وهل (يجلي النظر يا صاح) و (منظر شي بديع) هي الباقيات الصالحات؟..
خاطرة اهديها لصديقي المهندس محمد الإمام..وبالطبع للصحفية سهير..!
وبعد..
صديقنا محمد قسم الله..حبابك
لقد قسوت كثيرا يا صاحب على الصحفية سهير ، وقهمتها في صمة خشمها يااااااخ..! فهي يا صديقي لم تفعل شئ سوى انها ترجمت خطاب سائد عمرو يفوق السبعين سنة يا صديقي.. ولن اشرح كتير.. عشان صاحبي المهندس محمد الإمام ما يسوي لي سالفة جديدة ..ومشتاقين يا محمد الإمام ياااااااااااااااخ.. مجزوء عنوان بوستك يا قسم الله (صدر نافر)..! ياخي خطاب الغنا السوداني ..فيهو حاجات كتيرة بتتكلم عن الصدر النافر .. اشمعنا يعني سهير؟.. يجلي * النظر يا صاح..!
غنية (يجلي النظر يا صاح).. كلنا بنسمعها كتير.. واستاذنا حمد الريح اداها من قبل .. وقام ، فيما بعد ، زاغ من بعض اجزاءها باعتبار انو فيها افصاح شديد..وقام اشتغلها محمود عبد العزيز بتحريف واضح للغاية ودغمسة كمان.. وألأنكي.. غناها معاهو حمد الريح في منعطف ما.. وبرضك اشتغلوا دغمسة ما انزل الله بها من سلطان.. ما عارف ليه متعقدين كل العقد دي.. ياخي ده مزاجنا نحن السودانيين كده .. وعندنا القدرة نقراهو ونفهمو بضبانتو من غير عقد يااااااااااااااااااااخ.. كتر خير الفنانة نورة.. ودي زولة العواجيز بتذكروا كيف انو حمد الريح عمل معاها مشكلة عشان ما تردد غناهو..! المهم نورة غنت النص..بضبانتو.. القاموا زاغوا منها استاذنا حمد الريح ومحمود عبد العزيز زي حكاية (لهيجا حالي زي طعم الرمان)..
واصل النص..كما ادته الفنانة نورة ، يجري هكذا هي في الجمال زي يوسف ، والوهيبة كمان تمتاز بديسا طاهل ونهيد رمان..
اها يوسف عرفناهو.. الوهيبة دي منو كمان؟..
هذا ما يخص الصدر النافر الإتعقد من ذكرو صديقنا محمد قسم الله..
اما العجز الكبير..
(منظر شي بديع ما احلا الغزل)..
قال ليك يا محمد قسم الله..
موفور النفل ، ساح نام في الكفل ، اسفل مرة ، واعلى ، ومرة الكان سفل
واخدين بالكم من حكاية (التباديل ) دي..؟؟؟؟! اها (موفور النفل القام ساح في الكفل) اوعى تقولوا لي ده الحبيب؟.. ده موضوع تاني يا اهلنا.. والله صحي..!
متخيل المنظر ده يا محمد قسم الله؟.. عشان تعرفو..قوم اعصى الرب واتفرج ليك في قفا زولة ماهلة.. وشوف شغل القلاب اياهو..!!
فشنو..حكاية (صدر نافر) و (عجز كبير) هذه اشياء لم تختلقها الصحفية سهير..وانما كل ذنبها انها بتحاول تترجم لينا شكل الخطاب القمنا عليهو من سنة دو..!!
ودمتم..
كبر
_____________________
* كل من يوثق للغناء السوداني ، خصوصا غنية (اٍجلي النظر يا صاح) عليه ان يعتمد نموذج الفنانة نورا فهو الأقرب للنص الأصلي..
كتبناها فوق (يجلي النظر) علي حسب القراءة الشائعة ، لكن الأصل (اٍجلي النظر) فالشاعر يخاطب صديقه/سجيله/رفيقه/زميله .. ويطالبه بان يستوضح النظر أو يجعل من نظره صاحيا/واضحا/جليا حتى يتأمل ما يري بوضوح..(اٍجلي) هي نظام اٍلتماس بمثابة الأمر وهو ما يتسق مع روح النص..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة