الشيخ..حبابك يا صديقي يا اخوي هو خلق كتيرة محلقة معاك في نفس الزوون والسماوات البهاء ، لكن قاطعنها في حنانهم ساكت..!! حبيبنا ود البشرى جاب سيرة الهلال ، ونحن فهمناها الإشارة للزمن الرياضي والرياضة في تلك الحقبة العجيبة (فهي حقبة يا صديقي ، ما كانت مجرد انقلابات وبس وانما تفاصيل اخرى).. قبال الرشيد بدوي عبيد ، وعلى الحسن مالك ، وغيرهم..! كان طه حمدتو..!! باقي ليك يا الشيخ هسع لو قلنا للناس طه حمدتو كان مذيع رياضي ، نظام يذيع المبارايات في زول ح يصدق؟.. في التسعينات ، عمي واحد مريخابي متصعب ، بعد ما ناس الإنقاذ ركبوا لينا وش التأصيل المغشوش ، وفرضوا علي مذيعي المبارايات انو ما يقولوا القاب اللعيبة..! اها ونحن بنشاهد مباراة طرفها المريخ ، المذيع يشيل ويعيط يللا يا بابكر الحلو!! قام عمي دق التربيرة لمن التلفزين قرب ينفجر قدامنا ، وهو يصرخ: بالله المدرب الحيوان ده ليه ما دخل باكمبا في التشكيلة..!! خلي بالك بابكر الحلو ما عندو علاقة بعبد العزيز الحلو..!! وباكمبا ، زول مجنون في مدينة الدويم ، وتحكي الأسطورة انو كان ممرض ، وشفتو بعيني الما اكلها دود البلا دي ، كان بيلبس لبس الممرضين: رداء ابيض ، جزمة باتا بيضا وقميص ابيض ، وبيضيف عليها تشكيلاتو الخاصة ، نظام كشكوش مصنوع من غطايات قزاز الببسي والكولا والتاكا ذاتو..!! متخيل الفيلم ده؟..يجي يلتقط اللقب زول رياضي زي بابكر الحلو ويختارو لنفسو فيصير باكمبا..!! عمي المريخابي ، قلت ليهو اشمعنا طه حمدتو؟.. قال لي: لأنو زول كان بيذيع المباراة في الرادي ، وبيحسب المربعات ، وبيخليك كانك جوه الإستاد..!! هل ده مهم؟..بالطبع يا صديقي ، ولكن الأهم عندي ، طه حمدتو شاعر غنائي وعندو اغنية شهيرة شديد غناها العظيم احمد المصطفى ، ولكني اهديك اياها بصوت الحوت (محمود عبد العزيز)..!
شفت كيف يا صاحب لمن قلت ليك انا لا اخاف الحزن..!!!!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست