محمد عبد الماجد الصايم أو أي كان اسمه ..(فكــه التيكــة) ..

Quote: شوكرا يا عمكـ على المايكـ! يا عمكـ البورض دا المقياس عندو ما مزبوط! أي والله ناس بتدي نفسها الحق في قول أي حاجة تحت مظلة (المعارضة) ولما الناس تقول الكلام دا ما صاح يكون الرد إنو دا (تصرف فردي)! نفس الحاجة لما تحصل من الجانب التاني يكون طوالي الحكومة عملت والحكومة سوت! ليه ما يكون التصرف دا تصرف فردي برضو وكل زول معلّق من باسووردو؟ مثلا العنوان بتاع علي عجب بتاع اغتصاب الفتيات دا! أنا شخصيا لما دخلت عليهو دمّي فاير عديل ومنتظر المعلومات منو ومتأكد تماما إني لو ما كنت أول واحد دخلوا فأنا من أول خمس أشخاص قروا البوست!! اتوقعت إنو يكون فيهو حوادث اغتصاب فعلية وإفادات وشهادات .. لقيت الكلام كلو عن محاولات وفي النهاية جاي من مصدر بالنسبة لي بختو في مرتبة واحدة مع الـ smc! الناس بكل بساطة اتغاضت عن الكذبة الرئيسية الموجودة في البوست وأكلتا في حنانا عشان خاطر المعارض!! أخونا في الله المعارض القدام الناس هنا سأل واحدة (إنتي مطهرة ولّ غلفا) ما ياهو قاعد وحايم مع الناس جوه البورض لا في زول طالب برحيلو ولا الناس اشتغلت بالموضوع كتير! برضو تصرف فردي .. مش كـدا؟ معارض تالت فاتح بوست حدادي مدادي يدين ويشجب العنصرية والناس تصفق وتهلل وتدين وتشجب وتستنكر! لما الحقيقة طلعت وإنو البوست كلو ملفق الناس عملت غمرانة .. والأكتر من كـدا لما (المعارض) دا ما لقى طريقة يمرق بيها من الزنقة بتاعت (الما موالي) أول حاجة عملها فتح بوست مليان عنصرية .. حفرة بتاعت عنصرية وساق المساكين وراهو .. ولا من شاف ولا من دري! ياهو خلاس أجندة ومرّت في سبيل معارضو للنظام!! شفت كمية الأخبار البتتملي في البورض دا لمن يكون في أي حاجة في السودان؟ أها أنا أقطع ليكـ الشكـ إنو كمية مقدرة منها بتكون أخبار كاذبة وملفقة وأي حاجة .. وبرضو بتمر عشان الاسم يمين الخبر (معارض)!! مفروض الناس زي ما بتدي أي واحد الحق إنو يكضّب ولّ يمرر حاجاتو بما إنو (معارض) يكون الحق دا مكفول لأي واحد تاني غيرو كان (موالي) كان (عنقالي ساي)! يا كمان الناس تقيف في حتة واحدة: ندين عنصرية .. أوكي .. يبقى أي عنصري ياخد على راسو! ما تكون القصة مجوبقة ساي ونعصر على دا ونعاين لي دا ونقول إن شاء الله يطلعو #### ذاتو!! _ ولا يفوت عليكم بالطبع إدانتي الكاملة لاعتقال أي بني آدم في سبيل يقول رأيو وما يندرج تحت هذا الاعتقال من أي تصرفات أو عبارات أو أشياء لا تمت لأي إنسانية بصلة! _ المايكـ دا الظاهر بطاريتو كملت