اااااااااااااااااااااااااخ..! لاقيتك يا هاشم ، وقد لا تذكر ، ومش ضروري تتذكر ذاتو..! مغربية ، وعركي مارق من بيتك ، وهي لقية انتظرتها سنين وسنين.. كنت ، طيلة سنوات دراستي في الجامعة ، احنس صديقي دكتور عبد الباقي حامد الجزولي.. عشان نزور..جارهم في الحلة هاشم صديق ، وعبد الباقي يعتذر..بحجة انو هاشم زمنو قليل..والقليل اخير يمرق لينا بي حاجة..الى ان تهيأت لي فرصة لقياك ، عابرا ، رغم انف صاحبي عبد الباقي.. ولو داير تحسبها بالزمان العابر.. كانت مغربية .. نفس المغربية الكان ناس الحيكومة استقبلوا فيها خبر وفاة الزبير محمد صالح.. وجابوا الطيب سيخة من عدم.. عشان يلعلع في الروادي بانو كان حاضر وقعة الطيارة اياها في حوافي الناصر.. وانا كنت اعلم ، وغيري ناس كتار.. انو الطيب سيخة جابوهو من جوبا.. مسبسب ومنعم.. عشان يتكلم في الروادي.. شفت الزمن السوداني غريب ككيف يا هاشم..!! لك الحق في ان تتذكر كلمات شعرك وتهديها لمن تشاء.. ولكن هل تتذكر ان كلماتك اصبحت وجدان امة بحالها ؟ فهل استشرت الأمة يا هاشم صديق؟..هل استشرت مكي سنادة؟..وماذا يضيرك ، وانت الشاعر الحريف ان تكتب كلمات جديدة وتهديها لمن تشاء؟.. المهم..!!
يا جلال.. ياخي انتا الجابك هنا شنو..!!! عارف يا صاحب.. خاصمت حبيبتي.. ايام الدراسة في جامعة الخرتوم..كلية القانون.. أو أي كان اسمها..!! عارف ليه؟.. كانوا نفرين.. متناقضين ، بؤر التضاد حيثما كان وكيفما كان..هاشم صديق وحسن الترابي..! واظنك بتعرف كيف حروب الجكس الممتدة في ذلك الزمان العريق..! سافرت وطشيت ومرقتها في كوستي.. اي والله كوستي بتاعة ناس عبد الحفيظ اب سن و معاوية الزبير..طراهم الله بالخير.. فقامت حبيبتي اياها رسلت لي جواب من اربعة صفحات فلسكاب.. وهي بتحكي عن اكذوبة تمثال الشمع ، القام داب قدام عيونها.. وكانت تعني سيدنا حسن الترابي، ولا، أي كان اسمو..!! ولمن لاقيتها في الخرتوم (الزولة من بنات اركويت ، جيران البلابل ، الحيطة بالحيطة ..يااااااااخ)..قامت قالت لي: هاشم ، نرجسي..وخيالي.. وعايش..في عالم تاني..!! فقلت ليها: الترابي..هوادة.. نظام ممكن نتفاهم ونتفاوض ونتقايط ذاتو.. لكن هاشم صديق..حاجة تانية.. ولا نقبل فيها مقايطة.. وان شاء الله انتي وحنانك تطيروا وما تركوا..!!ا وكانت ، حبيبتي اياها ، قد ضاعت بين الكيزان والبعث العربي ، ولم تجد روحها الإ في ناس قريعتي راحت ..ناس نحنا وكده.. فصارت مثلنا تسب امسودان ونخبة امسودان.. واتعلمت حاجات كتيرة خلاص..!! حزينة حبيبتي ، اليوم ، وحزين انا يااااااااااااااااااخ..! ما غاب عن هاشم صديق ويوسف الموصلي.. انهم خلقوا وجدان الناس.. فكيف لهم يتبرعوا بوجدان الناس؟.. المهم..
هذا النص/الغنائي.. يجمع نادر خضر ومحمود عبد العزيز.. وهم يؤدون اغنية من كلمات عثمان خالد..والحان واداء عمنا وابونا صلاح الجيلي محمد ابوقرون..ونحن نتمنى ان لا يتحمق عثمان خالد أو محمد يوسف أو التجاني الحاج موسى..بان يهدوا كلماتهم واشعارهم ..التي صاغت وجداننا نحن الأمة الوهم اياها ، الى اخرين ليعيدوا انتاجها بصورة قبيحة..
لست ضد الشابات مكارم بشير وامنة حيدر ، ولكني ضد الإفلاس..نعم الإفلاس..!!
ما فعله هاشم صديق بخصوص اغنية (النهاية) وما فعله يوسف الموصلي بخصوص اغنية (الكلام القالوا عنك).. هو افلاس بالباب العديل.. ومصادرة لوجدان خلق كتيرة خلاص..؟..فلا هاشم صديق يعجز عن كلمة جديدة ولا الموصلي يعجز عن تلحين وتوزيع جديد..اشمعنا يعني نحن المحبين ، هي الحيطة القصيرة؟..
هذا النص الغنائي يا جلال..فيهو نادر ومحمود (طبعا لا هاشم ولا الموصلي اهدوهم اعمال ، ومش مهم)..وبيؤدوا غنية لصلاح بن البادية.. غنية وجدان يا صديقي..! نادر ومحمود.. اصلا بدأوا مشوارهم مع بعض في فرقة نادرة ومنسية.. وكان المغني الليد فيها نادر خضر..! كان معاهم..واحد اسمو محمد حسن.. وكان احرفهم جميعا..!!
المهم..
لمن كنت بغالط حبيبتي (بتاعة كلية القانون تلك)..كنت بقول ليها.. اتفرجي في فيديو لغنية حاجة فيك.. وما تشتغلي بمصطفى سيد احمد أو هاشم صديق او العازفين.. لكن عايني لي زولة لابسة توب.. وبتنقر باصابعها على وركها (ياها دي : نقر الأصابع لما ترتاح للموسيقي..)!! وذاك كان زمان مضى يا جلال..! في الفيديو الفوق ده..عاين..يا جلال ..! الجماعة (قهوا)..لو بتعرف كيف الزول يقهي ياااااااااااااااخ....!! لمن قالوا: كون من رشاقة وامسيات..!! وباقة انيقة وملونة..!
فشنو قامو ا الجماعة (قهوا)..عرفت كيف الزول بيقهي يا جلال..؟! غايتو لو تابعت بدقة ، يا جلال ، انا عارف الونسة البين نادر ومحمود..خصوصا لمن نادر كان بيتكلم وماشي على محمود..! لكن مش مهم.. المهم.. لمن نادر يقول : غار المسا..والكون صبح عشاق جمال يتأملوا.!! اها الجماعة هنا منسجمين للغاية.. وبتظهر حاجات كده اسكت ساكت خليها ، سألت عنها عمي وصاحبي المرقش الأكبر ، فقال لي يا وليد يا مشوطن دي مش يقهوا ، دي اسمها: وذو اشر شتيت النبت عذب..نقي اللون براق برود..!! اهو دي فكرة الغنا الوجدان.. فشنو الناس البتهدي ساكت دي..حقو تتذكر الوجدان ياااااخ..!
وكما قال (اصلو ، المحبين الحنان ، لا بنسوا لا بتحولوا..!!)..وده مقصود بيهو حبيبتي بتاعة القانون اياها..!! ههههههههههه.. عارف الغريبة شنو يا جلال..؟..بعد سنين..سنين..قامت سألتني سؤال غريب..وقالت لي انتا اسم جدك الرابع شنو؟.. قلت ليها معلا..؟..قالت لي: معلا ابو امخيان الراقد الغبيش؟.. ركبي ساحت ،..ركبي ساحت ياجلال.. والزولة من اركويت..! شرحوا: طلعت من اهلك المسيرية.. بلا اركويت.. بلا البلابل.. ولا شنو كده ماعارف؟ اهو امسودان كانت كده زمان يا حبيب.. تحب وتجكس.. وما تكون عارفهم من وين بالضبط ولا هم عارفين ولا دايرين يعرفوا ذات..فقط تقهي قدامهم..وتجوعر قدر ما الها يديك من قدرة..وتكون عارفهم..انو: غار المسا ، والكون صبح عشاق جمال يتأملوا.. وكل الحروف الفي الخيال ، بلهفة جادوا ما غلوا.. وقالوا الجمال يا غالي بيك ، كانت نهايتو واولو.. حتى القمر حولو النجوم ، اتلفوا فيك..اتغزلوا نحن في هواك يا غالي ..لا.. لآ بنطيق بعاد لا بنحملو اصلو ، المحبين الحنان ، لا بينسوا لا بيتحولوا..!!
خلي واحد يجي يقول اتنازلت منها قال..!!
يعني انفعال ذو اشر شتيت النبت دي برضك تبع القسمة الضيزي يا هاشم صديق ولا شنو العبارة يا صديق؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة