زمان صديقتنا بيان (دكتورة نجاة محمود) عندها عبارة لطيفة بتقول (لبسنا كبك الحديد)..أها في تلك الأيام القديمة ، برضك بعض الحناكيش حكاية (الكبك) ما واقعة ليهم..اما ناس الليلة.. ربك يعلم يااااااااااااخ..! خيطك ده ، ودخول صديقنا ابوذر عمر (ابوذر والله فكرتك بتاعة الفيديو المصور دي سمحة خلاص..ياخي لمن قلت يا ريت ناس سودانيز اونلاين يوافقوا عليها)..الخيط ذكرني يا يحي معلقة عمرو بن كلثوم..! في البداية فكرت اخت ليك شغل لمحمد حسنين (ابو سريع)..وفي راسي حاجة فيها كلام (اصلو الجمال راس مال) ، واتذكرت انها في السايق البوباي..اها مشيت لحاجة تانية ..(نغيم فاهك يا ام زين)..ولم اجد مطابق لتلك الجميلة غير (يا ام زين)..وهي فعلا ام زين بحق وحقيقة..عجبتني بصوت قسمة..ولكن..! الحوامة انتهت بمعلقة عمرو بن كلثوم..وبيت معلوم..اكيد الجميع بيكون متذكرو..ونشرب ان وردنا الماء صفوا..و يشرب غيرنا كدرا وطينا.. عضلات تبش يا قريبي..! (عضلات الوعي يا شيخ حاتم..!!) اتذكرت بداية ايام الأولى في تلك الجميلة المستحيلة ، او ام زين في عرفنا نحن ناس وعي القبائل..!!.. احد الصديقات ، ونحن برالمة ، قالت لي: اكره معلقة عمر بن كلثوم..! قلت ليها:ليه؟ قالت: ياخي زول يبدا معلقة بقعدة..! وقتها عرفت المفازة الماشة قدامي..!!
وعرفت حاجات كتيرة..خمس سنين كانت ولازالت اجمل سنوات حياتي الفانية..فالموضوع لم يكن مجرد اكاديميات وتحصيل..وانما كان حياة غنية بالألوان كما ذكرت انت:السياسة ، الأيدولوجيا ، الإجتماع ، الأنثروبولوجيا ، الإقتصاد ، الفلسفة ، الهندسة ، العلوم ، الطب..تنزعط محاضرات..تمرق في الشوارع الصغيرة تلقى ما هو اجمل وافيد مما تعلمت في قاعات الدرس..!! تلقي الناس المفارقة البتقول ليك (ككيف يبدا معلقة بقعدة)..!! فكرة (كائن اساسي) ، كانت بتقولها لي صديقة برلومة (التحية ليها اينما كانت)..وهي من صميم اعمال الفيلسوف مارتن هيدجر..ناهيك عن رندوك ميشيل فوكو وجاك دريدا..الرندوك الذي كان يوطن في ثقافة محلية نطاقها مجتمع الطلاب في بقاع ام زين..!! شكرا لتصحيح الموقف يا يحي ، الذي كنت اتوقعه من الكثيرين والكثيرات ، حكاية القراية الفاطة تلاتة سطور بالمرة..فألأمر ليس افضيلة جامعة الخرطوم ، وانما الأمر هذه تجربة من سنين عمرنا المرة وكانت باختيارنا ، وانفقنا تلك السنين ، ولن نرضى ان يشطبها احد بجرة قلم او كيبورد عاير ساكت يملانا سفاهة وفقر في السهلة..عاجبانا..ويا ريت كل زول/ة يمرق تجربتو من غير تأفف..لأن الصراع هنا صراع اخلاق..وما تعلمناه في كل مراحل التعليم سواءا في السودان او خارجه ، هو حصاد من حقنا ان نفتخر به ونتباهي به وندافع عنه..!! الناس العاتبة على يحي قباني ، الموضوع ليس جامعة الخرطوم ، الموضوع صراع ضد الفوضوية واللآ اخلاق (صديقنا عبد الصمد متابع ومترصد كويس لصديقنا ول ابا محمد الأمين موسى غيره)..ده واجب الجميع..وعلى الجميع ان لا تهزمهم حكاية استخدام قوقل (طبعا اسمها اليومين ديل صار الف باء)..ولا غيره..!! من يريد ان يتمرد عليه بان يكون قدر التمرد..بخلاف ذلك النقة الماجيبة حقها اخير تقيف..!!
الى حبيبنا ابوذر..كنت داير اجيب ليك تشجيع ناس هندسة لكن خفتا نفتح جبهة معارك (خصوصا ناس افتصاد)..لكن الكحة ولا صمة الخشم..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست