ول ابا علي عبد الوهاب..حبابك يا صديقي كتر خيرك يا على ياااااااااااخ وعلى حاجات كتيرة.. شكرا للمطايبة ،
ونحن يابا حقنا دايما ضايع في امسودان ، تجيب الفكرة والناس تعير بيها ، وصدقني نفرح كتير لأنو الفكرة يجب ان تكون..غض النظر منو البيعير بيها ويتباهي كاختراع خاص..!! نهايتو يبقى امسودان الإنسان والجمال..!!
فكرة الغناء الكردفاني بتجهجنا كتير يا صديقي ، لأنو بنفتش المعيار شنو (على قول صديقنا محمد اٍي سليمان) ، فهل المعيار انو الزول/ة البيغني الغنا ده من جغرافية كردفان ، ام هي المفردة ، ام هو اللحن والتقاسيم العجيبة المدهشة ، ام هو الريتم (الإيقاع) ام هو الحنين؟.. هي حاجة غامضة وما بتنكتب تب.. انما بتحسها جوه في اخر كورنر في الإحساس..!!
من مشاهداتي الخاصة ، الغنا الكردفاني ممكن أي زول/ة يغنيهو وبرضك بتحس فيهو الحاجة الغامضة الما بنقدر نسميها ديك..سمعتو في بيرو (امريكا اللاتينية) ، سمعت صداهو في اشغال من ايرلندا ، سمعتو في ايطاليا ، وسمعتو في امسودان في تقاسيم بنات واولاد.. في كل الأداءات المتنوعة دي برضك مسكون بالحاجة الغامضة ديك..!!
اسمع الغنية دي يا علي عبدالوهاب ، من اداء الفنانة الشابة (الباشا) انتصار فتحي عبد العزيز.. والغنية اصلا غنتها الليجند زينب خليفة (فردة ثنائي النغم) ..وهي غنية مافي زول بيقدر يغنيها غير زينب ، ثنائي النغم ، امبلينا السنوسي ، ثم انصاف فتحي (الزولة تحت تحت كردفانية)..!!
وبتذكر في سنة 2013 ، فتح صديقنا تمبس بوست في سودانيز اونلاين ، وكلام عن انصاف فتحي ، وقتها تداخل صاحبنا قرجة وجاب معيار عجيب ومدهش ، وقال لتمبس (انا التيروميتر بتاعي ناس الكمنجات ، ولمن اشوف محمدية بيتبسم بعرف انو في شغل نضيف)..او نحو ذلك..
اها نحن بنعتمد نفس المعيار ، والناس البتشوف التسجيل ده بتلاحظ انو في عازف كمنجة (اشيب) قاعد يبتسم كتير ، وبعد شوية حتى الشابات عازفات الكمنجات بتشوف فيها ابتسامات عجيبة (واحدة عندها ابتسامة الموناليزا..والله صحي) ، ناهيك عن اخونا بتاع الجيتار..!!
اها فرحة ورضا الناس البتعزف بتديك احساس انو ده شغل جميل ونادر كمان..!!
كلمات الغنية ، حنينة شديد يا علي ، تبدا بصيغة تعجب واندهاش ، وتجري هكذا: يمه الله من الريد ، يا يمه الله من الريد، *** مشيت نباري الصيد ، كن نروى من الريد ، يومي النشوف تومي ، يومي النشوف تومي ، داك بيبقى يوم العيد ، يمه الله من الريد *** فات الفريق صباح ، لوين نقول روّح عيني المجافية النوم ، عيني المفارقة النوم ، وقلبي ليك بيشرح يمه الله من الريد ، *** كن درتا ليك نصــّاح ، في خدي الدموع تفضح ، لي حالي مغلوبة ، ويارب عليّ تفتح ، يمه الله من الريد ، *** سوادي بتوشح ، يا ليل بتين تصبح ، كن الحنون لي عاد ، يا صيد معاك بســّرّح يمه الله من الريد ، *** حبل الفريع بـّربح ، نوارا شال كشــّح ، مسكين قليب الريد ، طول ليلا ما قال شــــّح، يمه الله من الريد..!!
(فات الفريق صباح) طبعا ناس البندر يا علي ح يفمهموها وكت الصباح ، أي سافر فجرا ، ولكن الموضوع تاني خالص ، والمقصود مكان بتشرحو عبارتها اللاحقة (لوين نقول روّح).. والصباح او دار صباح ياها الخرتوم الواحدة دي..!!!
ولمن تقول (مسكين قليب الريد ، طول ليلا ما قال شــح)..ليلا يعني ليلو..ريد يوقف النبض يااااااااااااااااااخ...!!!!!
في الفيرشن ده انصاف ادت الغنية ابعادها الحقيقية ، بالرغم من انو الموضع في حفل مفتوح (يعني هندسة الصوت فيها اٍن واخواتها)..!!
و يا احمد ياسين ، سمعت انصاف في تسجيلات تانية بتاعة استديو والصوت مضبوط شوية لكني كنت بتمنى تكون دخلة الشغل ده جيتارات ، وفي الحفلة الشباب بدوا بالجيتارات لكن بداية خجولة شوية..!! ولغاية الليلة عندي قناعة ، انو اشغال ناس كردفان مفروض يكون فيها براح للجيتارات..لأنها من نفس المردوم والجراري والكرنق ..والله صحي..!!!
عبركم التحية للشابة انصاف فتحي ، وهي شغالة رسالة الماجستير في هندسة المياه ، وشغل الموية ده يا انصاف فيهو حنين شديد يعني نظام (يمه الله من الريد)..!
ومنتظرك يا باشا في شغلك الكردفاني الجديد (قولوا خير) ويا ريت تعقبو اشغال تانية وكردفان عجيبة يا انصاف ، ولو لقينا فرقة نرمي ليك البياض وانتي واصلي الخيرة ياااااااااخ..!
عجب عجايب ياااااااااااااخ..يمه الله من الريد يا يمه..!!!!! ودي ما بشكة يا خلق هوي..والله صحي..!!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست