|
|
 Re: الزيارة (Re: درديري كباشي)
|
الزيارة
4
وصل موكب الخزين الى الجناح الفاخر بالمستشفى
والخزين هو من بنى هذا الجناح الخاص على قرار الأجنحة الفندقية .عمارة صغيرة من ثلاثة أدوار عبارة عن شقق . كل شقة عبارة عن وحدة سكنية متكاملة غرفة للمريض وغرفة للمرافقين وصالة بها مجلس ومطبخ صغير مجهز بكل الأجهزة وحمام وكلها مكيفة بنظام الاسبليت .. أرضيتها من السيراميك ونصف الجدران مكسي بالرخام .. ونظام الفرش والستائر .. كلها فاخرة لا تقل عن أي فندق خمسة نجوم . رغما عن ذلك أسرة الخزين وزوجاته لم يرضين أن يستخدمن فرش المستشفى فذهبت أحداهن مع أبنها معاذ وأحضرت طقم وستائر جديدة وقطع السجاد العجمي .. وكذلك المبخرة الكهربائية ... وتم تجهيز الجناح بهذه الأدوات ..
دكتور حمد أصبح صامتا من الدهشة ينظر الى دكتور خالد يصدر في الأوامر .. ويطلب من الحضور الذين أزدحموا على الجناح بان لا يطيلوا المكوث .. حتى يمنحوا فرصة لغيرهم .
وبدأت الأصوات ( المكفرة) تضخم وتضعف حسب مكانة صاحبها ... وحتى طولها يتوقف على حالة صاحبها بالذات المادية .
المساكين باختصار كأنهم يخافون أن يطردهم أحد ..
- كفارة يا الخزين أخوي أنشاء الله ما تشوف شر .. يسلم ويخرج مسرعا .
أما التجار أصحاب الكروش والقروش .. لازم يحبك حكايته بقصة من وقع الخبر عليه ولا ينسى أن يضيف لها جزء من الفشخرة أي يطعمها ليبين وضعه المادي .. كبار العمم والأكمام والجيوب .
- الخزين كفارة .. شنو الحكاية يا راجل ... علي باليمين قاعد في مكتبي من جا الولد كلمني كنت بوقع لي في شيك ما تميت التوقيع .. بس رميت ليك القلم ختفت عمتي من الشماعة وجيت جاري ..أنشاء الله أجر وعافية يا ود أبوي يا الخزين ياخ .
- كنر خيرك يا ود البطانة والله طول عمرك زول واجب ..
أما النسوان لازم يلمحن بأن الأمر فيه شئ من الدجل والشعوذة .
- الخزين سلامتك عين وصابتك يا ود أمي .أولاد الحرام ما بيخلوا لأولاد الحلال حاجة .
- صدقتي يا نفيسة يا أختي .. مع أنه أنا لامن يكون بايت معاي كان ما بخرته ما بيطلع مني ؟ (أحدى الزوجات تبين فضائلها .)
- أنا كمان أقعد أرقي فيه لامن يصل شغله (زوجة أخرى مستدركة )
أما الزوجة الصغرى الجميلة الجامعية الصغيرة السن و آخر الزوجات والتي تجلس عند رأسه وهي تحرك الهبابة تجد أنها ليس لها باع في سبيل الضرات هذا لكنها تحاول أن تجد لها موقعا تدافع به عن موقفها ( الخزين زول خير يده بيضاء على كل ناس ما أظن في زول قلبه أبيض يحسده او يعمل له ضرر الناس كلها بتحبه )
أمها : صدقتي يا بتي لكن حب الناس برضو في ناس بيحسدوه ..
- ما دا الكلام القلناه نحن .. حب الناس دا في ناس كايسنه بالقروش ما لا قنه ( مطاعنات أشتغلت)
همسات الغيبة ( القطيعة) : شوفي الغبيانة دي تهبب فيه هو المكيف زي التلج نحن ذاتنا بردنا ..
- اهي هي هي هي الله يجازيك يا سعاد ما بتفوتي حاجة ..
- دكتور خالد : يلا يا جماعة أطلعوا خلاص خلو الراجل يرتاح في ناس عايزين فرصة يدخلوا .
