قوقـــل ... قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ

Quote: القال ليك منه إنه مجرد وسيط +++ وبعدين البوست يتحدث عن العلم والمعرفة معاً غير كدا .. المعرفة الموجودة في معلومة قوقل مصدرها الكتاب نفسه كمراجع +++ فكيف يستوي المصدر (ليكون مجرد وسيط) مع الذي يغرف من المصدر ؟

ومال خير جليس؟

وأنا داخل هنا لأني نموذج للمعرفة البيتكلم عنها سيد البوست، يعني أنا الحالة بتاعة الدراسة (case study) وقع ليك؟ لا ياباشا، المعرفة في عقل الانسان، شخبطها في البداية على الحجر، وبعدين اخترع الكتابة وبعدها الورق، ما عشان يفرفرو أو يخت الكتاب على صدره ويتفنقل عشان يقرأ، لا، آآآآي خير جليس أو خير ضجيع لكن دا ما الغرض. دا كووووولو بس عشان نحفظ المعرفة دي، وقع ليك؟ فإذن الكتاب هو مجرد وسيط حفظ للمعلومة وبالتالي المعرفة. وبتحفظها لييييييه؟ لأنك يا أبوعاقلة ياخوي بتحتاج تنقلها من جيل لجيل كنشاط فطري بشري لحفظ النوع، حتسألني حفظ النوع كيف!!!!؟ أوكي كتب تعليم الطب مثلاً، وقع ليك؟ آآي عشان ما تتكرر مشكلتك مع المرض وتنقرض. لكن الشعر والغنا بتاع ناس قباني دا وقص ساكت. حتسالني وسيط (medium) ليه، أها، سيرة الصحابة ديلك جاتنا في فلاش؟ القرآن المكتوب دا جانا في شريط كاسيت؟ هيااااا عمر، ماهي دي كلها بيسموها وسائط، إتا قاعد وين؟ انت بتسمي الكتاب مصدر فقط عندما تشير إليه للتدليل على مكان المعلومة، لكن تعال نسألك: لما تعمل إشارة للكتاب بتكتب اسم الكتاب براهو؟ ولا معاهو الانسان الألفه؟ في الكتب دلوقتي الناس بتشير للشخوص، حتى في نهاية الكتاب بتضع مع اسم الشخص اسم المؤلف بتاعو، تجي تقول لي الكتاب (مصدر). الانترنت يا سيدي خلاف وظائفها الأخرى فهي (وسيط) للمعلومات حفظاً ونقلاً دا التعريف المجرد، لما تشير لمصدرك على إنو الانترنت بتجمل التسمية إجمالاً لأنك ما حتقدر ترصد كل المعلومات الاتحصلت عليها وتسردها في المؤلف بتاعك. +++ إذا بجملة (مع الذي يغرف) بتقصد تسميني (وسيط) فأنا هنا ما (وسيط حفظ) زي (الكتاب) يا عمر، أنا ناقل، يعني أنا ما حافظ أي حاجة بنقلها للناس هنا، لا، أنا زيك وزي قباني لما الواحد يقرأ كتاب ويجي يتكلم هنا، كلنا بنغرف بس في واحد بيغرف من جردل والتاني بيغرف من بحر. دلوقتي الوسيطين ديل (الكتاب) و(الانترنت) مافي أي فرق بينهن من حيث الوظيفة الأساسية اللهم إلا الخصائص الأنا ذكرتها فوق (نصية، صوتية، صور إلخ) أو ما يعرف بالوسائط المتعددة (multimedia) في حالة الانترنت. بخصوص عالم وما عالم، دي مكتسبات بشرية متواترة، يعني يا عمر مافي زول بيلدوهو عالم، الفرق بين العالم والجاهل إنو الأول بيسعى للتعلم من شتى (المصادر) المصادر هنا أنا قاصد بيها أصناف المعرفة مش الكتب، وبكل الوسائط المتاحة (انترنت، كتب، أفلام، ونسة شفاهية). المشكلة في أننا كمجتمع متخلف لسة بنعتمد على المشافهة، وبنصر على السماع من أفراد بمزاعم أنهم (مصادر) العلم ودا الخطأ لأنهم هم نفسهم لا يختلفوا عننا سوى في نشاط التعلم وربما في مهارة التذكر والتحليل. ____ comprendes؟

(عدل بواسطة حاتم إبراهيم on 07-12-2016, 07:21 PM)