والتحية عبرنا وعبركم جميعا ، لأصدقاء من هذا المنبر ، التقيت بعضهم ، والبعض اتمنى ان التقيه في هذى الحياة ، اصدقاء ، بيني وبين نفسي اسميهم (عيال اعالي النيل) ، وهم الأصدقاء: منوت ، قريمان ، قيقراوي..ولم ارى كتابة حنينة في هذا المنبر مثلما هي كتابة صديقنا الغايب منوت ..التحية له ..! مثل هذى الكتابة يا صديقي ، مثلما تفعل هنا ، هي كتابة مهمة وجميلة ، لأنها فيها الحقيقة والواقع والإنفعال التلقائي..والأهم هي مفتاح لإستكشاف مواقع امسودان التي لم نراها من قبل..وصدق اصدقائي وصديقاتي ناس مؤتمر الطلاب السوداني ، فكانت عندهم مقولة عميقة وحكمة انو مشكلتنا في امسودان اننا ما بنعرف بعضنا البعض ، والمعرفة ، بعد التجارب ، اكتشفت انها هي المباشرة للأشياء..تشوف الناس من قريب ، تشوف الأماكن من قريب..وح تكتشتف انو امسودان اجمل ما فيها هذا التنوع الحقيقي ..!
انتظر مع المنتظرين باقي الرحلة.. فانا حدي كوبري كوستي الجديد..وكلما اعبر به ، احرص ان يمتد بصري مع النيل الأبيض جنوبا الى اقصى نقطة يستطيعها البصر ، وهناك دوما حسرة بتهب لمن نسام البحر تهب ، وتفتح طاقة للخيال والسؤال..!!
شكرا يا صديقي ، وانا قايل براي الفي المنبر ده قضى الخدمة الإلزامية ، واذكر صديقي محجوب وهو متمرد ورافض لحاجات كتيرة ، وقام مشى الإلزامية قبالي ، وشرح لي الفكرة ، وقال لي: صدقني سنة تعيسة ، لكن لي قدام ح تكتشف اكثر تجربة حقيقية وجميلة كمان..ولقد صدق اخونا محجوب..!! نتمنى الناس الزارت الجنوب تحكي وتحكي..واذكر حكايات صديقنا عليش الريدة ، وصدقني يا هيثم في المنبر ده في ناس عاشت في واو الجميلة ، لكن عاملين نايمين..!!
احب الإستماع كثيرا للفنانة لوشيا جبريل ، وهي من اعالي النيل..واهديك هذا العمل ، اتمنى ان يعجبك ، وقد جلبت هذا العمل ، وغيره ، اكثر من كذا مرة في المنبر ، وجبت ليك هنا..لأنك في بوست (بنات سنار) جبت سيرة الأحباش..الريتم هنا يا صديقي ناس كتيرة ح تسمعوا وتقول ليك ده ريتم الحبش ، ولكن فات عليهم انو ده الريتم بتاع اهلنا النوير.. وممكن الناس تسمع حاجات النوير التقليدية ، وح تكتشف الشبه..!!
طبعا بعد ما وصلت كندا ، حتى عرفت انو في نوير في اثيوبيا (كأثيوبيين)..ده غير صديقتي الحبشية (معانا في العمل) حالفة بدين ابوها انو المتمة حبشية (طبعا هي بتتكلم عن متمة الحبشة ، وهي برضك سودانية روحا ومعنى ، لمن لا يعلم..)..!! اتمنى تواصل يا هيثم ، واتمنى اكثر تظهر كتابات مثل هذه والناس تعملها كتب ، لأنها بتفتح افاق كبيرة لمعرفة امسودان الإنسان والجمال والحقيقة..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست