الحلقة الثالثة.. البجراوية.. وانا اشاهد هذه الحلقة ، طافت في خاطري بعض الخواطر.. ليه الإهرامات ما بتندفن؟..يعني لو ملاحظين الرمال بتزحف وبتزحف ولمن تجي للهرم بتقيف وبعيد كمان؟..ملاحظين الحاجة دي؟.. في نفس الوقت..الأشكال الهندسية (المربعات ، المستطيلات..الخ) اندفنت وتم حفرها ..والبعض اثار الدفن ظاهرة فيهو ..!! الناس العاشت في شمال كردفان ، بتلاحظ نفس الفكرة عن القطاطي..يعني تعمل ليك سور حوش (خصب..طين ، طوب..الخ) بمرور الوقت ح يندفن..لكن القطية ما بتندفن نوهائي..!! طبعا هناك قرابة بين شكل الهرم والقطية (تحدثنا من قبل عن هذه الملاحظة بصورة خاطفة)..! اهلنا في الجزيرة..والوسط.. بنلاحظ عمران جميل وخاص للغاية..وهو قباب المشايخ..وهي مدافن (متذكرين وظيفة الهرم شنو؟)..والقباب تبني بصورة جميلة وزاهية..وبتعيش لزمن طويل.. فهل يا ترى اهلنا بيحاولوا يتذكروا كيف بنوا الإهرامات زمان؟.. الباحث وضيفه..ذكر طرفة لطيفة.. ان احد الأماكن كان ملتقى للألهة الكبيرة..يعني نظام (يوم المهرجان)..يعني مهرجان ديني..واكيد بتكون في طبول وضبائح (قرابين)..!! ياترى الشغلانة دي عندها علاقة بفكرة الحولية ؟..وزمان الزول لمن يجي من الحج بتكون حفلة الإستقبال (حولية كاربة)؟.. حكاية الملكات وكيف اتوصلن للسلطة..واخونا دكتور عمر حميدة جاب التفاسير وبعض التوقعات..طيب..جيد جدا.. في دارفور ، ولزمن اقرب من زمن البجراوية والحضارة المروية..هناك ظاهرة الميارم..وهنا نساء بتشارك في الإدارة..وفي واحدة لحقن وظيفة والي (بريمير لناس كندا ، حاكم ولاية لناس امريكا واوربا..).. النقطة الجوهرية في اعتقادي الجازم..انو العادة موجودة..وفي زمن دارفور دخول الإسلام حجم الفكرة والزولة بقت ما بتوصل مرحلة ملكة..!! والأهم..ياترى حكاية ملكات اوربا دي منبعها حضارة مروي؟.. اخر حاجة.. فكرة المغارة/الكهف..والشغلانة في جبال النوبة اسمها (الكركور)..وفي الدلنج مغارة كنا نلعب فيها ايام الطفولة.وهي عبارة عن نفق تصاعدي يبدا من اسفل الجبل وينتهي في قمته..وكنا نمشي هذا المشوار.. هناك كهف مشابه في جبل صغير يقع شمال الدلنج ، وهو جبل الصبي..فيهو نفق طويل وواسع..وكان يستغل لصلوات خاصة لجلب المطر..وعندو طقوس عجيبة ومدهشة..لا نستطيع ان نحكيها الآن..! الخلاصة.. يا يترى عندنا كم مغارة وكهف لازال يحتاج البحث والتنقيب؟.. بلد جميل ياااااااااخ..! نتمنى للجميع مشاهدة طيبة..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة