|
|
 Re: مظاهرة حاشدة حاصرت محكمة عاصم عمر الذي رغ� (Re: خالد حاكم)
|
(الجزء الثاني) ..
من محاكمة (عاصم عمر) - جلسة اليوم 31 أغسطس 2016 ..
الطالب بجامعة الخرطوم .. وعضو حزب المؤتمر السوداني ..
المتهم زورا" بقتل أحد أفراد الشرطة .. في أحداث جامعة الخرطوم ..
--------------------------------
(الجزء الثاني) ..
نخصصه لأستجواب شاهد الأتهام الأول ..
من هنا بدأت مهزلة .. أبسط ما يقال فيها (شاهد ما بعرفش حاجة) ..
اليوم ..
واليوم فقط .. وجدت إجابة لذاك السؤال الذي طالما أرق مضجعي .. لماذا لا يتفاعل جنود الشرطة مع قضايا أوطانهم .. على الرغم من بؤس حالهم وكآبتها ؟؟؟
لماذا هم دائما العصا التي تضرب ظهورنا .. وهم شركائنا في محنة الوطن ؟؟؟
وجدت الإجابة النموذجية بشاهد الأتهام الأول في قضية (عاصم)..
أجابة تتمثل في فرد الشرطة (زاكي الدين حسن محمد) ..
هو شاب يعمل في الشرطة لفترة تجاوزت الإحدى عشر عام .. وعلى الرغم من برودة الجو داخل القاعة كان يتصبب عرقا" .. يرتجف .. كان مرتبكا" في حديثه .. مهزوزا" في إجاباته .. ضعيفا" في شخصيته .. فقيرا" في معلوماته .. لا يعرف شيء ..
اليكم إجاباته علكم تدركون ما أرمي إليه ..
بدأ الأستجواب الشاهد بممثل الأتهام ..
زاكي الدين (الشاهد) .. بعد أن حلف اليمين .. بدا وكأنه يقرأ من صحيفة الأتهام .. ولكن بلغه عامية .. ردد كما الببغاء كلما ذكره المتحري (محمد المهدي) وأوردناه هنا سابقا" .. فلا جديد يذكر .. بل قديم يعاد .. (يمكن الرجوع لتفاصيل الجلسة السابقة).
ثم أنتقلت دفة إستجواب الشاهد لممثل الدفاع ..
الدفاع : زاكي الدين (الشاهد) احكي لينا الحصل شنو ؟؟
زاكي الدين (وهو يتصبب عرقا") : نحن قالوا لينا الطلبة عاملين مظاهرات في الجامعة .. مشينا هناك الطلبة فلقونا بالحجارة .. إتحركنا بالدفار لشارع البلدية لأنو الطلبة انقسموا جزء في الجامعة وجزء في شارع البلدية .. الطلبة كانوا متجمهرين جمب الاستوب .. الدفار كان متجه كدا (ويشير بيديه إلى الأمام) ..
الدفاع : كدا دي وين شمال جنوب شرق غرب ؟؟
زاكي الدين : كدا .. كدا .. (ويشير بيديه للأمام) ..
الدفاع : كدا دي وين .. حدد الإتجاه الجغرافي ؟؟
زاكي الدين : أنا الجغرافيا دي ما بعرفا والله .. بس لكن زي وقفتي دي .. الدفار كان مقبل كدا .. كدا ..
ويضحك الحضور .. حقيقة إنتابني في تلك اللحظات تعاطف وتعجب في آن واحد مع هذه الشخصية .. تعاطف مع بساطة وسذاجة الشاهد .. وتعجب كيف لشخص لا يعرف توظيف الحروف ليشكل بها جملة مفيدة تفهم .. أن يكون شاهدا" في جريمة قتل ..
الدفاع : طيب يا (زاكي الدين) واصل كنتو في شارع البلدية والدفار مقبل كدا واصل ..
زاكي الدين : بعد كدا الطلبة فلعونا .. المتهم كان واقف جمب الزنكي بي جاي .. ونحن مقبلين كدا جمب الجامع الكبير !!!
(في هذه اللحظات أصبت بإندهاش عميق لإنتقال الأحداث دون تسلسل زمني ومنطقي من شارع البلدية قرب جامعة الخرطوم لتصل إلى الجامع الكبير في قلب السوق العربي)
يواصل (الشاهد) حديثه ..
زاكي الدين : الزول دا قام فك فينا الملتوف .. وجانا اللهب خاشي جوة حرق (حسام) وحرقني انا زاتي ..
الدفاع : حرقك وين يا زاكي الدين؟
الشاهد : في يدي اليمين
الدفاع : ورينا آثار الحريق في يدك .. ممكن ؟؟
(وهنا كانت الصدمة حينما رفع كم القميص عن يده اليسرى .. ليتأكد لي بأننا أمام شخص لا يميز يمينه عن شماله .. أو أنه لم يحفظ الدور جيدا")
الدفاع : وين آثار الحريق ما شايفين حاجه ؟؟
زاكي الدين : ما راحت الآثار !!!
لم أتمالك نفسي في هذه اللحظة .. وضحكت مع الضاحكين ..
الدفاع : طيب يا (زاكي الدين) الزول الرمى فيكم الملتوف تقدر توصفو لينا ؟؟
زاكي الدين : أخضر عامل بوب .. (إجابة نموذجية تنطبق على عاصم)
الدفاع : البوب دا شنو ؟؟
زاكي الدين : ما بعرف والله ..
الحضور يضحك ..
الدفاع : طيب قلت عامل بوب كيف وانت ما بتعرف البوب ؟؟
زاكي الدين : بوب يعني بوب كدا كدا ..
الدفاع : طيب فهمك للبوب شنو ..
زاكي الدين يصمت
الدفاع : طويل .. قصير .. مضفر .. ما مضفر .. شنو بالضبط ؟؟
زاكي الدين : ما بعرف ..
الدفاع : يا (زاكي الدين) إنت أكدت انت ما بتعرف البوب .. ولا شفتو قبل كدا .. ولا بتعرف توصفو .. على أي أساس قلت عامل بوب ؟؟
(زاكي الدين يصمت)
الدفاع : طيب .. شعر الزول الرمى فيكم الملتوف طويل ولا قصير؟؟
زاكي الدين : طويل
الدفاع : طويل لي وين ؟؟
زاكي الدين : لي هنا .. هنا ..
الدفاع : يعني للكتف ؟؟
زاكي الدين : اااي .. اااي ..
الدفاع : طيب عاين للمتهم دا .. هل بتنطبق فيهو نفس المواصفات القلتها دي ؟؟
زاكي الدين يلقي نظرة ثاقبة .. ويجيب
زاكي الدين : ياهو .. ياهو زااااااتو ..
الدفاع : لكن الزول دا لا عامل بوب لا شعرو طويل لي كتفو .. كيف ياهو زاتو؟؟
زاكي الدين : من وشو .. وسط خمسمية زول بطلعو ياهو زااااااتو ..
الدفاع : طيب يا (زاكي الدين) .. الزول الرمى فيكم الملتوف دا كان على بعد كم منكم؟؟
زاكي الدين : كان قرييييب
الدفاع : كم متر منكم ؟؟
زاكي الدين : أربعة متر ونص !!
الدفاع : طيب كان جمبو ناس معاه ساعة فك فيكم الملتوف ؟؟
زاكي الدين : لا مافي جمبو زول ..
الدفاع : أقرب زول من الناس المعاهو كان على بعد كم منو؟؟
زاكي الدين : أقرب زول من الناس المعاهو كان على بعد متر .. متر ونص !!
الحضور يضحك .. والدفاع أيضا" ..
الدفاع : يعني كان في ناس جمبو ..
الشاهد يصمت ..
الدفاع : في ولا مافي ؟؟
زاكي الدين : مافي مافي ..
الحضور يضحك ..
الدفاع : طيب يا (زاكي الدين) إنت اتعرفت على المتهم في طابور الشخصية ؟؟
زاكي الدين : آي
الدفاع : اتعرفت عليه كم مرة ؟؟
زاكي الدين : مرتين ..
الدفاع : وباقي المرات كان وين ؟؟
زاكي الدين : كان مافي
الدفاع : طيب .. من الناس الكانوا في طابور الشخصية في زول بشبه المتهم دا؟؟
زاكي الدين : آي
الدفاع : كم زول بشبهو؟؟
زاكي الدين : أربعة انفار بشبهو ..
الدفاع : كم نفر كانو في طابور الشخصية ؟؟
زاكي الدين : سبعة وهو التامن ..
الدفاع: طيب يا (زاكي الدين) نرجع لحظة فكو فيكم الملتوف .. أحكي لينا اللحظة دي بالتفصيل ؟؟
زاكي الدين : انا شفت الزول دا فك فينا الملتوف .. انا كنت قايلا طوبة .. لغايت ما دقت في الدفار وحرقتنا ..
الدفاع : ما كان في ناس بفلعوكم بي الحجار في اللحظة ديك ؟؟
زاكي الدين : كان في حجرين ..
الدفاع : ممكن توصف لينا أشكال الشخصين الفلعوكم بي الحجرين ديل ؟؟
زاكي الدين : والله ماركزت في شكلهم ..
الدفاع : ما ركزت في شكلهم الخلاك تركز في شكل المتهم دا شنو .. مع العلم انت قلت قايلو فك فيكم حجر زيو زي الناس التانيه .. الخلاك تعرف تميز وتتعرف على شكلو بالدقة دي شنو؟؟
زاكي الدين : الزول دا شبهو برااا !!
والحضور يضحك ..
تلخيصا" ..
يمكننا القول أن إفادات شاهد الإتهام الأول (زاكي الدين حسن محمد) .. كانت مجموعة من الحروف المبعثرة .. والتي يستحيل معها تشكيل جمل ذات معاني .. تحقق من خلالها العدالة .. شهادة ناقضت نفسها .. قبل أن تناقض ما جاء بالأتهام ..
رفعت الجلسة .. إلى الأربعاء القادم إن شاء الله .. والتف الحضور حول القفص يلقون التحايا على معشوقهم الأبنوسي الجميل (عصام عمر) ..
--------------------
* الصورة لـ (زاكي الدين حسن محمد) فرد الشرطة .. شاهد الأتهام الأول .. يبدو على اليمين .. بقميص بني (مخطط) بخطوط بيضاء .. ويضع على كتفه منديل قماش (بشكير) باللون البمبي ..
المنديل ده تعب معاه تعب شديد من شدة الرجفه والعرق !!!
|
|
 
|
|
|
|
|
| العنوان |
الكاتب |
Date |
 غدا توجهو للمحكمة غدا فليكن الحصار اكبر غدا زلزلوا الارض من تحت اقدامهم(صور) | صلاح جادات | 08-09-16, 04:19 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:22 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:23 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:25 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:27 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:31 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:32 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:34 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 04:36 PM |
| Re: مظاهرة حاشدة حاصرت محكمة عاصم عمر الذي رغ� | ناصر حسين محمد | 08-09-16, 04:36 PM |
| Re: مظاهرة حاشدة حاصرت محكمة عاصم عمر الذي رغ� | ناصر حسين محمد | 08-09-16, 04:37 PM |
| Re: مظاهرة حاشدة حاصرت محكمة عاصم عمر الذي رغ� | مني عمسيب | 08-09-16, 04:40 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-09-16, 05:35 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-10-16, 00:04 AM |
| Re: مظاهرة حاشدة حاصرت محكمة عاصم عمر الذي رغ� | قاسم الامين عبود | 08-10-16, 06:58 AM |
| Re: مظاهرة حاشدة حاصرت محكمة عاصم عمر الذي رغ� | Mohd Ibrahim | 08-10-16, 05:56 PM |
| Re: مظاهرة حاشدة حاصرت محكمة عاصم عمر الذي رغ� | nour tawir | 08-10-16, 10:44 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-12-16, 11:22 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-16-16, 10:59 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-17-16, 04:19 PM |
| Re: مظاهرة حاشدة حاصرت محكمة عاصم عمر الذي رغ� | محمد عبد الجليل | 08-17-16, 05:30 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-19-16, 05:40 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-24-16, 08:57 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 08-31-16, 08:55 PM |
| Re: مظاهرة حاشدة حاصرت محكمة عاصم عمر الذي رغ� | وائل حمزه الزبير | 08-31-16, 09:29 PM |
| Re: مظاهرة حاشدة حاصرت محكمة عاصم عمر الذي رغ� | خالد حاكم | 09-01-16, 00:03 AM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 09-02-16, 07:45 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 09-04-16, 00:21 AM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 09-05-16, 08:24 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 09-20-16, 11:43 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 09-29-16, 11:49 PM |
| Re: مظاهرة حاشدة حاصرت محكمة عاصم عمر الذي رغ� | صلاح جادات | 10-02-16, 00:15 AM |
|
| |
صلاح جادات
فيس بوك
تويتر
انستقرام
يوتيوب
بنتيريست