حينما كنت اشاهد هذه الحلقة ، ومحاولة كتابة خاطرة عنها..مرت الحيكومة (المدام) وتوقفت تتفرج معي..ثم مطت شفتيها سخرية وهي تقول بامتعاض عجيب (تلطشوا من الناشونال جيوغرافيك..وتجوا تخمونا)..!! حلفت ليها بكل غالي ورخيص..ياخي حتى بحياتها..انو المناظر دي من امسودان..!! ثم اعادت الفرجة..وحاولت تعتذر..لكن المكابرة ما بتخلي السوداني ولا السودانية يعترف بالخطأ..ثم قالت..بلد جميل يااااااااااخ..! قلت ليها الشباب ديل عندهم تحدي اسمو : السودان كما لم تره من قبل..!! ثم عدت لشجني الخاص وانا احاول جاهدا ان استحضر قصائد شيخنا واستاذنا دكتور سيد احمد الحاردلو (بكائية على بحر القلزم) فاكتشفت ديوان شعر (بحر القلزم) لمحمد احمد اوهسين..!! ولأن زامر الحي لا تطرب مزاميره..حتى لو بينك وبين نفسك.. فتذكرت مغامرتي في روايتي (التعاريج) حينما قررت ان انقل احداثها الى البحر الأحمر(لم ارى تلك المناطق من قبل) تحديدا ..مدينة بورتسودان (شخصية الرواية واجدة/ التي شاركت في محاولة فاشلة لإغتيال رئيس دولة مجاورة والمشاركة في اختطاف طائرة كانت متجهة من بورتسودان الى الخرطوم..لينتهي بها الأمر مقعدة ، تواصل المشاركة في الأحداث لغاية نهاية الرواية)..وكان في خاطري وقتها صورة مطعم يطل على البحر..فحينما رأيت تفاصيل سنقنيب..انتابتني احاسيس متضاربة..فهل املك خصلة التنبوء او الحاسة السادسة لهذه الدرجة..!! كتر خيرك يا البصير..وهذا نادر جدا في رجال ونساء الإعمال في امسودان..واعني اهتمامك بهذه المحمية الطبيعية الجميلة (وصدقني هي عندي اجمل بقعة في العالم..وكل عزائي انها في امسودان الجميلة).. وتحية كبيرة لصديقنا الغواص احمد عبد اهلي (ديجانقو)..وحينما ذكرت ان بيل غيتس مكث اربعة شهور في امسودان..بدون ما اشعر سألت روحي: يا ترى كم جبخانة وكم طلقات صرفناها في تلك المدة في بقاع اخرى من امسودان؟.. كلما اقرا عن اسماء الكليات والجامعات في امسودان..كنت اتوقف كثيرا قدام اسم كلية (علوم البحار) في البحر الأحمر بورتسودان..واسرح بالخيال: يا ربي الناس ديل بيقروا شنو؟..وهي كلية نادرة ونتمنى ان يوفق اهلها في استمرارها..!! امنيات بمتابعة طيبة.. كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة