البِنيّة حننتني. والله صحي. منذ ان أطلق شيخ علي عثمان محمد طه عبارته المشئوّمة (لا بُدّ من إعادة صياغة المجتمع السوداني)، المجتمع السوداني ما قال أحّي يا العافية. علي عثمان والبشير عمر ود الباوقة عبد ليهم، يملأ ليهم الأباريق ولو دعت الحاجة بيشطِفُون زاتو. لا دخل لعمر ود الباوقة بالموضوع، بس أنا أدرجتوا هنا عشان مكجِنُو.
إحتياجات أُماتنا في الزمن الماضي كانت بسيطة جداً، يعني بالكتير الوآحدة ممكن يكون عندها 3 تيبان ؤ بس، توب زرآق، ؤ توب سلطة، ؤ توب بنقالي، وإذا دعت الحاجة ؤ مات لها زول عزيز عليها بتشتريلآ توب دمورية أو وزن عشرة لزوم الحداد. توب البنقالي كان نوعاً ما توب فاخر والمجتمع كان جداً مُحافظ لا مُحتاج إعادة صياغة لا مُنحل ؤ مليان صياعة. لعنة الله تغشاك يا علي عثمان، العنوه لعنه الله. بعد دآك ظهر توب رآقي إسمو رسالة لندن شطفليك البنقالي زي الترتيب ليتراجع توب السلطة ويصبح توب جارات، إلي ان وصلنا مرحلة إعادة الصياغة وأكلونا البيتزا والهوت دوق ؤ نسينا توب إسمو الإرسال قطع، وأصبحت كل يوم ظاهرة موضة جديدة مع إعادة الصياغة التي طالت كل شئ بسبب تجييش الألة الإعلآمية التي قضت علي تحرمني مِنّك واللخدر واليابس، وإنعطف بنا مشروع إعادة الصياغة إلي موضات من واقع معاناة شعبنا الذي أعادوا صياغتو لا إيدوا لا كراعوا وظهر توب إسمو دقة الترابي ثم تلآه وآحد إسمو جرية نافع وهكذا. طالما عجلة إعادة الصياغة مدردقة فنتوقع إعادة صياغة الأتي في الليام القليلة القادمة، جكسا في خط 6 حا تبقى بنقا في خط مافي، دردقني في النجيلة حا تبقى شطفني في النجيلة، رسالة لندن حا تبقى رسالة بنقلآديش، غنوة نظرة يا السمحة ام عجن حا تبقى شطفة يا السمحة ام عجن، نغمة عجالي والتمن غالي حا تبقى بنقالي والتمن غالي، الجماعة بدل ما كانوا خالطين حا يبقوا شاطفين، الركشة حا نسميها شطفة، شارع عبيد ختف حا يبقى شارع عبيد شطف، رقصة الرئيس حا تبقى شطفة الرئيس. ثم المجتمع زاتو بعد ما كانت حكايتو مستحمية حا يبقى حكايتو مشطفة مع آلة إعادة الصياغة البتعجن في طينتو ؤ تشكّل فيها زي ما عاوزة كل يوم. المستشفيات بقت متروكة لمصطفى البنقالي يشطف في ناس سهير والأطباء خلف القضبان وبعضهم في غيابة جُب الأمن فهنيئاً لك يا علي عثمان ها أنت قد نجحت في إعادة صياغة المجتمع السوداني. المجتمع السوداني كان عايش علي فطرة جميلة، كان رؤوف رحيم مُتحاب مُترابط مُتكاتف، إعملوا علي إزآلة حُكام السوء حتي تعود للمجتمع عافيته.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
فيس بوك
تويتر
انستقرام
يوتيوب
بنتيريست