الاسد والمرفعين سكنو جيران في الغابة وعملو أصحاب !!! ونسوانهم بشربن القهوة مع بعض وبداولن شمارات الغابة وكل الآخبار .... المهم الاسد عندو ولد واحد والمرفعين عندو 9 من الأبناء .....يوم من الأيام طلعوا الصيد ولد الاسد وعيال المرفعين .... وحصيلة الصيد الوجودها 9 بقرة وتور واحد .... جو راجعين ناحية الغابة ولد الاسد قال ليهم ي شباب بعد دا نحنا قربنا للفريق ولازم أي زول يعرف حقو من الصيد دا .....انا عندي حلين فقط يا نداوس معاكم أن خوفتوني شيلو البقر كلها والتور ....أو انا بقسم بفهمي اختارو البعجبكم من الحلين. .... المهم عيال المرفعين اتشاورو وقالوا الاسد دا دواس بمرقنا ساكت احسن نرضى بتقسيمو وما أظن يظلمنا .... ولد الأسد قال ليهم طيب انتو 9 شيلو التور تبقو عشرة ..........وانا واحد بشيل ال 9 بقرة وانا عليهن بنكون عشرة وكده دا العدل يا شباب! !!!!! طبعا رغم الظلم عيال المرفعين شالو التور ورجعو ل ابوهم المرفعين .....ومن شافهم ضحك وانبسط وشكر عياله هيييييع تركاش العقيق هيييييع الفرسان خوفتو ولد الاسد وقلعتو التور وخليتو مشي ل ابوهو أملس! !!!!! عياله قالوا لا ي ابوي مرفعينو الاسد قسم بينا الصيد ونحنا وقع لينا التور لأننا 9 وبالتور بقينا عشرة وولد الأسد واحد شال ال 9 بقرة واصبحو عشرة ودا الحاصل !!! مرفعينو كفت عيالة وقال ليهم الخيابة كيف ولد الاسد يظلمكو وانا حي في الدنيا زحو خلي ارجع التور واشيل باقي البقر والا اليوم تقع ضمة !!!! المرفعين ساق التور ومشي علي فريق الاسد وزعلان حار من القسمة دي وقال لمرته مرفعينة اليوم الاسد بغطس حجرو ولا بشيل حقي الشمس ضحي. ... المهم الاسد لمن ولدو جاب ال 9 بقرة وولدو شرح ليهو القسمة ...قال لولدو عمك المرفعين طبعا م بقبل القسمة دي وهسي بجي كن وصل قول ليه ابوي نايم قال كن جيت قومو من النوم ... المرفعين كبس وزعلان وسأل ولد الاسد وين أبوك ي ولد ي مفترى ي ظالم ؟!!!! ولد الاسد قال ليه ي عمو مرفعينو م تصرف عربي كتير أبوي نايم قال ليك قومو .... المرفعين علي طول مشي شجرة الاسد والأسد صاحي بس عمل فيها نايم ....وصل وحاول يصحي وكب الأسد نطه في المرفعين عامل فيها مخلوع وعضي المرفعين من حلقو ورقد بيهو والمرفعين بعيط أبا الاسد دا انا جارك حيييييي قطع حلقومي فكيني! !!!!!! الأسد فكا براحة وقال ليه عايز شنو ي زول ؟!! المرفعين قال ليه لا والله انا جبت ليك التور دا أولادي قليلين الأدب شالو التور من ولدك وخلو البقر بدون فحل والآن جبت التور لمراح ولدك هدية مني اقبلها. ........رج
تخريمة. .....
المؤتمر الوطني شكلو من البداية مسك رئاسة الوزراء ونائب رئيس الجمهورية قطع شك بقسم تقسيمة ولد الاسد وبمرق الأحزاب عيال مرفعين وعلي رأسهم أبو أم سلمة والمرغني وكمال اللفيف زول الشعبي .....منقول
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة