|
|
 Re: اطفال الشوارع ... ابطال الشوارع (Re: Nasser Amin)
|
نشطت منظمة مجددون بقيادة الاستاذ فارس النور في محاولة لايجاد معالجة لمحنة هؤلاء الاطفال.
يقول الاستاذ فارس النور في صفحته بالفيس ببوك:
عن مشروع عايز اكون زول ليهو قيمه..
طبعا هو مشروع بيستهدف اعادة تأهيل (اطفال الشوارع )
وعلاجهم من الادمان وغيره وتعليمهم (محمو اميتهم+ تعليمهم حرفه) وتمويلهم بمشاريع استثماريه.
البدايه كانت كيف؟
حللنا المشكله ووجدنا انو في فئه مظلومه ومهمشه وهي ضحيه للحروب والمشاكل الاسريه تعيش في المجاري والخيران وتتعرض لكل انواع العنف وحتي الاعتداء الجنسي ومسيطر عليهم من كبار المشردين الشغاليين وسطهم كتجار سلسيون
فاتفقنا معاهم (البتلقاهو من السلسيون بنديك ليهو) اشتغلو معانا فانصلح بعضهم واشتكينا من رفض فقامت الشرطه بما يلزم (مشكورييين)
ووجدنا كذلك ان بعض المجتمع ينظر لهم نظره تجرمهم وتفقدهم اي تعاطف.
كان لابد من علاج المشكله وعلاج نظرة المجتمع لهم
ختينا عدة وسائل جاذبه للاطفال منها الاطعام والتحفيز والرياضه واقامة الرحلات والمعسكرات .
ودا كلوا في اطار (الترفيه والمتعه والاثاره)
لانو(ماكان الرفق في شئ الازانه)
ولانو في نص القرأن تماما بتلقي كلمة (...وليتلطف...)
...بدينا بالاطعام تيمنا ب ( كان ماعجيني مافي زول بجيني)
فكان احسن الطعام (فراخ وشيه التفاح والموز والبطيخ)
والعزومات في احسن المطاعم (سمكنا) و(اولاد امدرمان).
فبنينا مدماك من الثقه..
بعدها طوالي خشينا في (التعليم مقابل الغذاء)
فجبنا سبوره وكنب علي الهواء الطلق وكتبنا لكل واحد امنيته علي اليونفورم بتاعو..
فكانت حصص ابجدهوز وكانت سورة الفاتحه والوضوء والصلاه ولسه مواصليين....
وتاني ختينا مدماك من الثقه...
وفي نفس التوقيت كانت الرياضه وخصوصا كرة القدم و اجرنا ملاعب جامعة الرباط المنجله فانجذب العشرات من الاطفال واقمنا مباره شارك فيها النجوم هيثم مصطفي وفيصل العجب وبعدها كان المارثون وكمان قريبا الدوري
وكانت الزيت في فائده الرياضه عباره قال احد الاطفال لي اخوهو لمن فريقهم انغلب 4/0 (نحنا كان ماخلينا السلس ماحنغلب)..
واصبح الاسم (ابطال الشوارع)
وختينا عشره مداميك ثقه
واصبح المشروع مغنطيس جاذب فجاء( اطفال الشوارع)
من سوق خضار بحر ومن المينا البري ومن استوب بانت ومن السوق العربي
ففتحنا فصل تاني وتالت.....
وأجرنا ملعب اخر..
وفي كل الخطوات كان المجتمع حاضرا وداعما وسريعا زالت الغشاوه واحتضن ابناؤه
وكان لابد للمجتمع من دور اكبر فكانت مبادرة (2for1)
كل اتنين من المجتمع يصاحبوا واحد من الاطال يدعموه نفسيا وماديا ويراجعو معاهو درسو ويطلعوا منو زول ليه قيمه.فكان التفاعل جميييل بجمال هذا الشعب
فعقدت الصداقات وكان الدعم والعزومات لدرجة انو ابطال الشوارع تحسسوا وقامو هم عزمو الناس في ملك الفته عشا واستجابه للدعوه 63 من المجتمع.
واستمر تفاعل المجتمع وخصوصا المغتربين
فوجد سيف كفاله كامله من ام يوسف في لندن.
ووجد محمد علي فرصه لتعلم قيادة السيارات في مدرسه وبعدها الي السعوديه بعقد عمل.وهنالك عشرات الكفالات حنحكيها ليكم قريبا.
قيمة الكفاله للطفل =1000جنيه
تصرف علي احتياجاتو من علاج وتعليم وملبس ...
كذالك كان لابد من علاج الجانب الصحي والنفسي وخصوصا الادمان فكان الاطباء الذين اقامو يوما علاجيا وانشاؤا وحده علاجيه بقياده د. الاء ود. احمد يوسف ( الداير ينضم من الحقل الطبي يرسل اسمو وتخصصو وتلفونو في الخاص )...
واخيرا لابد من التفكير في الاستدامه فكان لابد من علاج المشكله الاقتصاديه (السناره بدل السمكه) لان معظم الاطفال لديهم اسر مفككه بسبب الفقر
والان شغاليين في دراسات جدوي او الحاق للاطفال في وظائف بشركات القطاع الخاص(ماعايزين نشغلهم مهن هامشيه باذن الله) وفي بشريات كتيره نفصلها لمن نستوثق منها.
الموقف الان ...
نحنا عملنا مخيم في بيتش بري حيكون فيو تعليم وعلاج وايام ثقافيه وفيهو عياده ومتخصصين نفيسيين لمساعدة الابطال في الشفا من الادمان وحنستمر في المخيم لاطول وقت لانو مانفسنا الاطفال يرجعوا الخور وعندنا وعد من معتمد الخرطوم بتخصيص مدرسه لهم تكون سكن وتعليم.
محتاجين منكم ملابس واكل وزيارات وعقد صداقات ودعم نفسي ومعنوي ومادي ودعوات .
السؤال الاخير :
منو محتاج لي منو؟ انت ولاابطال الشوارع؟
انت بتديهم قطعة هديمه ولاشوية اكل او قروش
وهم بدوك الجنه.
افتكر الاجابه واضحه.
خلونا كمجتمع سوداني نوحد عقلنا الجمعي لنخرج اطفال الشوارع من الخور وصدقوني لو نجحنا حنطلع نحنا كمجتمع من خيران الاحباط والفشل والعجز
(ولعل الله يحدث بعد ذلك أمرا)
مشروع عايز اكون زول ليهو قيمه
|
|
 
|
|
|
|
|
| العنوان |
الكاتب |
Date |
| اطفال الشوارع ... ابطال الشوارع | Nasser Amin | 02-22-17, 10:49 AM |
| Re: اطفال الشوارع ... ابطال الشوارع | Nasser Amin | 02-22-17, 10:54 AM |
| Re: اطفال الشوارع ... ابطال الشوارع | Nasser Amin | 02-22-17, 10:57 AM |
| Re: اطفال الشوارع ... ابطال الشوارع | الهادي الشغيل | 02-22-17, 12:08 PM |
| Re: اطفال الشوارع ... ابطال الشوارع | Nasser Amin | 02-22-17, 12:18 PM |
| Re: اطفال الشوارع ... ابطال الشوارع | Nasser Amin | 02-22-17, 12:27 PM |
| Re: اطفال الشوارع ... ابطال الشوارع | Nasser Amin | 02-22-17, 12:31 PM |
| Re: اطفال الشوارع ... ابطال الشوارع | Nasser Amin | 02-22-17, 12:38 PM |
| Re: اطفال الشوارع ... ابطال الشوارع | Nasser Amin | 02-22-17, 12:43 PM |
| Re: اطفال الشوارع ... ابطال الشوارع | Nasser Amin | 02-22-17, 12:51 PM |
| Re: اطفال الشوارع ... ابطال الشوارع | Nasser Amin | 02-22-17, 12:55 PM |
| Re: اطفال الشوارع ... ابطال الشوارع | Nasser Amin | 02-22-17, 01:55 PM |
| Re: اطفال الشوارع ... ابطال الشوارع | Nasser Amin | 02-22-17, 02:51 PM |
| Re: اطفال الشوارع ... ابطال الشوارع | Nasser Amin | 02-22-17, 03:13 PM |
| Re: اطفال الشوارع ... ابطال الشوارع | Nasser Amin | 02-22-17, 03:15 PM |
| Re: اطفال الشوارع ... ابطال الشوارع | Nasser Amin | 02-23-17, 08:10 AM |
|
| |
Nasser Amin
فيس بوك
تويتر
انستقرام
يوتيوب
بنتيريست