|
|
 Re: مدايد نورين .. (Re: محمد عبدالله مختار)
|
مكيف المويه ..
العام 1998 , امتحنت الشهاده السودانيه , امتحنت و كنت ناسي حاجه مهمه جدا , كنت ناسي إنو السنة دي بلذات مازي أي سنة , السنه دي حترسم شكل الحياه الانا حا اعيشها باقي عمري . ظهرت نتيجة الشهاده السودانيه , مشيت المدرسة مع الناس ادوني نتيجتي , جبت 78 و بتذكر انو واحده من اقل المواد كانت الرياضيات, كنت جايب إذا أسعفتني الذاكره 73 .
أهـا انتظرنا التقديم وبما انوكانت عندي رغبه شديدة في العسكريه وكنت نشط جدا في الكديك في فترة الثانوي) كنت قائد تاني, يعني نمره اتنين في المدرسة ( قدمت اكاديمية كرري التقانه العسكريه . كان اقل نسبه بيشيلوها 78 , يعني قدرو قدروا. بدأت المعاينات . فترة المعايانات كانت فتره ممتعه جدا , اتعرفت علي شباب حلوين و عملت علاقات صداقه مازال بعضها مستمر حتى اليوم. كنت خاتي كل امالي و طومحاتي في الاكاديميه العسكريه كانت الاكاديميه بتروي رغباتي العسكريه و في نفس الوقت بترضي رغبات أمي و ابوي الهندسيه, كانت كل ما أريد , كنت بتخيل نفسي بالبدله العسكرية , اتفقت مع اصحابي علي بعض الخطط لما يشيلونا, اتفقنا انو حنسكن في المعسكر كيف , و حنشيل معانا شنو و في الإجازة حنعمل شنو.
بعد تلاته شهور من المعاينات ظهرت النتيجه , كلنا مشينا الرئاسه كانت جنب كبري السجانه, عرفت انو ماشالوني قبل مااصل البورد , شفت النتيجه في عيون اصحابي و في تجنب بعضهم , بتذكر اللحظه الوقفت جنب البورد و مكتوب علي اسمي لم يقبل , اللحظه دي بالذات حسيت انو خلاص حياتي انتهت , ماحيكون في مستقبل ماحيكون في عسكريه , كل الخطط الرسمتها لي حياتي خليتا تحت البورد داك و طلعت , مشيت لحدي ماتعبـت بعدين ركبت المواصلات رجعت البيت قعدت جنب أمي وكنت متفق معاها انو اقسم ليها من المصاريف الشهريه الحا يدوني ليها في الاكاديميه, قعدت جنبها و بكيت(واللهِ حركه مريحه شديد ) , قالت لي يا ولدي الخير في مااختاره الله, ربنا كتب ليك حاجه أحسن منها ,اصبر تشوف عينك.
بعد كده موضوع القرايه ده طلع لي من راسي , مشيت اشتغلت, مرة طلبه, مره نقاشه, و في الاخر عندي ودعمتي مهندس تكييف , بقيت شغال معاه صبي , يعني عتاله , نضافة, بهيه , مكيف المويه ده بيدوني ليه وسخان و عينو طالعه , بصنفرو , واديه ليك بهيه , تجي تستلم تقول جديد , لكن ماكنت مهتمي اني افهم المكيف ده شغال كيف و لا بيصلحوه كيف.
المهم , بقيت عايش بره البيت في الخرطوم , برجع البيت مرة في الشهر . 1998 انتهت, الناس دخلو جامعاتهم , 1999 جات , والناس امتحنت شهاده سودانيه, والنتيجه طلعت والناس خشت جامعاتهم, أنا لسع مع مكيف الموية , لكن الوقت داك بقيت خبرة , المكيف بياخد معي اقل من ساعه, دفعة 2000 سجلوا المدارس والسنة بدت و مشت تلاته شهور و أنا لسه بتلايق مع المكيف.
باقي 6 شهور لي امتحانات سنة 2000 يوم جاني ود عمتي , قال لي ابوك ده لاقاني و وصاني ليك قال ليك تجي الكدرو هو عاوزك في موضوع ضروري , قلت ليه تمام , اكمل المكيف (كان باقي جنبتين)و أمشي .
المهم مشيت البيت لاقيت ابوي , المختصر , ابوي قال لي يا ولد الكلام البتعمل فيه ده مابينفع , خطتك شنو ؟ قلت ليه والله يا ابوي ماعندي خطه , الخطه الوحيده المتأكد منها انو بكرة عندي مكيفين في الطائف, المهم ابوي بخليط من الحكمه والحزم اقنعني اني يا إما اقدم بـشهادتي بتاعة سنة 1998 للجامعه يا اما اقعد أعيد الشهاده السودانيه. من دربي داك فتشت كتبي القديمه بتاعة الشهاده و قررت إني امتحن شهاده, مكيفيني ديك ذاتم مارجعت ليهم.
