|
Re: أبو كريشة (Re: درديري كباشي)
|
أبو كريشة 6 بعد هذا الجو المرح الذي ساد البيت منذ عهد بعيد لم يروا مثله . - يلا يا ام صلاح حتعشينا شنو الليلة ؟ - والله كنت ناوية أعشيكم عصيدة باللبن .. لكن رأسي واجعني شديد ما بقدر أعملها . - ما مشكلة أنا بعملها لكن طلعوا الكانون برة ( المنقد ) ما بدخل راكوبتك دي تقوم تطقنا عقرب ولا مصيبة . - يا أبوي أنت تعرف تعمل عصيدة .؟؟ - يا ولد أنت فاكر أبوك دا ما يعرف يعمل حاجة غير فك الكفرات ورقعتها .أمك دي لكن كانت تنفس بولادتكم الكان بيعمل الأكل منو ؟ أسألها ؟.. - صحي يا أمي ؟؟ ردت بإماءه من رأسها وهي تضحك .. هذا أحمد رأسه متعجبا كأنه يقول في سره لأبيه أنت انسان فاضل لماذا تحيل حياتنا لجحيم بهذا السكر اللعين . لكن الاسئلة ماتت في جوفه .. ورغم مواتها حس أنها وصلت لوالده بطريقة ما .لأنه لاحظ له حنى رأسه ناحية الأرض بانكسار وتظاهر بتجهيز المنقد وردمه بالفحم وإشعال النار . - خلاص يا أحمد شيل البستلة (أناء ألمونيوم ) أمشي أحلب الغنم ..شيك معاك الفانوس ما تتعتر تقع . أحمد بكل حماس حمل البستلة والفانوس وجرى ناحية زريبة البهائم في ركن البيت . شرع أبو صلاح في اشعال النار .. وبتوجيهات من أم أحمد من سريرها بدأت تؤشر له على مكان الدقيق والكبريت .. وعلبة السكر وخلافه .. وهو بكل حبور وسعادة يطيعها .. شعر كأنه قد عثر على شئ أفتقده منذ زمن طويل .. شعر بروح العائلة وحب الأسرة .أشياء بسيطة كانت بين يديه أضاعها برعونته .. وكادت أن تهدم بيته بل هي هدمت منه الكثير وبقي القليل .. كيف يمكن أن يحافظ عليه .. كيف ؟. أحضر أحمد لبن الغنم . وجهز والده العصيدة .. وبدأوا في تفوير اللبن . وتناولوا مع بعض لقمة هنية لا تضاهيها أعتى مائدة في أفخم قصر . طعمها الحب والوئام . - والله تراك ما نسيت خدمة البيت يا ابو صلاح . رد ضاحكا : هو ركوب العجلة بيتنسي .. - هسع يا أبوي الجاب العجلة للعصيدة شنو ؟؟ أنفجروا ضاحكين . - يا بليد دا مثل بيقولوه كدا أنه الزول لواتعلم حاجة أساسية تاني حتى لو وقف منها عشرين سنة ما ينساها . - عندي سؤال يا أمي وابوي ليكم الاتنين .أنتو ليه ما قريتو وكملتوا تعليمكم ؟ - أنا غايتو مرقني أبوي من المدرسة عشان أعرس أبوك الشين دا ؟ - شوف اللبط بتاعة المدرسة تتذكري أنا لمن قلت ليك لو عاوزة تكملي تعليمك أنا بنتظرك . قلت لي يا راجل ها قراية شنو ؟؟ - يلا سلام عليك يعني انا سبت قرايتي ليك ليه هو أنت ود العوض ؟؟؟ - أها ود العوض دا كمان منو ؟ بعد ما أنفجر والده بضحكة عميق’ - ود العوض دا أبوه تاجر كبير وكان مكسر البنات زمن ناس أمك ديل و هو زول بليد ساكت عايد في الابتدائية عشرين مرة ؟؟ وانفجر بالضحك . - حرام عليك والله ود العوض كان شاطر أبوه مرقو من المدرسة وشغله معاه في المحلات هو أنت وينا قرايتك لا قروش ولا علم بس فصاحة ساي . - يا مرة أنت زعلتي مالك عاوزة تقليبها غم ما كنا مبسوطين؟طيب مالك ما عرستيه لو كان هو عايزك ؟ - والله أنا ندمت على سؤالي .أحمد متدخلا بعد ان شعر بتسمم الجو.. عادت للضحك وقالت : هوي أنا عاوزة أكاوي أبوك دا ساي لأنعي عارفاه كان بيكرهه . وود العوض فعلا ولد مدلع وعوير وفاكر انه أي بنت تعجبه ممكن بقروش أبوه يعرسها .. وأنا ابيتو تب كنت متعلقة بأبوك دا قايله فيه فائدة .. ؟؟ - أها رجعنا للغلط تاني ..هاهاهاهاها - ما االغلط لسع في ما نرجع له كيف ؟ - ليه الغلط وينو ؟؟. ما ياهو دا جايبه معاك ؟ - قصدك قزازة العرقي ؟ - هو في غيره القشري دي ؟ - يعني أنت ما شايفة فيني عيب غير العرقي دا ؟ - الليلة بس اتأكدت لي تماما ما فيك عيب غير العرقي دا .. - يبعني أقوم أكشحه في الأدبخانة ؟ - ويا ريت للأبد والله تكون أحسن زول في الدنيا دي كلها ولا ود العوض ولا غيره يساوي ضفرك .. طيب .. و فعلا يحمل زجاجة العرقي يعطيها لأحمد يلا أحمد هاك دفقو .. تقوم بسرعة تخطف منه الزجاجة .لا لا لا لا أحمد لا .. تدفقه أنت بنفسك .. ( خافت أن يحاول أحمد تذوقه ويبدأ هو حين ينتهي والده ) أخذ الزجاجة وتوجه ناحية المرحاض وقريبا منه وقف وقال لها :: بس تسمحي لي بجغمتين ( جرعتين ) آخر جغمتين والله . أنفجرا بالضحك هي و أحمد وقالت له ( مافي مانع يلا آخر جغمتين ..) يتبع
|
|
|
|
|
|
|
العنوان |
الكاتب |
Date |
أبو كريشة | درديري كباشي | 06-01-17, 08:18 AM |
Re: أبو كريشة | عبدالعظيم عثمان | 06-01-17, 08:51 AM |
Re: أبو كريشة | درديري كباشي | 06-03-17, 07:42 AM |
Re: أبو كريشة | درديري كباشي | 06-03-17, 07:45 AM |
Re: أبو كريشة | درديري كباشي | 06-03-17, 07:46 AM |
Re: أبو كريشة | زهير حيدر صديق | 06-03-17, 08:32 AM |
Re: أبو كريشة | يحي قباني | 06-03-17, 09:09 AM |
Re: أبو كريشة | جلالدونا | 06-03-17, 10:53 AM |
Re: أبو كريشة | عبدالعظيم عثمان | 06-03-17, 02:26 PM |
Re: أبو كريشة | درديري كباشي | 06-06-17, 09:51 AM |
Re: أبو كريشة | درديري كباشي | 10-03-17, 08:39 AM |
Re: أبو كريشة | درديري كباشي | 10-03-17, 08:59 AM |
Re: أبو كريشة | درديري كباشي | 10-03-17, 04:43 PM |
Re: أبو كريشة | Elsanosi Badr | 10-03-17, 06:56 PM |
Re: أبو كريشة | عمر التاج | 10-03-17, 07:30 PM |
Re: أبو كريشة | درديري كباشي | 10-04-17, 05:52 AM |
Re: أبو كريشة | درديري كباشي | 10-04-17, 05:48 AM |
Re: أبو كريشة | almulaomar | 10-04-17, 08:41 AM |
Re: أبو كريشة | درديري كباشي | 10-04-17, 08:47 AM |
Re: أبو كريشة | درديري كباشي | 10-04-17, 09:43 AM |
Re: أبو كريشة | درديري كباشي | 10-04-17, 03:18 PM |
Re: أبو كريشة | درديري كباشي | 10-04-17, 04:54 PM |
Re: أبو كريشة | درديري كباشي | 10-05-17, 06:22 AM |
Re: أبو كريشة | درديري كباشي | 10-05-17, 04:22 PM |
Re: أبو كريشة | درديري كباشي | 10-08-17, 06:17 AM |
Re: أبو كريشة | درديري كباشي | 10-08-17, 04:51 PM |
Re: أبو كريشة | درديري كباشي | 10-12-17, 04:28 PM |
Re: أبو كريشة | درديري كباشي | 10-14-17, 06:43 AM |
|
|
|