كلوة يا دار أما.. يا قريبي .. انتا منطلق من ياتو نقطة بالضبط..؟ انتا نسيت ولا شنو يا قريبي..؟؟؟ يا خوي الحدود البتتكلم عنها دي فيها حاجة اسمها الحركة الشعبية شمال ، حركات سودانية مسلحة كتيرة.. يعني انتا تقوم تفرض علينا كسر رقبة انو نتعامل مع الجنوبيين ونتناسى النخبة .. وفي نفس الوكت بتحاول تفرغ فينا غضبك من الجبهة الإسلامية وباشبوزك حكمها من ماسون واخوان مسلمين وشنو كده ما عارف في الخرطوم؟.. يا ولد ابوك.. الناس القاعدة في الحدود لابتعرف الجبهة الإسلامية ولا بتعرف الصادق المهدي ولا بتعرف غبائن النخبة سواءا كانت في الجنوب او الشمال.. ليه انتا داير تشيلها الشيلة باسم القانون الدولي؟..ياخي طظ في القانون الدولي .. ما ياها ديك ابيي قاعدة سنين وسنين قانونك الدولي ده عمل ليها شنو غير يزيدها تعقيد ، ولا انتا زيك وزي باشبوزك الشيوعيين والجمهورين بتفتكر ناس ابيي ديل شوية مراحيل ساكت؟.. ما يا هو ديلك دينكا نقوك لمن عينهم طلعت من ظلم حكومة الجنوب ما لقوا غير المسيرية يحتموا بيهم ويتقاسموا معاهم لقمة العيش.. وبرضك قوات الإتحاد الأفريقي العاطلة التي عمادها الحبش.. حايمة في الأرض هناك وماقادرة تسوي التكتح..ولا دي اراضي ما داخلة في حسابك وحساب النخبة السودانية الوهم؟.. يا سعادتك.. حدودك البتقول بضرورة فتحها دي.. فيها قوات حركة شعبية شمال منتشرة في جنوب كردفان والنيل الأزرق ..لا دي اراضي غير داخلة في حساباتك يا جنابو؟.. يا صديقي.. السودان مش جنوب دارفور متاخمة لبحر الغزال والفراتيت والزاندي وكريش وشنو كده ما عارف..في سودان تاني يا سعادتك.. ولا ده ما داخل في حسابك؟.. قدرنا يا محمد الحسن اننا ناس ولايات حدودية ، شعوب مسكينة لا ليها والي ولا تالي..شعوب ما شغالة بنخبة الجنوب ولا شغالة بنخبة الشمال ولا شغالة بالصادق المهدي ذاتو.. فهل لها الحق في الحياة والدفاع عن نفسها..أم لأ؟
قد تكون انت ممن تجاوز حقل المناطقية الي القومية (زي فضيلي جماع مثلا).. ولكن ليس لك الحق ان تسجن الناس في تصوراتك القاصرة (اشبه بتصورات فضيلي جماع)..!! يا اهلنا هوي نحن بشر ونعرف الواقع الذي يحيط بنا.. وما بنقبل ضبانة تمر عبر حدودنا.. والعندو مشكلة مع الجبهة الإسلامية وحكمها.. ياها ديك الجبهة دي قاعدة في الخرطوم..!! لأ لفتح أي حدود مع دويلة الجنوب ، ولأ لتدفق أي لاجئين من الجنوب.. ولأ لتحميلنا مسئولية نحن لسنا في اهبة الإستعداد لتحملها..!! اهو داك ول ابا الأمين البشاري ، مواطن زيك من جنوب دارفور وبيقول ليك لأ لفتح أي حدود..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة