احمد محمد عمر..حبابك يا صديقي كتر خيرك على المرور والمطايبة..
سعيد بان يكون مسلسل حوش النور جزء من مفكرة متابعاتك وهي مسألة جيدة ..والمسلسل جميل ، عندي فكرة اكتب عنو ..وسأكتب..
المنبر يا صاحب عندو ليهو مراقات كتيرة ، لكن مرات بتحتاج تركب وش صغنوني كده..
كتر خيرك على غنية (دا ما سلامك) ، والتحية للشاب طه سليمان ، وانا عكس من قلتهم ، اسمع طه كثيرا ، وهو محطة ،عندي ، بعد محطة محمود عبد العزيز ، فطه زول كويس شديد وصوتو سمح..! اما سيد الغنية الأصلي استاذنا مجذوب اونسه ، فهو صوت حنين ، وكذا صوت الأستاذ محمد سلام (قام اتعزز الليمون) ، وبتذكر ايام الشباب ، كانت المنيتور بتاعتي صديقة وجارة في الحلة ، ووكت داك مجذوب اونسه كان في بداياتو.. فكانت بتسمعو طوالي ، ياخي عندها شريطين ، كل واحد ينتهي تركب التاني ، لغاية الصباح يصبح..التحية ليها.. منها تعلمنا فكرة الثنائي النادر للغاية الشاعر حسين اونسه والفنان مجذوب اونسه..وعندهم اعمال مشتركة عديدة..! اما الغنية فهي برضك عندها علاقة بي ناس سنار ..!! فالكلمات هي لأستاذنا الشاعر عزمي احمد خليل ، واحد الصديقات كانت واقفة في محطة واحدة فقط ، هي محطة استاذنا هاشم ميرغني ، وكما تعلم هاشم عندو اعمال مشتركة كتيرة مع عزمي..! لمن كنت سكرتير ثقافي في جمعية طالبات وطلاب القانون ، وقع في الدورة بتاعتي اسبوع القانون الثقافي ، فقمت استغليت سلطتي الخاصة ، وعملت برنامج ، نظام جلسة استماع لأستاذنا هاشم ميرغني ، وكانت في قاعة الشارقة ، طبعا الزولة كانت متكيفة جنس كيف..لأنو اول مرة تشوف هاشم ميرغني ودايرة تسلم عليهو.. فكانت كبكبة شديدة خلاس..! يوم الجلسة ، بعد ما اتأكدت كل الأمور تمام ، قمت اتخارجت ، بعد ساعة من بداية الحفلة ، صديقتي حصلتني في كلية القانون ، وكانت زعلانة بي شكل..! قلت ليها: ياخي انا كسرت الحاجات واستغليت سلطتي وجبت الفنان ده عشانك ، نص الحفلة ما تكمليهو؟.. شكرتني على الجهد (الخارق) ، وقالت لي: ما عجبني..! استفسرت اكتر ، وقلت ليها الصوت والألحان والكلمات مافي زول بيقدر يقول فيها شي يبقى الما عاجبك شنو؟.. قالت لي: الشكل..!! قلت ليها: يا سلام ، وانتي دايرة تعرسيهو؟ ضحكت وقالت لي: عليك الله الراجل ده يساهر بينا ويجفف دموعنا ويخلينا نبكي بالسنين ونحن بنسمع ليهو ، اجي في النهاية القاهو سمين والبغيظ فيهو يتبسم ويتضاحك..!
طبعا الشباب في تلك الأيام كان مؤمن وصديق.. يعني تغني غني الشواكيش مفروض تكون مبشتن وتعبان وحزين من جوه وبره..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة