الفيديو ..المناظر..الجزيرة ابا..تصوير كاميرا حسن سعيد..ومش مهم..!! المزيكا المصاحبة..الخلفية الموسيقية..ترانيم مسيحية.. (هللويا)..وهي من تأثير صاحبنا المحتفي بيهو يا الطيب..!!!
عموما..
ول ابا محمد فضل الله ..حبابك يا صديق شكرا يا محمد فضل الله..على محاولة ضبط الموضوع.. ول ابا الطيب يكتب من وجهة نظره هو فقط ، والأمر لم يتعلق بعقيدة حتى اللحظة وانما هي تجربة سوداني انبهت ممايرى ، واللغة حمالة اوجه..وهي تجربة كبيرة ومهمة للغاية وبتطرح سؤال مهم جدا: كيف يتعامل السوداني العادي مع التغيير الجذري الكبير؟.. التجربة مريت بيها ايامي الأولي في كندا ، واعتقد اني تجاوزتها بعض الأمر ، ولكن سودانيين وسودانيات كثر صعب عليهم التعامل مع الحال.. واقصد حال: انك فجاة تلقى ليك سوداني/ة بتعتبروا زيك وما ناقص منك حاجة.. وبكل بساطة يقول ليك انا بقيت مسيحي؟.. اتخيل اكتر لو انت زول انصاري..انصارنا الواحدين ديل يا محمد ، وتلقي ليك زول انصاري زيك (سلسفيل جدو انصاري وكاتل مع الإمام المهدي عليه السلام..!!) ويقول ليك بكل بساطة: انا لقيت جيسس.. I found Jesus طبعا الناس ح تندهش لو بقى فيها ناس كانوا اخوان مسلمين (اخوان قبل الجبهة الإسلامية والإتجاه الإسلامي والمؤتمر الوطني) ويقول ليك نحن بقينا كده؟!! وألأظرط ، تكون بقاري زي صاحبك كبر ، وتلاقيهو واحدة بقارية متلو ومن نفس القبيلة وتقول ليهو انا بقيت كده..!! دي النقطة الأساسية يا اصدقائي (المليح واستاذنا احمد الحسين ، وبصراحة احبطتوني شديد ياااااااااااخ)..كيف يتعامل السوداني العادي مع تغيير زي ده؟.. احبطتوني لأني دايما فاكر الجمهوريين (زي اصحابنا الشيوعيين الإتغشيت فيهم..ياخي مؤمن والمؤمن صديق)..ناس تنوير واستنارة وبيلتقطوها طايرة..!! ول ابا الطيب يكتب عن تجربته كسوداني عادي واجه الموقف ده..وهناك اخرين واخريات يواجهون نفس الموقف.. فكيف نعمل ليهم معالجة؟..ياخي ان شاء الله تخفيف الصدمة ساكت .. او تدريب عن قيم التسامح وحقوق الإنسان وحرية الإعتقاد..الخ..!! الأمر هنا يا اهلنا ليس حديث عن عقيدة او ردة.. وانا اتعاملت مع موقف صديقنا الطيب وبلعتو.. لأنو دي قدرتو في الخطاب في توصيف الحال..مرتد..وقسيس..الخ..!! انا اعرف الشخصين (الطيب وصديقنا المحتفى به)..وعندي خواطر كنت اود ان ارفد بها البوست.. عن تجربة كيف تتعامل مع لحظة/تجربة زي دي..؟..وهل تصدقوا يا ياسر ويا سيد احمد..كنت ح اكتب بكامل التضامن وبلغة متسامحة في وصف الرجل المعني ،ليس تحديا لصديقي واخي الطيب ، وانما لنملك الناس خيارات اخرى..! الموضوع مهم وحساس..وفيه تجارب سودانية حية ومريرة للغاية..فكيف نتعامل مع الأمر؟.. واهلنا قالوا ابنقدح بيعرف محل يعضي اخوهو وين..وانا كنت قانص لول ابا الطيب بحكاية ميثاق حقوق الإنسان الكندي الذي قدم عنه الطيب محاضرات ايام مؤتمر الحوار الوطني ومصر انو لازم يتطبق في السودان..!! عموما ، ليتنا نترك الرجل يكمل فكرته ، وسوف نقدم تجربتنا مع نفس الرجل الذي يقصده صديقنا الطيب.. وانا اعرف المعني كثيرا واعرف صديقي الطيب رحمه..!! ويا اصدقائي..الرجل الذي يتحدث عنه ول ابا الطيب رحمة..له زملاء كثر في هذا المنبر ..تقاسموا معه لحظات الشقاء والمسغبة وبيوت الأشباح والتشرد..وهو رجل حبوب وظريف للغاية..لو لاقى واحد فيكم وقعد اتكلم ليهو عن جهاد الأنصار..على بالحلال تشيل ليك حربة (خليك من صاروخ) وتقوم تقع الدواس بي طولك..!! وهو من ابناء الجزيرة ابا..!! التحية له صديقي الجميل ايمانويل وعساه طيب هو اسرته الكريمة.. ومتذكر اخر مرة اتلاقينا في كالقري سنة 2011 ، وكنا ثلاثة ابناء نفس الدفعة والخندق في جامعة الخرطوم (هما اثنان يحملان نفس الإسم الأول ، وهو اسم احد الخلفاء الراشدين ، والإتنين ،طبعا هما غيري ، كانوا في نفس دورة الإتحاد ، واحد في المجلس الأربعيني والتاني كان في المكتب التنفيذي لتلك الدورة)..وصاحبنا عاين لي وصر عينوو قال لي :مالك يا كبر ما داير تهرشني في حكاية اني بقيت مسيحي.. ؟.. ضحكت وقلت ليهو: ياخي فلان ده مشى الهند الفيها ست وتلاتين اله والهة وجانا راجع زي ما كان..يعني فارق معانا انتا..؟؟.. وضحكنا ثلاثتنا.. ومضينا في حالنا.. وبيننا الود..!! ويا صديقي يا سر المليح.. لاقيت صديقنا المعني سنة 2011 ، وكان عابر بمدينتنا.. وسألته عن احواله..قال لي طرفتين: الأولانية.. انو ناس الحكومة لمن شافوهو (بنفس هويته الجديدة) وما اشتغلوا بيهو كتير.. لكن بعد مرق من البلد..عينك ما تشوف الإ النور.. وا دارفوراه.. !!..الحقوا دارفور اتنصرت خلاص.. وشنو كده ما عارف (طبعا يا ياسر انتو الجمهورين بتعرفوا الإرشفة كويس ولو راجعت الفترة ديك ح تلقى الخطاب ده موجود).. الطرفة الثانية.. وهو كسوداني قلبو حار شديد..حاول يستغل معرفتو و اتصالاتو.. وعملوا مؤسسة تعليمية (جامعة قاعدة في سودانك القدامك ده ، وشغالة تش)..اها قال لي يا كبر..سوينا الجامعة واخترنا ليها راعي (كشخصية سودانية مرموقة)..لكن على بالحلال ما ح اوريك اسم الراعي ده عشان تلقاها فينا فرقة...!! وقلت ليهو: انت وراعيك تطيروا ما تركوا ، كفاية الجامعة ، مش ح تستقبل عيال وبنات من امسودان..! صاحبنا الآخر اصر على معرفة الراعي المعني.. وبعد جهد.. كان هو المرحوم جعفر نميري..!!!!!!! قلت ليهو..عارف يا صاحب..شباب وشابات سودانيات كثر.. قاموا اختاروا يبقوا في سكتكم..وفاكريني معاكم.. وكتير بفكر اديهم اسمك باعتبار شيخ وكده..!! ضحك ضحكة مجلجلة.. وقال لي: انتا بقاري اصنج وعمرك ما تبقى معانا.. لكن ابشر بالخير أي زول ولا زولة اديهو معلوماتي طوالي..وما في عوجة تب..!! دي المحنة يا ياسر.. الناس الدايرة تختار انها تبقى مسيحية ولا يهودية ولا لا دينية.. نتعامل معاها كيف (انا بسأل عن التفاصيل التحت: يسكنوا كيف؟ يعيشوا كيف ؟ يتعاملوا كيف)..!! صدقني يا ياسر سويتها ، ولا اندم عليها.. وحد معاهم مبدأ واحد: الأديان الإبراهيم واحد..والدين (فلسفيا/سيوسيولوجيا/انثروبولوجيا/ثقافيا) واحد..والداير يفارق اخير يعملها كبيرة.. وسيكون اجمل وابهى..!!..(بالمناسبة انا مسلم والحمد لله)..!! النقطة يا صديقي ، ليه المسلمين لمن يمرق منهم واحد بيعملوا من الحبة قبة ، ولمن يدخل عليهم واحد بيعملوا من الحبة قبة..؟..غايتو انا تفسيري ده خوف ما عندو معنى تب..!! وياياسر لو اخونا دكتور احمد محمود (بتاع يا رؤوساء الأحزاب المادة 126 من قانون العقوبات) وقع في عينك..قول ليهو كبر قال ليك : يا حليلك..الموضوع مش بقي (ردة ولا شنو كده ما عارف) ياخي ده وصل لغاية انو سب الصحابة ردة..وانا مسئول من الحكاية ..اللهم الإ كان ناس المؤتمر الوطني يسحبوا تعديلهم للمادة المعنية..!!..وبعد شوية ، شوف عيني: سب عمر البشير..ردة عن الإسلام..!! تحية لصديقنا عضو المنبر ، عمنا ارنست (سوداني عجوز)..ولكل المسيحيين من اهالي امسودان وهم يتابعون مثل هذه الخيط.. كونوا كما انتم.. ونكون كما نحن.. ويجمعنا وطن نتغالط منو الأكل المال العام ، ومنو الرعانا في الوطن وحمانا وحمى التنوع.. لا يزعجني ان يذهب مسلم الى المسيحية ولا ان يأتي مسيحي الى الإسلام.. وانما يزعجني اهدار الحق العام والمصالح العليا..!! شكرا يا الطيب..وليتك تواصل .. As Sudanese Canadian لنواصل.. As Sudanese Canadians مين يعرف..قد نخلق الفرق ونهدي الناس تجربة تستفيد منها؟.. ويا ارنست.. اهو الطيب زاغ..وانا ما بزوغ..تحياتي لصديقي الجميل ايمانويل..الذي لازلت اعمل جاهدا لأثبت له ان المسيحي ممكن يكون انصاري زي الترتيب..!!! الهمسة الأخيرة. : صديقنا الخلوق ، عضو المنبر ، فايز موسى: لمن لاقيت صاحبنا ايمانويل ، بعض لحظات اللقاء كان فيها منعرج عجيب وغريب.. ولقد احتد معي ايمانويل ، وكاد ان يخنقني وهو يقول لي: كيف تحتد مع فايز يا كبر؟.. وقلت ليهو: لأنو فايز اخد في حقك..!! وقال لي: حقي خليهو..وما عندك بيه شغلة ، وانا عافي لفايز مهما قال..!! هذه شهادة اشهد بها يا فايز.. وصحيح غضبت عنك ذات يوما ما.. لكن موقف ايمانويل اهداني حاجة جميلة اسمها التسامح.. وليتك تلتقي الرجل.. فهو سوداني عادي.. يبقى هلالابي ولا مريخابي..ياهو نفس الرجل الذي تقاسمت معه قمع الحكومة والكفيت والشلالايت.. ولكنه هو افضلنا الآن..هو افضلنا..من باب مصلحة سودانية ساكت... نأسف للإطالة.. والرجل المعني.. له حلقات مبذولة في اليوتوب في قناة (الحياة)..يعجبنا ما يقول ام لأ..مش مهم..ولكنه يظل سوداني عادي وجميل للغاية ومهموم بقضايا الإنسان التحت..!! التحية لكل المسيحيات والمسيحين من امسودان..فليجمعنا الوطن يا احباب..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست