليهو (صوت القواديس والمياه)..!! وليه نواح حمزة ما يشبه شكل المناحات في ثقافات البقارة النادرة المسكوت عنها؟؟؟! من مناقشات واحاديثي مع صاحب السنغالي الحاج صو..انتبهت لحتة العود والطمبور..والحاج مؤمن للغاية بانو الآلات دي نوبية مية في المية..!! شعوب افريقيا ، خصوصا ناس غرب افريقيا ، عندهم ايمان كبير بانسان النوبة في شمال السودان..! ياخي واحد صاحبنا ، اصفراني ، من الكنغو..ذات يوم العيش قام بيهو..واشتغل سورة الفاتحة بايقاع جالوبة لمن قلنا الروب..ولمن انتهى منها ملانا ليك فك ثم فك..وقال لينا ليه وردي ما غنا الكلام ده..!! قام احد اصدقائنا السودانيين..قال ليهو..بانجليزية فصيحة: يا ولدي..وردي لو غنا الكلام ده راسو ح ينقطع ..!!! اقولها لك بصدق يا علاء..الأفارقة اللاقيتهم في كندا (تجربة طمنطاشر سنة)، سواءا من شرق القارة او غربها او جنوبها ، فيهم مثقفين ومثقفات ، ناس ثقافة عالية ، ودايما عندهم السودان بمثابة الأخ الأكبر (اغرب حاجة يا علاء ، معظهم ما مقتنعين بحكاية سودانيين..!!) ودايما مدخلهم للكلام عن السودان ، هو انسان النوبة في الشمال..!! هكذا هو التراث والفن يا صديقي..وليتنا نفهم ماذا يعني ذلك..
اهديك هذه المادة للموسيقار حمزة علاء الدين..اسمها الساقية..!
ما تعاين لصوت حمزة والنواح النبيل..عاين ردود الناس..البتتكلم عن حمزة..!
رون ماسي..قال اتشرف العمل مع حمزة علاء الدين..ولا يذكر منه سوى التواضع الجم..!!
هكذا انسان النوبة..انساننا الجميل..كيف غزا العالم بالإبتكار والإبداع..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست