|
|
 Re: فاروق حمد الله ومحجوب شريف سر اللقاء بينه� (Re: معاوية عبيد الصائم)
|
رحل الربيع
العنقريب ..
يا ابونا شايلو الهمبريب ..
إتسامي ..
سابح في الغمام ..
النخل اداهو السلام ..
و الشعب فج زحاموا قام ..
قدامك وقف ..
ووقفنا يا سامي المقام ..
بكل محبة و إحترام ..
الكل هتف ..
محجوب شريف من تب قام ..
محجوب عفيف ما ضاق حرام ..
محجوب لطيف عذب الكلام ..
غمض عيونه و إتكا ..
في عيونا نام ..
منه السلام و عليه سلام ..
كان زول رقيق ..
في جده جد ..
كان زول عميق ..
شامخ صلد ..
كان ناس كتار في زول أحد ..
يا أبونا ذو الطبع الفريد ..
ما بعت نفسك لأحد ..
يا الكنت منسوب للجميع ..
للأرض ..
للناس ..
للبلد ..
حزنان عليك كل البلد ..
بيتنفسك ..
بيستنشقك ..
بيتكيفك ..
يا عافية الروح و الجسد ..
البركة فيكم يا (أميرة ) البيت ..
و يا (مريم) و (مي ) ..
البركة ..
في البطن اللي جابت ..
و خدرت ..
زرعآ نجيضآ ماهو ني ..
البركة ..
في أم درمان رقد ..
في حضنها الدافئ ..
الوليد الديمة حي ..
البركة ..
في الشعب العرض ..
زفاك لدار الحياة ..
الموفورة ضي ..
و البركة دايمآ فيك و بيك ..
و الرحمة تنزل نور عليك ..
و الحب جداول جارية ليك ..
تغمر ديارك بالخريف ..
ينبت ورد أحمر شفيف ..
يتوسدك و تتوسده ..
يا أبونا يا محجوب شريف ..
يا روعة الزول النضيف ..
يا شمس فضحت كل زيف ..
يا الفت في فصل الربيع ..
خليت وراك دنيانا صيف .
منال بشير عباس
2/4/2014
|
|
 
|
|
|
|
فرح الطاهر ابو روضة
فيس بوك
تويتر
انستقرام
يوتيوب
بنتيريست