Quote: هوووي يا ود المدير أنا ما عندي ليك وكِت قاعد ألملم في حاجاتي في الشنطة ومطلوب حضوري لمطار الدوحة بعد ساعة لكن الفيك اتعرفت بقيت تكتب حاجات ناس المدن مفعم بالحنية ؤ شنو كدا ماعارف رِفقتك مرافقانا يا حبيب وأبو السيد أصلو كمان ما فارقنا
يا معاوية يأخي هي مؤانسة تحسسك بوجودنا جنبك ؤ تنقُلك لزمن جميل، والجمعة في شمبات، ثم يأخي ما ادرآك ما الجمعة في ذلك الزمن السمِح بالحيل ؟. صباحها غير الصباحات، والذي يطرق سمعنا بعد العصافير صوت البلبلة الغريّدة ليلي المغربي رحمها الله وهي تتلو ما أعدت من برنامج الصباح، ثم نسعد مع ابناءنا ببرنامج الأطفال والجد شعبان وجحا، والناس يتزاورون ويتونسون حول شاي الصباح ؤ طربيزة الفطور بالفول المصلّح ؤ صحن الصلطة بالجرجير . عادةً بيكون في زول ضابح في الحِلة التِحِت ممكن يكون بعنيب أو الجيلي أو ود الشيخ والشارع لا يخلو من الحركة والمطايبة ؤ صِنج الميزان تتبادل في الكفتين والكُل يتبادلون أطراف الحديث والونسة، ؤ دافوري الصباح عجاجو عاكِل في الميدان . ثم برنامج ما يطلبه المستمعين والرادي في ذلك الزمن دايرلو حرفنة عشان تسمع الجابري ؤ محمد كرم الله وزيدان وغيرهم وإنت راخي أضانك عسى زول عزيز يهديك لحن طروّب، ثم تنقلك موجات الأسير إلي حقيبة الفن فتسمع بف نفسك يا القطار والسمحة ام عجن وغزال الروض واللمين برهان ؤ سرور ؤ كرومة عمالقة الزمن الجميل في ذلك الزمن الجميل، ثم المساجد والصلآة وبعدها لا تدري إن كنت سوف تتغدي في بيتكم أو بيت من بيوت الحِلة ؤ عادي ممكن تكون متغدي في بيت صاحبك ؤ صاحبك متغدي في بيتكُم والغدا كأنه مُتفق عليه إذ انّ الحلة كلها في يوم الجمعة تكون وجبة الغداء فيها مُلآح أُم رِقيّقة بي كِسرة رُهااااافة، ثم العصريات والتمرين ثم الأُمسيات والونسات تِحت العمود وفي القهاوي في السوق والأندية، ثم هآك يأخ، ترجع بالسلآمة يا زولاً سمح بالحيل ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة