|
Re: المدعي العام لإقليم جبال النوبة/ جنوب كرد� (Re: Khalid Kodi)
|
زمان وقبل سنوات ، حينما كتب الإنثروبولجست السوداني الدكتور حامد ابراهيم البشير (اصوله من جنوب كردفان/جبال النوبة) سلسلة مقالات بعنوان : ماذا يريد النوبة؟..كنا نستنكر عليه هذا السؤال الذي كنا نظنه بديهة من البديهيات التي لا يتجادل فيها اثنان..!!
الآن بعد ما يحدث في الحركة الشعبية شمال ، دون ان نشعر وجدنا انفسنا نردد نفس السؤال بتصرف بسيط (نرجو الأ يغضب استاذنا دكتور حامد البشير): ماذا يريد النوبة في قطاع الجيش الشعبي لجبال النوبة (هذا هو المسمى الذي نعرفهم به ونحترمهم وندعهم به)؟..
حكاية عقار وعرمان اتفصلوا من الحركة الشعبية ، وحكاية تكوين حزب جديد ، وحكاية خيانة المانفستو الأساسي..كلها امور معروفة ومدركة ويقرأها أي مواطن في جنوب كردفان/جبال النوبة ، والسودان ، جيدا..فماذا يريد اهلنا في قطاع الجيش الشعبي لجبال النوبة /جنوب كردفان؟..
نقة الثورة مستمرة والخاين يطلع بره..ده كلام الحناكيش اليسارين (تحديدا الشيوعيين) يا اخونا متوكل..نحن ناس جنوب كردفان دايرين تصور واضح: الجيش الشعبي بتاع قطاع جبال النوبة ، ومعاهو مجلس التحرير، داير شنو بالضبط؟..وشنو المطلوب مننا نحن اهل المنطقة عشان الناس تثق في مصداقيتو وتدعمو (حتى لو باضعف الإيمان)..؟..
الحركة الشعبية شمال ، يا متوكل ، حتى في غياب عرمان وعقار وزعيط ومعيط..لسه فيها انتهازيين خانوا قضية جبال النوبة..والخيانة التي اعنيها حرص البعض على استمرار الحرب بعد ان فقد الناس البوصلة التي تحدد اتجاه الحرب ماشة علي وين..؟
انا مواطن من جنوب كردفان/ جبال النوبة يا سعادة المدعي العام لإقليم جبال النوبة/جنوب كردفان ، وسؤالي بسيط: انتو دايرين شنو وماشين علي وين بالضبط؟ والمطلوب شنو من مواطن جنوب كردفان الذي تخوضون الحروب في دياره (دون استشارته)؟..
فكرة (تقرير المصير) يا متوكل ، ومعاك استاذنا عبد العزيز الحلو ، نحن اول من ابتدرها هنا ايام بداية حرب ستة ستة 2011 ، وقام عار بيها الناس ، وبعد ما شفنا الإقليم (جبال النوبة/جنوب كردفان) زغنا منها عديييييييييييييييل يا قريبي..تقرير مصير نمشي بيهو وين يعني يا عبد العزيز الحلو؟ نمشي الجنوب مثلا؟ ولا نمشى مع النوير في شمال دولة جنوب السودان؟..لآحظ يا عبد العزيز الحلو انت من الناس الكانت بتقول الواقفين مع النوير في انشقاق الناصر مفروض يتصفوا جسديا..وحصل مرادك يا قريبي..وفقدنا رجال في ضيقة نفس ساكت..ولا انت نسيت يا عبد العزيز؟..
الفات مات يا اهلنا..والمرارات عندنا القدرة نتجاوزها ، ولكن السؤال باقي: الجيش الشعبي قطاع جبال النوبة داير شنو بالضبط؟..
فهمونا الله يرضى عليكم..!!
في بداية التسعينات..لمن ناس تلفون كوكو قالوا ليكم الحرب دي ضرت انسان جنوب كردفان ، استاذنا المرحوم الشهيد يوسف كوه عمل اجتماع لمجلس التحرير بجبال النوبة..وسأل سؤال بسيط: نواصل في الحرب ولا نقيف؟..النساء كانت اصلب العناصر وقالت ليهو: نواصل الحرب..!!
اليوم فقدنا تلفون كوكو....فقدنا يوسف كوه ..فقدنا ناس كتار للغاية..وبقت الحيلة اننا بقينا مخالب قط نتنة نفتعل المشاجرات بمظنة انو عقوبات امريكا الإقتصادية ما تترفع من السودان..!!
عقار وعرمان يا شيخ متوكل (اوعى تقول لي مبارك اردول ليس بشيخ انصار سنة؟)..بقوا ماضي..المطلوب شنو بالضبط ، والآن..؟..
لا تسكب الدموع على اللبن المسكوب..ورونا بالواضح انتو دايرين شنو بالضبط؟..
كبر
|
|
|
|
|
|
|
العنوان |
الكاتب |
Date |
المدعي العام لإقليم جبال النوبة/ جنوب كردفان مولانا/ متوكل عثمان سلامات في حوار الساعة | Khalid Kodi | 06-29-17, 06:42 PM |
Re: المدعي العام لإقليم جبال النوبة/ جنوب كرد� | Khalid Kodi | 06-29-17, 06:45 PM |
Re: المدعي العام لإقليم جبال النوبة/ جنوب كرد� | Khalid Kodi | 06-29-17, 06:59 PM |
Re: المدعي العام لإقليم جبال النوبة/ جنوب كرد� | Biraima M Adam | 06-29-17, 09:14 PM |
Re: المدعي العام لإقليم جبال النوبة/ جنوب كرد� | Khalid Kodi | 06-30-17, 03:59 AM |
Re: المدعي العام لإقليم جبال النوبة/ جنوب كرد� | Kabar | 06-30-17, 06:28 AM |
Re: المدعي العام لإقليم جبال النوبة/ جنوب كرد� | Khalid Kodi | 07-01-17, 01:46 AM |
Re: المدعي العام لإقليم جبال النوبة/ جنوب كرد� | Kabar | 07-01-17, 09:24 AM |
Re: المدعي العام لإقليم جبال النوبة/ جنوب كرد� | Khalid Kodi | 07-01-17, 10:07 AM |
Re: المدعي العام لإقليم جبال النوبة/ جنوب كرد� | Khalid Kodi | 07-01-17, 10:22 AM |
Re: المدعي العام لإقليم جبال النوبة/ جنوب كرد� | Abdullah Idrees | 07-01-17, 02:32 PM |
Re: المدعي العام لإقليم جبال النوبة/ جنوب كرد� | Khalid Kodi | 07-02-17, 00:25 AM |
|
|
|