دكتور حمد واقف مندهشا ينظر لهذا الفلم باستغراب و غلبه التعبير .
وفي الخارج تحت أشجار المستشفى يجلس الزوار في حلقات والموضوع الدائر أيضا الخزين ومرضه .
- أها الراجل دا طلع عنده شنو ؟
- يا زول أها أمراض الأغنيا دي في زول بيعرفها يقولوا لك كرسترورو ونقروس وشنو ما عارف ..
- لكن والله يا العوض عمري ما اتمنيت لي مرض لكن كان جاتني مرضة الخزين دي بعزها دا والله ما أباها تب .
- يا زول ها في زول عاقل بيتمنى المرض ؟ .
- يا زول أنت ما نصيح شفت رقدة الراجل دا كيف ؟ والمحل دا ذاته أول مرة أدخله ..الستائر والبخور والنسوان السمحات ديل بدهبن قاعدات جمبك يمسدن فيك .. هو ذاتو عراقيه نضيييف وسنون الدهب يرقشن في وشو ...
يتبع
|
|
 
|
|
|
|
|
| العنوان |
الكاتب |
Date |
| الزيارة | درديري كباشي | 09-19-16, 05:09 PM |
| Re: الزيارة | جلالدونا | 09-19-16, 05:17 PM |
| Re: الزيارة | عمر التاج | 09-19-16, 07:31 PM |
| Re: الزيارة | درديري كباشي | 09-20-16, 06:23 AM |
| Re: الزيارة | درديري كباشي | 09-20-16, 06:22 AM |
| Re: الزيارة | درديري كباشي | 09-20-16, 06:24 AM |
| Re: الزيارة | ادريس خليفة علم الهدي | 09-20-16, 07:28 AM |
| Re: الزيارة | جلالدونا | 09-20-16, 07:32 AM |
| Re: الزيارة | علي دفع الله | 09-20-16, 07:43 AM |
| Re: الزيارة | درديري كباشي | 09-20-16, 08:07 AM |
| Re: الزيارة | درديري كباشي | 09-20-16, 08:06 AM |
| Re: الزيارة | عمر أبوعاقلة | 09-20-16, 08:14 AM |
| Re: الزيارة | درديري كباشي | 09-20-16, 09:02 AM |
| Re: الزيارة | درديري كباشي | 09-20-16, 10:26 AM |
| Re: الزيارة | درديري كباشي | 09-20-16, 04:47 PM |
| Re: الزيارة | ناذر محمد الخليفة | 09-20-16, 07:51 PM |
 Re: الزيارة | درديري كباشي | 09-21-16, 05:45 AM |
| Re: الزيارة | ادريس خليفة علم الهدي | 09-21-16, 06:51 AM |
| Re: الزيارة | Shueib Medani | 09-21-16, 08:04 AM |
| Re: الزيارة | درديري كباشي | 09-21-16, 09:22 AM |
| Re: الزيارة | درديري كباشي | 09-21-16, 09:34 AM |
| Re: الزيارة | درديري كباشي | 09-21-16, 02:51 PM |
| Re: الزيارة | عمر التاج | 09-21-16, 09:12 PM |
| Re: الزيارة | درديري كباشي | 09-24-16, 07:19 AM |
| Re: الزيارة | درديري كباشي | 09-25-16, 03:53 PM |
| Re: الزيارة | Osman Musa | 09-25-16, 07:42 PM |
| Re: الزيارة | درديري كباشي | 09-26-16, 09:23 AM |
| Re: الزيارة | عبيد الطيب | 09-27-16, 09:18 AM |
| Re: الزيارة | درديري كباشي | 09-27-16, 10:13 AM |
| Re: الزيارة | عبيد الطيب | 09-27-16, 11:02 AM |
| Re: الزيارة | درديري كباشي | 09-28-16, 10:07 AM |
| Re: الزيارة | درديري كباشي | 10-29-16, 02:35 PM |
| Re: الزيارة | محمد فضل ابراهيم | 10-30-16, 04:33 PM |
| Re: الزيارة | درديري كباشي | 09-20-17, 05:56 AM |
|
| |
فيس بوك
تويتر
انستقرام
يوتيوب
بنتيريست