كان باقي زي 6 شهور لي امتحانات سنة 2000 , امتحنت منازل(يعني من البيت) سبحان الله فجأه , انقلبت كل الطاقه السلبيه العندي لي عزيمه و اصرار إني امتحن و أجيب نتيجه كويسه , اصرار و عزيمه ماكنت متعود عليهم , كنت محدد ساعتين الصباح و 3 ساعات المساء كل يوم قراية, في عرس في بكا في عيد في تعب في زهج مافرق, كل يوم 5 ساعات قرايه, كنت عامل جدول كل ماده مقسما لي زي 5 اجزاء كده , و الجدول بغيروا كل اسبوعين , الجدول كان كل يوم فيه جزئين من مادتين مختلفات , و بكتب في اخر اليوم ملاحظات إني الليله قريت كيف في الجزئين ديل. الجدول كان حاجه زي المثال ده :
تاريخ اليوم | الجزء المفروض اقراه الفترة الصباحية (يعني مثلا قصيدة المساء مع الشرح)| الجزء المفروض اقراه الفترة المسائية (يعني مثلا تطبيقات التفاضل)| ملاحظات بعد القراءه ) مثلا فهمت بنسبة 60 في المائه لكن لم افهم السؤال الأخيرفي التطبيقات مفروض أمشي لي معتز ود خالي يساعدني فيه).
كنت بقرا بـبلاده من غير أي احاسيس , ماعندي أي فكرة انو مستواي كيف , لكن بقعد يوميا الخمسه ساعات دي, جات الامتحانات , و امتحنت, والنتيجه طلعت , ناس المنازل ديل بيمشوا يستلموا النتيجه من شارع النيل.
سنة 2000 يوم النتيجه قمت بدري مشيت الوزاره, قاعد في الواطه متكل في شجره زي ساعتين منتظرين الزول البنده النتيجه الراجل كان بينده الاسامي بسرعه وبيمد ليك ورقه صغيره فيها اسمك ودرجاتك في كل ماده والنسبه , أنا منتظر اسمي فجأه الزول سكت , اخد ليه صنه كده و قال ماشاءالله(ماناس منازل) و نادا اسمي و اداني ورقتي جبت 91.4 % و كنت جايب 100 في الرياضيات, 96 في التخصص , 94 في الكيمياء و94 في الفيزياء . عاينت في النتيجه و عاينت في الاسم , تاني عاينت في النتيجه و عاينت في الاسم , طابقت رقم الجلوس, ياهو زاتو, ده أنا دا, أنا ذاتي , واللهِ أنا قبل اللحظه ديك متخيل الناس البيجيبوا تسعينات ديل , ديل ربنا خلقهم براهم, في فصيله مختلفه بايولوجيا عن الفصيله الانا بنتمي ليها.
مشيت البيت لاقتني امي (والله الحوار كان بالظبط كده ) , يا ولد جبت كم؟ جبت 91 , يا ولد جبت كم؟ 91 يا أمي , يا ولد أنا مابهظر معاك , جبت كم؟ 91 , محمد أنا راجياك من الصباح خلي الهظار جبت كم , أمي والله جبت 91 و بكيت , طبعا مع البكا ده أمي عرفت انو الموضوع ده بالجد , وبكا شديد , أمي دي تبكي وتزغرد, لمت نص الكدرو في البيت, طبعا ناس السوق الكنت بشتغل معاهم كانو إلى يكرروا ليهم برضوا كم مرة , يعني , أسمع نورين جاب 91 , نورين ياتوا؟ نورين بتاع المكيفات , جاب كم؟ , جاب 91.
في النهايه , كلامي ليك , إذا أنا قدرت اعمل العمليه دي (أنا منو؟ أنا أنا) أنت ممكن تعملها (أنت منو؟ أنت أنت) أنت مابتصدقني , لكن جرب و شوف, السؤال الصعب المفروض تسالو لي نفسك انوهل حاتقدر تجرب؟؟؟؟ السؤال ده بقى أنت بس البتقدر تجاوبوا
"Education, actual learning--it is hard work. It's very personal. Your parents don't teach you anything. Your teachers don't teach you anything. The government doesn't teach you anything. You read it. You don't understand it; you read it again. You break a pencil and read it again."
--Dean Kamen
محمد نورين ,
تكساس , الولايات المتحده,
30-ديسمبر-2016
|
|
 
|
|
|
|
محمد عبدالله مختار
فيس بوك
تويتر
انستقرام
يوتيوب
بنتيريست