ول ابا علي عبد الوهاب..حبابك يا صديقي
كتر خيرك على المطايبة..
والتحية عبرك لول ابا بريمة..
يقيننا يا صديقي مثل هذه المعارف الأفضل أن تأتي من التجربة المباشرة..
وناس امسودان مرات عندهم تأفف تجاه اشيائهم واشياء اهلهم..ياخي كل الحاجات البسيطة بتلقى فيها عبقرية الإنسان البسيط والتعايش مع الحياة ومواجهتها..!
فكرة المناصيص القدامنا دي..هي عبارة عن ثقافة جميلة وشايعة..وناس الغرب الحضاري طوروا الأدوات البسيطة وعملوا منها اشغال اقتصادية بتقوم عليها اشغال..
يعني فكرة المناصيص..ياها المرقت منها حكاية الشوايات..و الليلة لو مشيت امدرمان بين كل شواية وشواية بتلاقي شواية..في نورث امريكا عندنا فكرة الباربكيو..
وعملوا ادوات تباع بالشئ الفلاني..نفس انسان امسودان البيشوف ناس بدائيين ، بيدفع دم قلبو عشان يشتري ليهو فرن باربكيو ..
و يفتش الخلاء والفضاء المفتوح (الحدائق العامة) ولا في ضهر بيتو (الباك يارد) عشان يستمتع بالشية في الهواء الطلق..!
وما تنسى القيمة الإقتصادية لصناعة فرن الباربكيو..الشركة بتوفر عمالة ودخل بيمشي للخزينة العامة في شكل ضرايب..!!
اصحابنا هنا..لمن شافوا كمية اللحوم الجاب صورها صحابنا سيف..اول حاجة ادوها جفلة..لأنو ما متعودين يشوفوا اللحمة كده..
يعني متعودين يشوفوها مكيسة ومغلفة بصورة انيقة وبيشتروها من السوق..اها عندي صاحبي دكتور من بنغلاديش (من معجبي اختنا الفنانة شادن محمد حسين)..
ناقش اللعبة وحفظ حاجات امسودان من نقتنا الكتيرة واجاباتنا على تساؤلاتو المستمرة ..قال معلومة بسيطة غيرت رأي الخلق ديل في طرف من الثانية..
فقال ليهم: البهايم دي ما بتاكل علف صناعي وانما علف طبيعي..!!..طبعا العالم هنا عنده حنين غريب تجاه الحاجات الطبيعية.. لأنو الصناعية ورتهم الويل والثبور..!!
ولغاية الليلة الناس تتمطق ساكت..وبراك بتعرف اهلنا عيال جون..لمن تهف ليهم حاجة طوالي بيعملوها..
ونتمنى انو ينجحوا ويسافروا ويبقوا زباين لأهلنا الفي الصور ديل..هم يستمتع بالشواش واهلنا يترزقوا شوية..!!
الخلاء ، الريف.. حاجات جميلة يا علي..واهلنا عندهم قدرة عجيبة على مباصرة الحاجات بعبقرية مذهلة..التحية ليهم..
ودمت..
كبر