هههه.. ده كلام شنو يا الشيخ يا اخوي؟ انتا نسيت بنات بحري؟..يا بنات بحري بتاعة رمضان زايد؟
اها البنية اليقين التانية الفوق دي ، الأستاذة نايلة زوجة فاروق حمد الله من بحري يا قريبي..! عارف يا الشيخ ، لمن مرقت من امسودان 1999 ، كان في وداعي صديقتين وزميلتين في الجامعة ، أها الإتنين من بحري ، واحدة اهدتني كاسيت لجيمس لاست ، التانية اهدتني كاسيت للمغنية الكولمبية تريسي شامبيون ،وانا براي تميت الرصة واشتريت كاسيت لزامفير..! بالطبع من اخر الحفلات الحضرتها كانت لأستاذنا الهادي حامد في معية فرقة النورس وكانت في حدايق عبود..ولا حدايق عبود ماها تبع بحري؟.. بعد الغياب زرت بحري مرتين (2012 و2015) ولاقيت صديقاتي ديل..!! برضك ياعمك ، نحن ناس الأقاليم بنتذكر السد العالي ، جعفر عبد الرازق ، الثعلب ، وسكسك..والعجب..!! حتى عباس عقرب ذاتو..!! لمن رجعت الخرتوم للجامعة ، كان كل همي احدد وين استديو واستريو سارة بالصافية..عارف ليه؟ لأنو كل شريط غنا بنسمعوا الأقاليم بنسمع معاهو (من تسجيلات استديو واستريو سارة بالصافية ) أو (مع تحيات استديو واستريو سارة بالصافية) ..لمن الزمن عطف علينا وشفنا (استديو واستريو سارة بالصافية) ، وبنقول ليك مع تحياتنا (استديو واستريو سارة بالصافية)..!!
برضك بنتذكر لمن ابونا خضر بشير يحي الحفلات هناك ، وتكون الصبحية بايوب فارس* ، يقوم خضر بشير لا يتعشى ولا يرتاح ذاتو ، ويقول ماني ماشي مالم احضر الصبحية البيغني فيها ايوب فارس..شفت البهاء ده كيف يا قريبي..؟.. وفي ايام الشباب كنا بنطرب للفنانة عوضية عز الدين..! وبراعة عز الدين الصبابي..!! وتلك ايام بعيدة ، لكنها زاهية..وخوفي تتسرب..!! كتر خيرك يا صاحب.. كبر
ــــــــــــــــــــــــــــــ * لاحظت في كل الفيديوهات التي تعرض في اليوتوب للفنان ايوب فارس ، ما فيها صورته ، وانما صورة صاحب الغنية ، وكنت ساضيف اغنية التاج مصطفى وفيها تطابق لدرجة انك لا تستطيع ان تميز بين ايوب والتاج..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست