مآلات ضرائب السعودية على بعض الأوضاع في السودان

Quote: كرهتونا الناس كرهونا الونسة اصبحت مملة واتساب تلفون فيس كلو الرسوم وما ادراك ما الرسوم . في السودان لما الكيزان شالونا من البنك كانت صدمة خاصة الزول كان شغلو كلو في مناطق شدة اها لما جيت السعودية تاني اشتغلت في بنك بعد معاينات صعبة قعدته لي كم شهر جاني خطاب امشي خامس مشيط قربت اقول ليهم النكته التقليديه البايخه بتاعت المعلم النقلوهو من محل اسمها شق لي محل اسمها شقوق قال ليهم انا ضب ، رفضت امشي فصلوني الحادثتين ديل خلو عندي مناعه ضد اي قرارات اقتصادية او تخص العمل قبل ما اخش في الموضوع أنا ما ماشي من السعودية وقاعد ها هنا الي ان اصل مرحلة اكل التميس ((رغيف الباكستان)) . لما تصل مرحلة الديون بنرجع السودان يعني بالبلدي ((كلو واشربو حتي يتبين لكم الاكل بالدين أم بالراتب)) عشان تاني مافي زول ارفع لي تلفون اقول لي عايز تعمل شنو ؟؟؟؟ من ابيخ الاشياء واحد اتصل عليك اقول ليك انت مع مرتك عندك كم شافع مالك ومالي انشاءالله عندي روضة ، اتذكرت حكاية صاحبنا زمن العذابة كان عازمنا ليلية ساهرة في حديقة بيتو والناس قاعدة فجأة جات مرتو داخله ماشاءالله عليها سلمت علينا وخشت جوه بعد العشاء قال لي ولدو تعال غسل لي اعمامك ديل يديهم اها في واحد صاحبنا واقف طينه بعد غسل قال لي ولدو قول لي امك احنا ماشين صاحبنا مررها ليهو تاني قام كررها قال ليهو عليك الله خش جوه اخد ليك قدوم منها واطلع. مالك أو مال مرتي وشفعي !!!!! الموضوع... من ضمن الرسائل البتجيك حكاية الرسوم تقوم تحولها لي ناس تانيين ... حسنة يا محسنين... لي شقاوتي امس حولت لي زول كيف تحسب انت واسرتك الرسوم يا ريت ما رسلتها ليهو كل نص ساعة اتصل علي سؤال بعد الاسئلة كملت بقي بدون شغله اتصل علي أها يا عباس الدبارة كيف ؟؟؟ لما حسيت الدبارة بقت حبال. الليلة الصباح اتصل علي كم مرة اطانشتو بقي ساكيني بالثابت رفعت السماعه اول حاجة اداني كم كلمة عتاب وبعدها طوالي كبر (( الله اكبر... الله اكبر.... الله اكبر)) أنا كاره الحكاية دي عند الكيزان ، في شنو يا زول ؟؟؟ قال لي ما شوفتا جريدة الرياض امس انا رسلت ليك في الواتساب الملك لغي الرسوم . قلت ليهو دا شغل فتوشوب كلام زي دا مافي اولا الخبر الحايم في الواتساب مكتوب عدد امس هل يعقل من امس تظهر الليلة ثم تانيا انا كل يوم اول حاجة بطلع علي الجرايد في المكتب هنا كلام زي دا مافي. الراجل قال لي لا حولا ولا قوة الا بالله يا عباس الله يازاك كان ازيتني . قلت ليهو يا زول دا كلام شنو عيب منك!!! قال لي بعد رسلت ليك الواتساب رسلتو للمراة وكان متفقين بعد العيد اشتري ليها ايفون بعد قرار الرسوم اتنازلت عن الايفون وبقت في طريقة القعاد هنا بعد رسلت ليها الواتساب بتاع جريدة الرياض قالت لي ما تنسي الايفون وجيب لي معاك سير رياضة عايزة انزل جسمي انت ما رديت علي وانا حسب الشفقه والفرحه اشتريت الله لا كسبك اسمك بشطبو من جوالي. يا جماعه بخصوص الرسوم تاني مافي زول اتصل علي انا الموضوع دا مجليهو وقاعد هنا حتي يظهر الريال الفيهو صورة ولي العهد