الرقصة الفي الفيديو هي رقصة المردوم..بالمناسبة الحفلة دي كانت في شهر مايو 2011 في جنوب كردفان ، وبعد شهر بدت الحرب..!!
اما العجكو..فهي حاجة قديمة وسادت في الأربعينات والخمسينات من القرن الماضي..
اصلا هي اغنية تقريبا بدايتها (العجكو ، عليّ منعوا)..العجكو من الفعل عجك أي عجن أو عطن..ولو متذكري ناس ثنائي العاصمة عندهم غنية فيها عبارة (عجوة معطونة في عسل)..!..ومنعوا..أي رفضوا ..والفكرة انو حرموها من حبيبها..وزوجوها زول تاني..!! ولأنها اغنية شعبية ..زي غنية الجنزير التقيل..فكانت كل مجموعة بتضيف عليها حاجة ..!..لو اتذكرت ح اجيب ليك اقرب نموذج للنص الأصلي..
طلاب جامعة الخرطوم..في اواخر الستينات تقريبا.. شالوا الأغنية دي وصمموا عليها رقصة..واشتغلوها في الجامعة وجابت كعة مشهورة في تاريخ جامعة الخرطوم والمشهد السياسي ..والكيزان كانوا رافضين انو الرقصة دي تتقدم في مسرح الجامعة ..ومن هناك صارت عبارة (رقصة العجكو)..!
اسبوع كردفاني الثاني..كان قبل دخولنا الجامعة بي سنة..وكانوا جايبين الفنانة امبلينا السنوسي..والكيزان لأنو متحسسين من حكاية (العجكو) قام هددوا امبلينا وقالوا ليها اوعي تجي تغني في اسبوع كردفان ، اها ناس كردفان سمعوا بالخبر..ومشوا لأمبلينا (كيزان وانصار سنة وشيوعيين وبعثيين وانصار وختمية واتحاديين وحزب امة..)..وقالوا ليها لازم تجي وتغني غنية العجكو كما..والجماعة في الحفلة..كل واحد كفّ لياقة القميص..عشان ينفرزوا من الجماعة التانيين وجابوا عكاكيزهم وحرسوا الحفلة...ياخي قالوا امبلينا السنوسى غنت بمزاج شديد خلاص..!
طبعا ابطال الكعة بتاعة اواخر الستينات.. معظمهم لغاية الآن عايش..وقاعد يتفرج ويستطيب في رقصات اكثر افصاحا من الرقصة بتاعة ناس جامعة الخرطوم ديك..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة