[صور حصرية من دول الساحل]

استاذي وصديقي ..محمد الحافظ (اٍشو)..حبابك

ولينا طولة على قول اهلك..عساك طيب يا صديقي

كتر خيرك كتير يا الحافظ على اثارة هذه النقاط..

عارف يا الحافظ..اهلنا ناس غرب افريقيا..تحديدا ناس الغنا..عندهم اعتداد كبيربحكاية النمط الرعوي..وحياة البادية..و عندهم اشغال كتيرة عن النوماد..!!

واكيد بتكون متذكر جاكة قوانين المرحوم جعفر نميري لمن جاب قانون العقوبات بتاع 1983 واتضمن فكرة (المتشرد) ،

والتعريف المجوبك.. القاموا الناس بتريقوا عليهو بسؤال حريف انو موقع (العرب السيارة/الرحل ) شنو من الإعراب..!!..زمن يا صديقي..

صديقنا الموسيقار وليد عبد الحميد (وليد كوش) عندو البوم كان بيحتفي بالحكاية دي واسمو..

Radio Nomad

المهم..

ياخي حكاية ليبيا دي طلعت عين اهلنا..الكلاش النضيف (في معاييرهم طبعا) ليبي..الجركانة النضيفة ليبية..والمشمع النضيف ليبي..!

الوالد ، عمك الحاج النور كبر (عليه السلام) ، وهو انصاري قح ..

كان عندو نظرية عجيبة..و كان بيحارب حكاية استبدال الشــُقة (برش البناء) والطاقة (قماش تم استغلالو بدل الشقة في بناء بيت البقارة)..ا

ستبدال تلك الأشياء بالمشمع..ياخي ده حتى الكيس..كان مصر انو الناس تستخدم مخلاية أو خرتوية قماش..ليه؟..

لأنو المشمع كتل ليهو بقرتين عزيزتين (براك عارف اهلك وعزهم للبقر)..واكتشف انو البهايم (بقر ، غنم ، ماعز ، حمير )

لمن تاكل المشمع (وهي بتبحث عن اي حاجة حادقة/مالحة) بيقوم بيعمل ليها نفاخ (ياخي البهيمة بتقيف زي كورة القدم..!!)..و بيكتلها في دقايق..!

اليوم يا الحافظ..الموضوع اتطور ابعد من سُميات المشمع المشعة ، الى اخطار اكثر اشعاعا

(ولغاية اللحظة ناس قليلة للغاية بتتكلم عن خطر المواد المشعة واثرها على الثروة الحيوانية في مناطق صناعة البترول في ترابنا هناك..!!)..

اما الموارد الطبيعية ..!!..واللــه حسرة ومغسة يا صديقي..!!

الصمغ الجاب صورو صديقنا العزيز سيف ، يكفي ان امريكا بكل جبروتها لمن فرضت عقوبات على امسودان ،

استثنت الصمغ العربي..ولو بيقدروا يزرعوا هشاب ولا شدرة ام سنينة ، سواءا كانت بيضا او زرقا ، كان من زمان ادونا بالجزمة القديمة ..و براك بتعرف طنقعة اليانكي..!

هل تصدق يا الحافظ.. الكركدي..أي والله الكركدي الواحد ده.. كان بيقوم بروس ساكت في حوافي الزراعة (كردفان ، دارفور ، تشاد ، النيجر ، مالي ..الخ)..والليلة انا في كالقري (مدينة في غرب كندا)

بشتري الكركدي المجيه..معبأ في اكياس انيقة وحميمة ولطيفة ..ومن عجب فيهو ذكر (فخر الصناعة الألمانية)...أي والله المانيا عمنا هتلر في ذات نفسها..!!!..ليه؟..دي قصة طويلة وح احكيها في وكت اخر..!

تلك الإقتصاديات يا صديقي ، هي غنية للغاية بمواردها ، لكن الأخر الحضاري بيقوم يفرض علينا وعي انها حاجات بدائية وخارج الزمن..لكن بيشيلها وبيعمل منها العجايب..!!

نعم يا صديقي ، هناك اصوات الضمير الحي الذي ينادي بالحفاظ على البيئة..لكن الرأسمال دايما عندو نظرة مختلفة..نظرة الربح والإستهلاك.. بيفرض علينا انو حاجاتنا كعبة..!

اهلنا ناس اليسار الأفريقي في امريكا ، عندهم مجلة محكمة اسمها ..

Black Agenda Report

بطلنا نستشهد بيهو لأنو في واحد داعشي اسمو سيف ابكر قام نط فيهو بلا فهم..المهم..

الناس ديل في كل دراساتهم ، مقالاتهم ، بتكلموا عن حاجات غريبة.. انو الحروب اتفرضت على افريقيا

(تركيزهم حروب الكنغو ، افريقيا الوسطى ، تشاد ، دارفور..الخ)..وفكرتهم انو الحروب اتفرضت على افريقيا ،

لأنو الأمبريالية ما بتلقي فرقة تستغل حاجات الناس هناك غير انو تخلق حرب وتخلي الأهالي منشغلين بقتل بعضهم البعض..

عشان الموارد تكون قاعدة سايبة ساكت وهم يخموها من غير رقيب أو حسيب..!!

ودمت..

كبر